थप एकमा देखियो कोरोना संक्रमण- समाचार - कान्तिपुर समाचार

थप एकमा देखियो कोरोना संक्रमण

बुनु थारु, अतुल मिश्र

काठमाडौँ — नेपालमा कोभिड १९ (कोरोना भाइरस) को अर्का एक जना संक्रमित भेटिएका छन् । यससँगै कोरोना संक्रमितको संख्या तीन पुगेको छ ।

बुधबार तेस्रो केस पोजेटिभ भेटिएको इपिडिमियोलोजी तथा रोग नियन्त्रण महाशाखाका एक पदाधिकारीले कान्तिपुरलाई बताए । संक्रमितको अन्य जानकारी भने खुलाइएको छैन । उनको टेकु अस्पतालमा उपचार भइरहेको छ ।


राष्ट्रिय जनस्वास्थ्य प्रयोगशालामा अहिलेसम्म ६८७ जनाको नमुना परीक्षण गरिएकोमा ६८४ को रिपोर्ट नेगेटिभ आएको छ ।


केही समयअघि चीनबाट आएका एक विद्यार्थीमा कोरोना संक्रमण देखिएको थियो । उनी अहिले उपचारपछि निको भइसकेका छन् ।


नेपालमा चैत ४ गते कतारको दोहा हुँदै नेपाल आएकी १९ वर्षीया युवतीमा संक्रमण देखिएको थियो ।


गत डिसेम्बरमा चीनकाे वुहानबाट सुरु भएकाे काेभिड-१९ का कारण अहिलेसम्म १८ हजार ९ सय १२ जनाको मृत्यु भइसकेकाे छ। त्यस्तै ४ लाख २३ हजारभन्दा बढी संक्रमित हुँदा एक लाख ९ हजारभन्दा बढी निको भएका छन्।

सम्बन्धित समाचार

फ्रान्सबाट फर्किएकी युवतीमा कोरोना : विदेशी साथीलाई संक्रमण देखिएपछि परीक्षण

प्रकाशित : चैत्र १२, २०७६ १२:४६
प्रतिक्रिया
पठाउनुहोस्

स्वास्थ्य उपकरण ल्याउन निजी क्षेत्रलाई आह्वान

कोरोना संक्रमणको त्राससँगै हाल यससँग सम्बन्धित औषधि, एन–९५ मास्क, पर्सनल प्रोटेक्ट इक्युपमेन्ट (पीपीई), आईसीयू बेड, संक्रमण टेस्ट गर्ने किटलगायत स्वास्थ्य सामग्रीहरूको अत्यधिक माग छ ।
बिनु सुवेदी, कृष्ण आचार्य

काठमाडौँ — सरकारले कोरोना भाइरस (कोभिड–१९) रोकथाम तथा उपचारमा प्रयोग हुने स्वास्थ्य उपकरणहरू अन्तर्राष्ट्रिय बजारबाट ल्याउन निजी क्षेत्रलाई आह्वान गर्दै त्यसका लागि सहजीकरण गरिदिने निर्णय गरेको छ । सरकारी सहजीकरणमा ल्याइएका सामग्री व्यापार तथा आवश्यकताअनुसार सरकारी स्वास्थ्य संस्थालाई बिक्री गर्न पाइनेछ ।

कोरोना संक्रमणको त्राससँगै हाल यससँग सम्बन्धित औषधि, एन–९५ मास्क, पर्सनल प्रोटेक्ट इक्युपमेन्ट (पीपीई), आईसीयू बेड, संक्रमण टेस्ट गर्ने किटलगायत स्वास्थ्य सामग्रीहरूको अत्यधिक माग रहेको छ । मंगलबार बसेको कोभिड–१९ रोग संक्रमण रोकथाम तथा नियन्त्रण उच्चस्तरीय समितिको बैठकले संक्रमणको रोकथाम, नियन्त्रण र उपचारका लागि आवश्यक औषधि, उपकरण तथा सामग्रीको आपूर्तिका लागि निजी क्षेत्रलाई आह्वान गर्ने निर्णय गरेको हो ।

