वीपी प्रतिष्ठानमा कोरोना परीक्षण प्रयोगशाला राखिँदै

प्रदिप मेयाङबो

सुनसरी — धरानस्थित कोइराला स्वास्थ्य विज्ञान प्रतिष्ठानमा कोरोना भाइरस (कोभिड–१९) को परीक्षण प्रयोगशाला राख्‍ने तयारी भएको छ । प्रतिष्ठानको माइक्रोबायोलोजी विभागसँग भाइरससम्बन्धी ‘मोलिकुलर एक्सपर्ट’ चिकित्सक भएकाले कोरोना परीक्षण प्रयोगशाला स्थापना गर्न लागिएको हो ।


सरकारले पनि प्रतिष्ठानमा कोरोना परीक्षण गर्नकालागि चासो देखाएपछि केही दिनयता प्रयोगशाला स्थापनाको पहल भएको प्रतिष्ठानले जनाएको छ । प्रतिष्ठानका माइक्रोबायोलोजी विभागीय प्रमुख डा बशुधा खनालले भनिन्, ‘प्रदेश र संघीय सरकारले पनि चासो दिएको र पूर्वका सर्वसाधारणकालागि कोरोनाको संक्रमण हुन नदिन र पहिचान गर्न ल्याब स्थापना गर्दा चाहिने आवश्यक उपकरण र सामाग्रीको सूचि उपकुलपति डा. गुरु खनालमार्फत पठाएका छौं ।’


प्रतिष्ठानले पहिलेदेखि नै पिसिआर (पोलिमिरेज चेन रिएक्सन) को काम हुँदै आएको छ । प्रतिष्ठानमा कोरोना परीक्षणको प्रयोगशाला सञ्चालनमा आए केन्द्रीय प्रयोगशाला टेकुको रिपोर्ट पर्खिनु नपर्ने डा खनालले बताइन् । उनले सरकारले ल्याबका लागि आवश्यक सामग्री उपलव्ध गराए केही दिनभित्रमा ल्याब सञ्चालनमा आउने बताइन् ।


प्रतिष्ठान पूर्वाधार भए पनि कोरोना परीक्षण गर्ने किट (रिएजेन्ट) रसायन, भाइरल ट्रान्सपोर्ट मिडियम सरकारले आपूर्ति गरे सहजरुपमा परीक्षण गर्न सकिने प्रतिष्ठानले जनाएको छ । कोरोना संक्रमणलाई ध्यानमा राखेर प्रतिष्ठानले यसअघि नै १० वटा आइसोलेसन बेड राखेको छ । आउँदो सोमबारदेखि पेइङ वार्डकै परिसरमा थप १० सहित २० आइसोलेसन बेड र दुई आइसियु बेड राख्‍ने प्रतिष्ठानका अस्पताल सहायक निर्देशक डा विकास साहले बताए ।

प्रकाशित : चैत्र ८, २०७६ २०:१८
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

बढी भाडा असुल्ने १७ जना पक्राउ 

मातृका दाहाल

काठमाडौँ — कोरोना भाइरसको महामारी फैलन सक्‍ने त्रासले सर्वसाधरणहरु घर फिर्ती हुन थालेपछि बढी भाडा असुल्‍ने १७ जनालाई प्रहरीले पक्राउ गरेको छ । काठमाडौं, भक्तपुर र ललितपुरका सार्वजनिक यातायातका विभिन्‍न काउन्टरबाट उनीहरुलाई महानगरीय ट्राफिक प्रहरी महाशाखाको टोलीले शनिबार पक्राउ गरेको हो ।


महाशाखाका प्रमुख एसएसपी भीमप्रसाद ढकालका अनुसार डेभिड गुरुङ, कपिल श्रेष्ठ, नरेन्द्र संग्रौला, प्रकाश भट्ट,रमेश खड्का, जारबहादुर गुरुङ, विजय गुरुङ, प्रभुराम राउत, प्रजय राई, विजय तामाङ, नील बुढाथोकी, सञ्जिव भण्डारी, प्रदीप लामा, कृष्ण माझी विनोद ठकुरी, पिन्टु जैसवाल र कमल श्रेष्ठ छन् ।

उनीहरुले टिकट काउन्टरबाट २५ देखि ३० प्रतिशतसम्म बढी भाडा असुलेका थिए । सरकारले १० गतेदेखि अर्को निर्णय नभएसम्मका लागि लामो दूरीमा चल्ने सार्वजनिक यातायात सञ्‍चालनमा रोक लगाएको छ । रोक लाग्‍नुभन्दा अगावै कोरोनाको सम्भावित त्रासले राजधानीबाट घर फर्कने मानिसको चाप ह्वात्तै बढेको छ ।

चापसँगै यात्रु ठगिने सम्भावना औंल्याएर ट्राफिक प्रहरीले सादा पोसाकका जनशक्तिलाई निगरानीका लागि खटाएको थियो । सादा पोसाकमै गएका ट्राफिकले आफैं टिकट काटेर र अडियो/भिडियो रेकर्ड गरी ठगीको सूचना संकलन गरेका थिए ।

पक्राउ परेका सबैलाई राजधानीका विभिन्‍न प्रहरी वृत्तमा ठगी कसुरमा कारबाही गर्न अनुसन्धानका लागि बुझाइएको एसएसपी ढकालले जानकारी दिए ।

प्रकाशित : चैत्र ८, २०७६ २०:१५
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×