वाइडबडी शनिबार पौने ३ बजे वुहान उड्ने- समाचार - कान्तिपुर समाचार
कान्तिपुर वेबसाईट
AdvertisementAdvertisement

वाइडबडी शनिबार पौने ३ बजे वुहान उड्ने

यो चार्टर उडानको प्रति घन्टा कम्तीमा १८ हजार डलर भाडा
सुरज कुँवर

काठमाडौँ — कोरोना प्रभावित चीनको हुबेई प्रान्तस्थित वुहान शहरमा रहेका १ सय ८० नेपाली विद्यार्थी लगायतलाई फिर्ता ल्याउन नेपाल वायुसेवा निगमको वाइडबडी विमान शनिबार दिउँसो पौने ३ बजे काठमाडौंबाट त्यसतर्फ जाने भएको छ ।

मंगलबार साँझ बसेको मन्त्रिपरिषद्ले निगमको जहाज पठाउने निर्णय गरेसँगै निगमले वुहानका लागि यो समय तालिका सार्वजनिक गरेको हो । ‘शनिबार दिउँसो पौने ३ बजे हाम्रो जहाज काठमाडौंबाट वुहान जाँदैछ,’निगमको अपरेशन विभाग प्रमुख दिपुराज जुहार्चनले भने,‘उताबाट फर्किदा राति सवा २ बजे जहाज काठमाडौं अवतरण हुनेछ ।’ उक्त विमानमा नेपाल वायुसेवा निगमका तीन जना पाइलट, ६ जना क्याबिन क्रू, १ जना इन्जिनियर, १ जना प्राविधिक, १ जना फ्लाइट डिस्प्याचर,१ जना लोड मास्टर र ४ जना नेपाली सेनाका चिकित्सक रहने छन् ।


नेपाली सेना र स्वास्थ्य मन्त्रालयका चिकित्सकले बुधबार निगमको केन्द्रीय कार्यालयमा चीन जाने टोलीसहित निगमको विमानस्थलमा रहेका कर्मचारीहरुलाई तालिम दिएका थिए । निर्देशक जुहार्चनका अनुसार, चिकित्सकहरुले परसनल प्रोटेक्टिभ इक्युभमेन्ट (पीपीई) प्रयोगबारे सिकाएका थिए । ‘के गर्ने के नगर्ने तथा पीपीई प्रयोगपछि उक्त उपकरणलाई कसरी डिस्कार्ड (स्वास्थ्यलाई असर नपर्नेगरी निस्तेज गर्ने) बारे सिकाइयो,’ उनले भने । विमानस्थलमा कार्यरत कर्मचारीलाई बिहीबार तालिम दिँइदै छ ।


उक्त उडानपछि जहाज र चालकदल लगायतका निगमका कर्मचारीलाई कति घन्टा क्वारेन्टाइनमा राख्‍नेबारे सरकारले कुनै निर्णय गरेको छैन । यसबारे विश्व स्वास्थ्य संगठनले तोकेको मापदण्ड पालना गर्नुपर्ने हुन्छ । ‘बिहीबारको मन्त्रिपरिषद्ले यसबारेको मापदण्ड पारित गरेपछि मात्रै जहाज र कर्मचारीहरुको क्वारेन्टाइनबारे एकिन भन्‍न मिल्ने छ,’ क्याप्टेन जुहार्चनले भने । स्वस्थ्य मन्त्रालयले बनाएको मापदण्ड प्रधानमन्त्री कार्यालयमा पेश भइसकेको बताइएको छ ।


निगमले सरकारले दिएको निर्देशन अनुसार, निगमको जहाज र कर्मचारीलाई वुहान पठाउन लागेको जनाएको छ । ‘यो देशका लागि गर्नुपर्ने कर्तव्य हो, कसैलाई दबाब दिएर वा अनिवार्य पठाउन लागिएको होइन,’ निर्देशक जुहार्चनले भने,‘निकट भविष्यमा सरकारले निगम र वुहान जाने पाइलट, क्याबिन क्रू, प्राविधिक लगायतका कर्मचारीको कामको मूल्यांकन गर्ने विश्वास लिएका छौं ।’


यसैबीच वुहान जाने वाइडबडी जहाजको ग्राउन्ड ह्याण्डलिंङ गर्न परराष्ट्र मन्त्रालयले त्यहाँको ग्राउन्ड एक्सप्रेस लिमिटेडलाई तोकेको छ । उक्त कम्पनीले निगमको उक्त उडानमा नेपाल आउने विद्यार्थी लगायतको ब्यागेज जहाजमा राख्‍ने, जहाजलाई अन्य प्राविधिक लगायतका काममा मद्दत गर्ने छ । यस बापत निगमले उक्त कम्पनीलाई भुक्तानी दिनुपर्ने छ ।