त्यस्ता सामग्रीहरूको आपूर्ति सहज बनाउन सरकारले हवाई यातायात व्यवस्थासमेत गरिदिने अर्थ एवं सूचना तथा सञ्चार प्रविधिमन्त्री युवराज खतिवडाले बताए । यो निर्णयसँगै केही व्यापारीले त्यस्ता उपकरण ल्याउने विश्वासका साथ सरकारी स्वास्थ्य संस्थाका लागि आवश्यक सामग्रीको खरिद प्रक्रिया अघि बढाउने भएका छन् ।

‘अत्यावश्यक औषधि, उपकरण र उपचार सामग्रीको शीघ्र आपूर्ति गर्न स्वास्थ्य सेवा विभागले मंगलबार नै पुनः सूचना जारी गर्छ,’ समितिको निर्णयमा उल्लेख छ, ‘यससम्बन्धी विषयमा सम्भावित आपूर्तिकर्तासँग बुधबार नै छलफल हुनेछ र यही चैत १५ गतेभित्र आवश्यकीय सामग्री आपूर्ति गरिसकिनेछ ।’ अहिले बजारमा आवश्यक स्वास्थ्य सामग्रीहरू अन्तर्राष्ट्रिय बजारबाट आयात गरे व्यापारीहरूलाई सहजीकरण गरिदिने खतिवडाले बताए ।

‘स्वास्थ्य सेवा विभागले तय गरेको मापदण्डका आधारमा उहाँहरूले ल्याएका सामग्रीहरूको व्यापार गर्न सक्नुहुने छ,’ उनले भने । ती सामग्रीहरू आवश्यकताका आधारमा व्यापारीहरूले सरकारी स्वास्थ्य संस्थाहरूलाई पनि बिक्री गर्न सक्ने छन् । ‘त्यसका लागि निश्चित दिनभित्रमा उहाँहरूसँग स्वास्थ्य सेवा विभागले समन्वय गरेर आपूर्तिलाई व्यवस्थित गर्ने निर्णय भएको छ,’ खतिवडाले भने ।

केही दिन घिबाट नेपाली व्यापारीहरूले अन्तर्राष्ट्रिय बजारबाट त्यस्ता स्वास्थ्य सामग्रीहरू ल्याउने गृहकार्य गरिरहेका छन् । कार्गो विमान चार्टर्ड गरी ज्वरो नाप्ने थर्मल गन, अत्याधुनिक मास्क, स्यानिटाइजर र संक्रमण नफैलने पोसाक ल्याउन खोजिरहेका छन् । यसको गृहकार्यमा लागिरहेका मध्येका एक व्यापारी राजेशकाजी श्रेष्ठले सरकारको निर्णयले अब सहज भएको बताए । ‘कार्गो विमानमा पुग्ने सामान भए चार्टर गरेर ल्याउँछौं । थोरै भए चिनतर्फका नाकाबाट ल्याउने हो,’ नेपाल चेम्बर अफ कमर्सका अध्यक्षसमेत रहेका श्रेष्ठले भने, ‘सरकारले सहजीकरण गरिदिने भएपछि सजिलो र छिटो हुने भयो ।’ ती सामग्री आयातका लागि व्यवसायीहरूबीच छलफल जारी रहेको उनले बताए ।

उनीहरूले नेपालीले व्यापार गर्ने चीनको प्रमुख स्थान गोन्जाओबाट स्वास्थ्य सामग्रीहरू ल्याउने तयारी गरेका हुन् । माघ १५ गतेदेखि चीनतर्फका नाका अवरुद्ध र केही दिनयता हवाई सेवासमेत बन्द भएपछि उनीहरूले उद्योग वाणिज्य तथा आपूर्तिमन्त्री लेखराज भट्ट र कोभिड–१९ रोग संक्रमण रोकथाम तथा नियन्त्रण उच्चस्तरीय समितिलाई ती सामग्रीहरूको ल्याउन सहजीकरण गरिदिन अनुरोध गरेका थिए ।

