धार्मिक सभाबाट फर्केको ४९ दिनपछि कोरोना पुष्टि
बारा — ‘कन्ट्याक्ट ट्रेसिङ’पछि कोरोना संक्रमण पुष्टि भएका बाराका दुवै जना प्रहरी निगरानीमा भए पनि उनीहरुलाई क्वारेन्टाइनमा लगिएको थिएन । ४९ दिनअघि नेपालको सप्तरी र भारतको दिल्लीमा भएका धार्मिक सम्मेलनमा सहभागी भई उनीहरु घर फर्किएका थिए ।
‘धार्मिक कार्यक्रम सकेर आएको ४९ दिनपछि उनीहरुमा कोरोना पुष्टि भएको छ,’ प्रमुख जिल्ला अधिकारी रुद्रप्रसाद पण्डितले भने, ‘बिहीबार काठमाडौंबाट स्वास्थ्य टोली आउँदैछन्, परीक्षणमा के हुन्छ त्यसपछि सिल गर्ने/नगर्ने टुंगो लाग्छ ।’ तबसम्म टोल समुदायलाई सचेत पार्दै सुरक्षा निगरानी बढाइएको उनले बताए ।
दुवै संक्रमितलाई वीरगन्जस्थित नारायणी अस्पतालमा उपचारका लागि लगिएको छ । ‘सिल नगरी समुदायमा आउजाउदेखि अन्य गतिविधि नगर्न दिन प्रहरीमार्फत् कडाइ गरेका छौं,’ प्रजिअ पण्डितले भने ।
वैशाख १४ मा वीरगन्ज–१६ इनर्वाका ५५ वर्षीय एकजनामा संक्रमण भएको पुष्टि भएपछि उनैको ‘कन्ट्याक्ट ट्रेसिङ’ को आधारमा बाराका यी दुईलाई जीतपुरसिमरा उपमहानगरको क्वारेन्टाइनमा लगिएको थियो । त्यहींबाट निकालेर लगिएको स्वाबको नमुना परीक्षण गर्दा दुवैमा कोरोना पोजिटिभ देखियो । उनीहरुलाई क्वारेन्टाइनमा लगेको चौथो दिनमा संक्रमण पुष्टि भएको हो ।
जीतपुरसिमरा उपमहानगरपालिका–७ स्थित आफ्नै घरमा परिवारसित बस्दै आएका ४३ वर्षीय र सिम्रौनगढ नगरपालिका–४ हरिहरपुर घर भई जीतपुरसिमरा–१९ कै इनर्वासिरास्थित एक मस्जिदमा बस्दै आएका ३१ वर्षीय मौलानामा संक्रमण देखिएको हो । ‘दुवैजना बाहिरबाट फेर्केदेखि निगरानीमै थिए,’ स्थानीय एक कनिष्ठ प्रहरी अधिकृतले भने,‘कन्ट्रयाक्ट ट्रेसिङ’ बाट जानकारी आएपछि वैशाख १४ मा क्वारेन्टाइन लग्यौं ।’
मस्जिदमा बस्दै आएका मौलाना मुस्लिम समुदायका बालबालिकालाई पढाउँथे । लकडाउन सुरु भएपछि बालबालिकालाई छुट्टी दिएर उनी आफ्नो एक चेलाको साथमा बस्थे । घरघरबाट पालैपालो ल्याएर उनै चेलाले खाना खुवाउने गरेका थिए । १५ वर्षीय ती चेलालाई पनि प्रहरीले क्वारेन्टाइनमा लगेको छ । यसैगरी घरमा बस्दै आएका ४३ वर्षीयका परिवारका सात जनालाई प्रहरीले बुधबारै क्वारेन्टाइन पुर्याएको छ ।
जिल्ला जनस्वास्थ्य प्रमुख राजकिशोर पण्डितकाअनुसार जिल्लामा बिहीबारसम्म १ सय ५७ जनाको आरडीटी र १ सय १ जनाको पीसीआर परीक्षण गर्दा सबै निगेटिभ देखिएको छ । २ जना आइसोलेसनमा छन् भने १ सय ८१ जना क्वारेन्टाइनमा छन् ।
प्रकाशित : वैशाख १७, २०७७ १८:५३