घरमै खाद्यवस्तु डेलिभरी- समाचार - कान्तिपुर समाचार
कान्तिपुर वेबसाईट
AdvertisementAdvertisement

घरमै खाद्यवस्तु डेलिभरी

राजु चौधरी

काठमाडौँ — सरकारले खाद्यवस्तुको होम डेलिभरी गर्ने व्यवस्था मिलाउने निर्णय गरेको छ । कोरोना समन्वय समितिको बुधबार बसेको बैठकले ठूला खाद्य स्टोर तथा पसलहरुले आवश्यक खाद्यवस्तुहरु होम डेलिभरी गर्ने व्यवस्था मिलाउने निर्णय गरेको हो ।

यसका लागि गृह मन्त्रालयले सीमित संख्याका सवारी साधानलाई अनुमति दिने उल्लेख छ ।


समितिको बैठकले औषधि खाद्य वस्तु, पानी, दूध, फलफुल, तरकारी, पशुपन्छी र माछाको दाना कुखुराका चल्ला ढुवानी गर्ने र फर्केर जाने सवारी साधानलाई सुचारु गर्ने पनि निर्णय गरेको छ ।


यस्ता सवारी साधानले भने यात्रु ओसारपसार गर्न पाउने छैन । स्थानीय तहले वडास्तरमा दूध, तरकारी, फलफुल लगायत अन्य खाद्यवस्तु विक्री वितरण गर्ने र ग्राहकहरुबीच भौतिक दूरी कायम हुनेगरी सञ्‍चालन गर्न सहजीकरण गर्ने पनि निर्णय भएको छ ।


यस्तै, इन्डक्सन चुल्होमा प्रोत्साहन गर्न सरकारले भन्सार महसुल छुट दिने व्यवस्था मिलाउने जनाएको छ । ‘इन्डक्सन चुल्हो प्रयोग गर्न प्रोत्साहन दिन अर्थ मन्त्रालय, ऊर्जा, जलस्रोत तथा सिचाई मन्त्रालय र उद्योग बाणिज्य तथा आपूर्ति मन्त्रालयले समन्वयगरी विद्युत महसुल र भन्सार छुट दिने व्यवस्था मिलाइने छ,’ समितिको निर्णयमा भनिएको छ ।

प्रकाशित : चैत्र १२, २०७६ १९:२३
प्रतिक्रिया
पठाउनुहोस्

एनसेलले टेरेन नियामकको निर्देशन, रिचार्जमा आधा मात्रै बोनस

सापटी रकम भने ४० देखि २ सय रुपैयाँसम्म लिन सकिने 
कान्तिपुर संवाददाता

काठमाडौँ — नियामक निकाय नेपाल दूरसञ्चार प्राधिकरणले दिएको निर्देशन विपरीत टेलिकम कम्पनी एनसेलले रिचार्जको आधा बराबार मात्रै बोनस व्यालेन्स दिने भएको छ ।

एनसेलले बुधबार विज्ञप्ती जारी गर्दै रिचार्जको आधा रकम बोनस व्यालेन्स दिने जानकारी सार्वजनिक गरेको हो ।

मंगलबार बसेको प्राधिकरणको सञ्चालक समितिको बैठकले टेलिकम कम्पनीलाई लकडाउन अवधिभरका लागि रिचार्ज बराबरकै बोनस व्यालेन्स दिन निर्देशन दिएको थियो ।

बोनस रकम एनसेल नेटवर्क भित्र कल गर्न, एसएमएस गर्न र इन्टरनेट चलाउन प्रयोग गर्न सक्ने एनसेलको विज्ञप्तीमा उल्लेख छ । व्यालेन्स रकम सोही दिनको मध्यरातसम्म सक्नुपर्ने प्रावधान रहेको विज्ञप्तीमा भनिएको छ ।

एनसेलले सापटी रकममा बृद्धि गरेको छ भने निःशुल्क व्यालेन्स सेवा दिने भएको छ । नियामक निकाय दूरसञ्चार प्राधिकरणको निर्देशनमा एनसेलले यो अफर ल्याएको हो । अर्को टेलिकम कम्पनी नेपाल टेलिकमले भने रिचार्जमा सतप्रतिशत बोनस दिने घोषणा गरेको छ ।

ब्यालेन्स ट्रान्सफर सेवा अन्तर्गत प्रिपेड ग्राहकले एनसेल नेटवर्क भित्र रहेकाहरुलाई मेन ब्यालेन्सबाट निःशुल्क रुपमा ब्यालेन्स रकम पठाउन र पाउन सक्नेछन् । ब्यालेन्स ट्रान्सफरको सिमा एक दिनमा अधिकतम ३ पटकबाट २० पटक पुर्‍याइएको एनसेलले जनाएको छ ।

प्रिपेड ग्राहकले रु १० देखि रु ५०० सम्म एनसेलको अन्य कुनै नम्बरमा ब्यालेन्स ट्रान्सफर गर्न सक्नेछन् । ब्यालेन्स ट्रान्सफरबाट प्राप्त रकमबाट ग्राहकले कल गर्न, एसएमएस पठाउन तथा इन्टरनेट चलाउन सक्नेछन् ।
त्यस्तै, एनसेल सापटी सेवा अन्तर्गतको सापटी रकमलाई बढाएको एनसेलले जनाएको छ । एनसेलका ग्राहकले विगतमा यो सेवा प्रयोग गरेको व्यवहारको आधारमा न्युनतम रु ४० देखि अधिकतम रु २०० सम्म सापटी लिन सक्नेछन् ।

प्रकाशित : चैत्र १२, २०७६ १९:१५
पूरा पढ्नुहोस्
प्रतिक्रिया
पठाउनुहोस्
×