कान्तिपुर वेबसाईट
AdvertisementAdvertisement

लकडाउनका कारण स्वाब परीक्षणमा समस्या

अर्जुन राजवंशी

बिर्तामोड — कोरोना भाइरस (कोभिड–१९) सँग मिल्दो लक्षण देखिएका व्यक्तिको ‘थ्रोट स्वाब’ को नमुना परीक्षणका लागि काठमाडौं पठाउन समस्या भएको छ । लकडाउनका कारण यातायात तथा हवाई सेवा ठप्प भएपछि शंकास्पद बिरामीको नमुना काठमाडौं पठाउन नसकिएको हो ।

गौरादहका ३७ वर्षीय एक पुरुषमा कोभिड–१९ सँग मिल्दो लक्षण देखिएको छ । उनलाई मंगलबार भद्रपुरस्थित मेची अञ्चल अस्पतालको आइसोलेसनमा राखिएको छ । यातायात सेवा ठप्प रहेकाले ‘स्वाब’ कसरी काठमाडौं पठाउने भन्ने विषयमा छलफल भइरहेको जिल्ला विपद व्यवस्थापन समितिका सचिव जीवन चम्लागाईले जानकारी दिए ।


ती पुरुष ५ दिनअघि कतारबाट घर फर्किएका थिए । उनमा ज्वरो र रुघाखोकी देखिएको छ । उनी आफै मंगलबार बिहान भद्रपुरस्थित क्वारेन्टाइनमा पुगेका थिए । ज्वरोसँगै रुघाखोकी समेत देखिएपछि उनलाई आइसोलेसन वार्डमा रेफर गरिएको क्वारेन्टाइनका हेल्थ असिस्टेन्ट मनोज भट्टराईले जानकारी दिए ।


चम्लागाईंकाअनुसार जिल्लामा ४१ जना क्वारेन्टाइनमा बसेका छन् । ५६ जना होम क्वारेन्टाइनमा रहेको चम्लागाईंले बताए । क्वारेन्टाइनमा बसेका सबै दुबई, कतार, थाइल्याण्डसहित विभिन्न देशबाट स्वदेश फर्किएकाहरु हुन् ।


यसअघि पृथ्वीनगरका एक युवक कोरोना नेगेटिभ देखिएपछि तीन दिन आइसोलेसनमा बसेर घर फर्किएका थिए । कतारबाट घर फर्किएका उनी ज्वरो देखिएपछि भद्रपुरस्थित आइसोलेसनमा बसेका थिए ।

प्रकाशित : चैत्र ११, २०७६ १६:५२

ADVERTISEMENT
प्रतिक्रिया
पठाउनुहोस्
ADVERTISEMENT

चीनबाट औषधि र सहयोग सामाग्री छिटो आइपुग्छ : ज्ञवाली

'सबै सहयोग एकैचोटी नआउने'
जगदीश्वर पाण्डे

काठमाडौँ — नेपालमा कोरोना भाइरसको संक्रमण देखिएपछि त्यसको रोकथाम र नियन्त्रणका लागि चीन सरकारले नेपाल सरकारलाई सहयोग गर्ने कुटनीतिक माध्यममार्फत् पत्र लेखेकोमा सहयोग छिटै आउने भएको परराष्ट्रमन्त्री प्रदीप ज्ञवालीले बताएका छन् ।

नेपालले पत्रसाथ आवश्यक सामाग्री, औषधि र सहयोगको सुची पनि नेपालले पठाएको छ । विदेशी मुलुकहरुबाट आवश्यक औधषि र स्वास्थ्य सामग्रीहरु ल्याउनका लागि ज्ञवालीको नेतृत्वमा एक कार्यदल समेत बनेको छ ।

ज्ञवालीले कान्तिपुरसँगको कुराकानीमा भारत र चीनसहित अन्य मुलुकबाट आवश्यक सामग्री ल्याउनका लागि पहल भइसकेको बताएका छन् । तर चीन, भारत वा अन्य मुलुकबाट कहिले कुन सामग्री नेपाल भित्रिन्छ भने हालसम्म टुंगो लागेको छैन । परराष्ट्र मन्त्री ज्ञवालीले छिटोभन्दा छिटो चीनबाट पनि आवश्यक स्वास्थ्य सामग्री नेपाल आइपुग्ने बताए ।

नेपालले चीन सरकारसँग औषधि, एन–95 मास्क, तीन थरीका पीपीई (पर्सनलप्रोटेक्ट इक्युपमेन्ट), आइसीयू बेड, कोरोना टेष्ट गर्ने किटलगायत १९ ओटा सामग्रीहरु सुची तयार पारेर बेइजिङ पठाएको छ ।

स्वास्थ्य सचिव यादव कोइरालाले स्वास्थ्य मन्त्रालयबाट आवश्यक स्वास्थ्य सामग्री
ल्याउनका लागि परराष्ट्र मार्फत पत्र पठाइसकेको बताए । नेपालस्थित चिनियाँ उच्च अधिकारीले कान्तिपुरसँगको कुराकानीमा चीन सरकार नेपाल सरकारलाई सहयोग गर्न तयार रहेको बताए पनि नेपालले माग गरेका जति स्वास्थ्य सामग्री तत्काल नै उपलब्ध हुन नसक्ने बताए ।

'हामीलाई अहिले संसारका एक सयभन्दा बढी मुलुकहरुबाट सहयोग माग भइरहेकाले गर्दा नेपालले भनेजति एकैपटक दिन सक्ने अवस्था छैन । विस्तारै सहयोग गरिरहने छौं,' ती अधिकारीले भने ।

ज्ञवालीको नेतृत्वमा रहेको कार्यदलले चीनसहित अन्य मुलुकका नेपाली राजदुत र नियोग प्रमुखहरुबाट आवश्यक स्वास्थ्य सामग्री ल्याउने विषयमा पहल गरिरहेको छ । त्यसमध्ये चीनबाट भने नेपालले स्वास्थ्य सामग्री, औषधीसहित कोरोना नियन्त्रणका अन्य उपायहरु पनि सिक्न लागेको हो ।

कोरोना भाइरस रोकथाम र नियन्त्रण गर्न चिनियाँ चिकित्सा टोलीले गत साता नेपाली स्वास्थ्य टोलीलाई भिडियो कन्फरेन्समार्फत् विभिन्न जानकारी दिएको थियो । नेपालले फेरि अन्य विषयमा पनि चीन सरकारका अनुभवप्राप्त पदाधिकारीहरुसँग कोरोना रोकथाम र नियन्त्रण गर्न भिडियो कन्फरेन्स गर्ने पहल गरिरहेको छ ।

प्रकाशित : चैत्र ११, २०७६ १६:५०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×