वुहानबाट नेपाली ल्याएकाे जहाजले नियमित उडान भर्दै- समाचार - कान्तिपुर समाचार
कान्तिपुर वेबसाईट
AdvertisementAdvertisement

वुहानबाट नेपाली ल्याएकाे जहाजले नियमित उडान भर्दै

मंगलबार राति दोहाका लागि उड्ने
रासस

काठमाडौँ — चीनको हुवान प्रान्तको वुहान सहरबाट नेपालीलाई ल्याएको राष्ट्रिय ध्वजावाहक नेपाल वायुसेवा निगमको वाइड बडी ए–३३० जहाजले मंगलबारदेखि नियमित उडान गर्ने भएको छ ।


वुहानबाट १७५ जना नेपालीलाई काठमाडौँ ल्याएको जहाजले अन्तरराष्ट्रिय सुरक्षा मापदण्डअनुरुप ४८ घण्टा क्वारेन्टाइनको समय पार गरेपछि नियमित उडानमा फर्किने भएको हो । उक्त जहाजबाट कोरोना भाइरस फैलिएको वुहानबाट गत आइतबार बिहान नेपालीलाई स्वदेश ल्याइएको थियो । जहाजको क्वारेन्टाइनको अवधि मंगलबार बिहान सकिएपछि दिउँसो सरसफाइ गरेर उडानयोग्य बनाइनेछ ।


चीनबाट नेपाली ल्याएको जहाजले मंगलबारदेखि नियमित उडान सुरु गर्ने तयारी गरेको निगमका प्रवक्ता अर्चना खड्काले जानकारी दिइन् । 'जहाजको सबै प्रक्रिया पूरा गरेर मंगलबार रातिदेखि नियमित उडानमा राखेका छौँ, जहाजको आवश्यक सरसफाइलगायत सबै मापदण्ड पूरा गरेपछि पुनः उडान सुरु गरिनेछ', उनले भनिन् ।

निगमको निर्धारित तालिकाअनुरुप जहाजले मंगलबार राति १०ः३० बजे दोहाका लागि उडान भर्नेछ । जहाजलाई विश्व स्वास्थ्य सङ्गठनको मापदण्डअनुसार सबै प्रक्रिया पूरा गरिन नियमित उडानमा ल्याउन लागिएको निगमले जनाएको छ । जहाजलाई विमानस्थलको उत्तरपूर्वतर्फको ‘रिमोर्ट पार्किङ वे’ मा राखिएको छ ।


वाइडबडी विमान दुई चिकित्सक, दुई नर्स, तीन पाइलट, सात क्रुमेकर, एक इन्जिनीयर, एक प्राविधिक र एक डिस्पास्चर गरी १७ जना सहितको टोली शनिबार चीनको वुहान गएको थियो । सो स्थानबाट १७० विद्यार्थी, दुई बालबालिका, दुई पर्यटक र एक कामदारसहित १७५ जनालाई लिएर जहाज आइतबार बिहान ३ बजेर ३६ मिनेटमा त्रिभुवन अन्तरराष्ट्रिय विमानस्थलमा अवतरण भएको थियो ।


वुहानबाट फर्किएका सबैलाई भक्तपुरको खरिपाटीस्थित नेपाल विद्युत् प्राधिकरणको तालिम केन्द्रमा निर्माण भएको क्वारेन्टाइनमा राखिएको छ भने जहाजका विमानचालक (पाइलट) सहित सबै सदस्यलाई पनि क्वारेन्टाइनका लागि नगरकोटमा राखिएको छ ।

प्रकाशित : फाल्गुन ६, २०७६ १६:४०
प्रतिक्रिया
पठाउनुहोस्

जनप्रतिनिधिलाई पुनः सुविधा दिने विधेयक सभामा पेश

घनश्याम गौतम

रूपन्देही — प्रदेश ५ सरकारले स्थानीय तहका पदाधिकारी तथा सदस्यलाई सुविधा दिने गरी प्रदेश सभामा संशोधन विधेयक पेश गरेको छ । मंगलबार बसेको बैठकमा प्रदेशका आन्तरिक मामिला तथा कानुनमन्त्री कुलप्रसाद केसीले ‘स्थानीय तहका पदाधिकारी तथा सदस्यहरुले पाउने सुविधा सम्बन्धि कानूनमा संशोधन र एकीकरण गर्न बनेको विधेयक २०७६’ पेश गरेका हुन् । 

सर्वोच्च अदालतले स्थानीय तहका पदाधिकारीको सेवा सुविधा खारेज गरिदिएपछि सरकारले शिर्षक बदलेर जनप्रतिनिधिलाई सुविधा दिन थालेको हो । संशोधन विधेयकले जनप्रतिनिधिलाई पहिलाको भन्दा पनि बढी सुविधा दिने छ ।

सरकारले पेश गरेको विधेयक अनुसार जनप्रतिनिधिले अब यातायात सुविधा, संचार सुविधा, अतिथि सत्कार, जनसम्पर्क/विशेष कायर् सुविधा, खानेपानी तथा सरसफाई, मर्मत सम्भार र विद्युत शिर्षकमा मासिक र चाडपर्व खर्चमा वार्षिक रकम पाउनेछन् । सवारी साधन उपलब्ध नभएको गाउँपालिका अध्यक्षले मासिक ३३ हजार, उपाध्यक्षका लागि मासिक ३० हजार, वडा अध्यक्षले २५, कार्यपालिका सदस्यले १७ र सभाका सदस्यले १० हजार सुविधा पाउनेछन् ।

त्यस्तै, नगरपालिका प्रमुखलाई मासिक ३८ हजार, उपप्रमुखलाई ३३ हजार सुविधा छ । वडा अध्यक्षका लागि २९, कार्यपालिका सदस्यलाई १८ र सभाका सदस्यलाई ११ हजार रुपैयाँ सुविधा तोकिएको छ । उपमहानगरमा प्रमुखलाई ४५ हजार, उपप्रमुखलाई ३९ हजार रुपैयाँ छ । वडा अध्यक्षलाई ३१, कार्यपालिका सदस्यलाई २१ र सभाका सदस्यलाई १३ हजार सुविधा छ । जिसस प्रमुखलाई ४६ हजार, उपप्रमुखलाई ४१ हजार रुपैयाँ छ । जिसस सदस्यले २१ हजार पाउनेछन् ।

सबै स्थानीय तहका अध्यक्षदेखि वडा अध्यक्षसम्मलाई सवारी साधनबापत मासिक १२ हजार रुपैयाँ सुविधा तोकिएको छ । साधन उपलब्ध नहुनेले यातायात सुविधा लिन पाउनेछन् । साधन भएका पालिकाका पदाधिकारीका लागि मासिक १ सय २० लिटर इन्धन र त्रैमासिक ५ लिटर मोबिल सुविधा छ । तर, गाउँपालिकाका वडा अध्यक्षका लागि मासिक १० हजार र नगर तथा उपमहानगरपालिकाका वडा अध्यक्षका लागि मासिक १२ हजार यातायात सुविधा उपलब्ध हुनेछ ।

संशोधन विधेयक पेश गर्दै मन्त्री केसीले मासिक सुविधा नपाएका पदाधिकारी वा सदस्यले ‘सो सुविधा नपाएको मितिदेखि’ यस ऐन बमोजिमको सुविधा पाउने बताए ।

प्रकाशित : फाल्गुन ६, २०७६ १६:२३
पूरा पढ्नुहोस्
प्रतिक्रिया
पठाउनुहोस्
×