विदेशबाट फर्किएको ४२ औं दिनपछि धादिङका एक युवकमा आरडीटी परीक्षण पोजिटिभ- समाचार - कान्तिपुर समाचार

विदेशबाट फर्किएको ४२ औं दिनपछि धादिङका एक युवकमा आरडीटी परीक्षण पोजिटिभ

हरिहरसिंह राठौर

धादिङ — धादिङ ज्वालामुखी गाउॅँपालिकास्थित स्वास्थ्य केन्द्रमा एक २७ वर्षीय युवकको र्‍यापिड डायग्नोस्टिक टेस्ट किटमा परीक्षण गर्दा पोजिटिभ रिपोर्ट आएको छ । ज्वालामुखी–३, अमराई निवासी ती युवक गत फागुन २० गते (मार्च ४)मा दक्षिण कोरियाबाट नेपाल फर्किएका थिए ।

विदेशबाट फर्किएका सबैलाई द्रुत परीक्षण गर्ने योजनाअनुसार परीक्षण गर्दा पोजिटिभ देखिएको ज्वालामुखीका स्वास्थ्य संयोजक सुजन श्रेष्ठले बताए ।

प्रमुख जिल्ला अधिकारी अस्मान तामाङका अनुसार थप परिक्षणका लागि उनलाई सदरमुकामस्थित अस्थायी आइसोलेसनमा राखेर स्वाब राष्ट्रिय जनस्वास्थ्य प्रयोगशाला पठाइने छ । ‘नेपाल फर्किएपछि उनीसँग सम्पर्कमा आएका परिवार लगायत स्थानीय व्यक्रिहरुबारे खोजि गर्दैछौं,’ उनले भने, ‘थप रिपोर्ट आएपछि उनीको परिवार र सम्पर्कमा आएका अन्यलाई पनि क्वारेन्टिनमा राख्ने व्यवस्था मिलाउँदैछौं ।’

फागुन २० मै नेपाल आएका उनलाई चैत २/३ गते नै ज्वरो आएको बताइएको छ । ‘उनलाई परिवारलगायत छरछिमेकले क्वारेन्टिनमा जान आग्रह गरेका थिए । उनले आफू हेटौंडामै २ हप्ता बसेर आएको भनेर पन्छिएका थिए । स्थानीयहरुले गुनासो गरे पछि त्यतिबेलै स्थानीय स्वास्थ्य संयोजक सुजन श्रेष्ठलाई लिएर घरमै गएका वडाअध्यक्ष रुद्रमान श्रेष्ठलाई आफूले चर्को गर्मीमा गाईको मही पिएकोले सामान्य ज्वरो आएको भनेर सफाई दिएका थिए । वडाध्यक्ष श्रेष्ठले आफूहरुसँग त्यसबेला परिक्षण गर्ने कुनै साधन नभएकोले त्यसै फर्किएको बताएका छन् ।

ती युवक हाल परिवारका अन्य तीन सदस्यसँग घरमा बसोबास गर्दै आएका थिए । सदरमुकाममा पसल गरी बस्ने बाबुआमाहरु पनि लकडाउन पछि घरै गएका छन् ।

प्रदेशबाट द्रुत परिक्षणका लागि प्राप्त ३ सय किटहरु मध्ये जिल्लामा रुवीभ्याली, खनियावास, थाक्रें र सिद्धलेकबाहेक अन्य सबै स्थानीय तहमा परिक्षण आरम्भ गरिएको छ ।

मंगलबारबाटै ज्वालामुखी र बेनीघाटमा परिक्षण आरम्भ गरिएको छ भने नीलकण्ठ नगरपालिकामा ५०, गल्छीमा ३६, नेत्रावतीमा ३६, त्रिपुरासुन्दरीमा २०, धुनीबेंसी नगरपालिकामा १४, गजुरीमा ७ र गंगाजमुनामा ३ जना समेत जम्मा १ सय ६६ जनाको स्वाब परिक्षण नेगेटिभ देखिएको थियो ।

क्वारेन्टिनमा राखिएका गल्छीमा १ जना र गजुरीमा २३ जनालाई बुधबार नै बिदाई गरेपछि जिल्लाका सबै क्वारेन्टिनहरु शून्यमा झर्नेछन् ।

प्रकाशित : वैशाख २, २०७७ १८:२२
प्रतिक्रिया
पठाउनुहोस्

उद्योगी कावराको निधन

कान्तिपुर संवाददाता

विराटनगर — पूर्वका अग्रज उद्योगी तथा समाजसेवी सीताराम कावराको ९६ वर्षको उमेरमा निधन भएको छ ।

सप्तरीमा पहिलो पटक राइस मिल स्थापना गरेका सप्तरी उद्योग वाणिज्य संघका संस्थापक कावराको कंकालिनी नगर ९ स्थित निवासमा सोमबार निधन भएको हो ।

विसं. १०८१ मा जन्मेका कावरा र उनका छोराहरु सम्मिलित क्वालिटी बिस्कुट, चाउचाउ, साबुन जस्ता उद्योग सञ्चालनमा छन् । विभिन्न स्थानमा धर्मशाला बनाउनेलगायत सामाजिक काममा पनि उनी सक्रिय थिए ।

उनको चार छोरा र दुई छोरी छन् । उनका छोराहरु नवलकिशोर उद्योग संगठन मोरङका पूर्वउपाध्यक्ष र श्रीराम कावरा सप्तरी उदोग वाणिज्य संघका पूर्वअध्यक्ष हुन् ।

प्रकाशित : वैशाख २, २०७७ १८:१४
पूरा पढ्नुहोस्
प्रतिक्रिया
पठाउनुहोस्
×