निगमले यसपटक गर्न लागेको यो चार्टर उडान हो । यसको भाडा निगमले प्रति घन्टा कम्तीमा १८ हजार हाराहारी डलरका दरमा लिनेछ । जहाज थप ४८ घन्टा कम्तीमा ग्राउन्डेड गरिनुपर्ने भएकाले यो दरमा निगमले थप अतिरिक्त शुल्क पनि लगाउने सक्ने एक अर्का निर्देशकले बताए ।

प्रकाशित : माघ २९, २०७६ २०:०८
प्रतिक्रिया
पठाउनुहोस्

नेकपा एमसीसी कार्यदलले माग्यो थप १० दिन 

अध्ययन गर्न र प्रतिवेदन तयार पार्न समय पुगेन : संयोजक खनाल
कान्तिपुर संवाददाता

काठमाडौँ — नेकपा केन्द्रीय समिति बैठकले गठन गरेको एमसीसी अध्ययन कार्यदलले १० दिनको समय माग गरेको छ । 

कार्यदलको १० दिने म्याद बुधबार सकिएको छ । अमेरिकी सहयोग निगमसँग भएको एमसीसी सम्झौताबारे अध्ययन गर्न गठन गरिएको वरिष्ठ नेता झलनाथ खनाल संयोजक तथा स्थायी समिति सदस्य भीम रावल र परराष्ट्रमन्त्रीसमेत रहेका प्रदीपकुमार ज्ञवाली सदस्य रहेको कार्यदलले थप अध्ययनका लागि १० दिन म्याद थपिदिन अध्यक्षद्वय केपी शर्मा ओली र पुष्पकमल दाहालसँग माग गरेका हुन् ।

म्याद थपबारे संयोजक खनालले भने, 'एमसीसीसँग गरिएको सम्झौता र यससँग सम्बन्धित विषय बुझ्नका लागि थप समय चाहिएको र प्रतिवेदन तयार पार्नुपर्ने भएकाले १० दिन म्याद थप गरिदिन माग गरेका छौं । अध्यक्षद्वयले म्याद थप्नुहुन्छ होला ।'

कार्यदलको पहिलो बैठक माघ २० गते बसेको थियो । उक्त बैठकले कुन कुन विषय अध्ययन गर्ने भन्नेबारेमा कार्यविधि तय गरेको थियो । यसबीचमा एमसीसी सम्झौताबारे कार्यदलले अमेरिकी पक्षसँग पनि छलफल गरेको थियो ।

नेपालका लागि अमेरिकी राजदूत र्‍यान्डी बेरीले नेकपाका शीर्ष नेताहरूलाई भेट गरेका थिए । गत साता नेपाल भ्रमणमा आएका एमसीसीका युरोप, एसिया, प्रशान्त र ल्याटिन अमेरिकासम्बन्धी मामिला हेर्ने सहायक उपाध्यक्ष जोनाथन ब्रुक्सले पनि प्रधानमन्त्री ‌ओली र संयोजक खनाललगायतलाई भेट गरेका थिए ।

नेकपाले एमसीसीसँग कुनै सैन्य मामिला जोडिएको छ कि छैन र नेपालको कानुनलाई कमजोर पार्ने तथा नेपालको सार्वभौमिकतालाई कमजोर पार्ने बुँदा त्यो सम्झौतामा छन् कि छैनन् भनेर अध्ययन गर्न कार्यदल गठन गरेको थियो ।

नेकपाभित्र एमसीसी सम्झौतालाई लिएर विवाद छ । प्रधानमन्त्रीसमेत रहेका अध्यक्ष केपी शर्मा ओली पक्ष उक्त सम्झौता त्यसलाई जस्ताको तस्तै पारित गर्नुपर्ने पक्षमा छ भने केही शीर्ष नेताहरू त्यसमा संशोधन हुनुपर्ने भन्दै आएका छन् । भीम रावल लगायतका नेताहरू एमसीसी खारेज गर्नुपर्ने बताउँदै आएका थिए ।

प्रकाशित : माघ २९, २०७६ २०:०४
पूरा पढ्नुहोस्
प्रतिक्रिया
पठाउनुहोस्
×