काठमाडौँ — कोरोना भाइरस(कोभिड–१९) को प्रभावका कारण बौद्धस्थित पाँचतारे होटल हायात रिजेन्सी शनिबारदेखि अस्थायी रुपमा बन्द हुने भएको छ ।

‘अप्रिल २१ तारिख ( वैशाख ९) सम्म होटेल पूर्ण रुपमा बन्द गरिने निर्णय भएको हो,’ होटलद्वारा जारी विज्ञप्तिमा भनिएको छ । बन्दको अवधिमा होटलभित्रका रेस्टुरेन्ट, बार, क्लब सबै बन्द रहने छन् । 

२ सय ८० कोठा भएको हायातमा कम्तीमा ३ सय ५० कर्मचारी छन् । सरकारले विदेशी यात्रुको आवागमन रोकेपछि यहाँ केही एयरलायन्सका चालकदल बस्दै आएका थिए । तर, बुधबार उपप्रधानमन्त्री ईश्वर पोखरेलको संयोजकत्वमा गठित ‘कोभिड–१९ संक्रमण, रोकथाम तथा नियन्त्रण उच्चस्तरीय समन्वय समिति’ ले कोभिड-१९ प्रभावित मुलुकका नागरिकको आगमनमा प्रतिबन्ध लगाएपछि होेटल बन्द गर्ने निर्णयमा पुगेको होटलका निर्देशक सुमन श्रेष्ठले बताए ।