नेपाल उद्योग वाणिज्य महासंघका वरिष्ठ उपाध्यक्ष शेखर गोल्छाले पनि स्वास्थ्य सामग्री ल्याउन धेरै व्यापारीले चासो राखिरहेको बताए । ‘मैले पनि पीपीई, किट्स र एन–९५ मास्क चीनबाट ल्याउन आफ्ना सम्बन्ध भएका संयन्त्रहरू चीनमा परिचालन गरिरहेको छु,’ उनले भने, ‘व्यापार गर्न हैन सरकार र सर्वसाधारणलाई निःशुल्क वितरणका लागि ल्याउन लागेको हुँ । यसका लागि हाम्रा साथीहरू लगानी गर्न तयार छन् ।’ सरकारको निर्णयले सेवा र व्यापार दुवै हिसाबले काम गर्नेलाई सजिलो भएको उनले बताए । त्यस्ता सामग्रीहरूको माग विश्व बजारभरि नै बढिरहेको आवश्यकताअनुसार पाउन नसकिने अनुमानसमेत व्यापारीहरूको छ । उनीहरूका अनुसार स्वास्थ्य सामग्रीका लागि सबै क्षेत्रका व्यापारीहरूको ध्यान चीनमै केन्द्रित छ ।

स्वास्थ्य सेवा विभागले केही दिनअघि त्यस्ता स्वास्थ्य सामग्री खरिदका लागि सूचना जारी गरेको जनाएको छ । नेपाली बजारमा पहिल्यै नभएको र अन्तर्राष्ट्रिय बजारबाट समेत नेपाली व्यापारीहरूले ल्याउन नसकेपछि सरकारले सहजीकरण गर्ने निर्णय गरेको हो । यो निर्णय र आवश्यक सामग्रीहरूको विषयमा व्यापारीहरूसँग बुधबार १ बजे छलफल बोलाइएको स्वास्थ्य सेवा विभागका महानिर्देशक महेन्द्रप्रसाद श्रेष्ठले बताए । ‘आवश्यक स्वास्थ्य सामग्रीबारे हामीले टेन्डर गरिसकेका छां । तर प्रस्तावहरू नै परेका छैनन्,’ उनले भने, ‘अब हामी व्यापारीहरू छलफल गर्न लागेका हौं । बुधबार दिउँसो १ बजे छलफलमा आउनू भनेर रेडियो नेपाल, गोरखापत्र अन्य सञ्चारमाध्यमबाट सूचना जारी गरेका छौं ।’

उनीहरूले गर्ने प्रस्ताव अनुसार सामग्रीबारे निर्णय हुने उनले बताए । ‘यो सरकारले खरिद गर्ने कुरा हो । हाम्रो चाहिएको सूचीअनुसार तपाई‌ंहरु कुन मूल्यमा दिन सक्नुहुन्छ भनेर आह्वान गर्नेछौं,’ उनले भने, ‘हाम्रो आवश्यकताअनुसारका सामग्री विदेशबाट भए पनि ल्याउँछौं भन्ने प्रस्ताव आयो भने ठीकै छ । नआए विकल्पहरू खोज्नेछौं ।’ धेरै व्यापारीले ल्याउँछौं भनेका तर भरपर्दो प्रस्ताव नभेटिएको उनले बताए । ‘अन्तर्राष्ट्रिय बजारबाट ल्याउन सरकारले सहजीकरणसमेत गरिदिने भनेकाले कस्तो प्रतिक्रिया आउँछ बुधबार थाहा हुनेछ,’ उनले भने ।
चीन र भारतबाट सोझै ल्याउने प्रक्रिया पनि सुरु

सरकारी तवरबाट पनि स्वास्थ्य उपकरण ल्याउने प्रक्रिया सुरु भइसकेको बताउँदै त्यसका लागि केही समय लाग्ने मन्त्री खतिवडाको भनाइ छ । ‘हामीले चीन र भारतबाट ल्याउने गरी प्रक्रिया सुरु गरेर विवरण संकलनको काम पनि भइरहेको छ,’ उनले भने, ‘सरकारी तवरबाट केही प्रक्रियागत ढिलाइ हुने भएकाले निजी क्षेत्रलाई आह्वान गरिएको हो ।’ औषधि उपकरण, तथा चिकित्सा सामग्रीहरू भारत र चीनबाट ल्याउनका लागि अर्थ र परराष्ट्र मन्त्रालयले समन्वय गरिरहेका छन् ।

प्रकाशित : चैत्र १२, २०७६ १२:४३
पूरा पढ्नुहोस्
प्रतिक्रिया
पठाउनुहोस्
×