कांग्रेस केन्द्रीय समितिले भन्यो- गच्छदारको मुद्दालाई राजनीतिक र कानुनी रूपमा सामना गर्छौं- समाचार - कान्तिपुर समाचार
कान्तिपुर वेबसाईट
AdvertisementAdvertisement

कांग्रेस केन्द्रीय समितिले भन्यो- गच्छदारको मुद्दालाई राजनीतिक र कानुनी रूपमा सामना गर्छौं

संसद अवरोधबारे संसदीय दलले नै निर्णय गर्ने
कान्तिपुर संवाददाता

काठमाडौँ — ललिता निवासको सरकारी जग्गा हिनामिना प्रकरणमा अख्तियार दुरुपयोग अनुसन्धान आयोगले पार्टी उपसभापति तथा संसदीय दलका उपनेता रहेका विजयकुमार गच्छदारविरुद्ध दायर मुद्दाको कानुनी र राजनीतिक रूपमा सामना गर्ने कांग्रेस केन्द्रीय समितिले निर्णय गरेको छ ।

नेपाली कांग्रेस केन्द्रीय कार्यसमितिको सोमबार बसेको बैठकमा उपसभापति गच्छदारलाई लागेको मुद्दामाथि राजनीतिक र कानुनी दुवै ढंगले सामना गर्ने विषयमा छलफल भएको प्रवक्ता विश्वप्रकास शर्माले जानकारी दिए ।


उनले बलुवाटारस्थित ललिता निवासको जग्गा प्रकरणमा अख्तियार सरकारको छाँया बनेको निष्कर्श कांग्रेसको रहेको समेत बताए । भ्रष्टाचार निवारण ऐन, २०५९ अनुसार मन्त्रिपरिषद्‌बाट भएको नीतिगत निर्णयमा मन्त्रीलाई तान्‍न नमिल्ने भएकाले कांग्रेसले राजनीतिक रूपमा समेत सामना गर्ने उनले बताए ।


संसदको अवरोध जारी राख्‍ने कि खोल्ने भन्‍नेबारेको निर्णय संसदीय दलले नै लिने पनि शर्माले बताए । संसदीय दलले आवश्यकताअनुसार मंगलबार निर्णय गर्नेसमेत उनले जानकारी दिए । कांग्रेस मंगलबार बिहान साढे १० बजे संसदीय दलको बैठक बोलाएको छ ।


केपी शर्मा ओलीको नेतृत्वमा सरकार गठन भएको दुई वर्ष पुरा हुने र यो अवधिमा सरकारले ल्याएका विधेयक, गरेका प्रतिशोधपूर्ण व्यवहार, शान्ति सुरक्षाको स्थिति र भ्रष्टाचारको विषय कारबाही गर्ने नाउँमा उन्मुक्ति दिँदै संस्थागत ढंगले संरक्षण गरेको निष्कर्ष निकालेको प्रवक्ता शर्माले बताए ।

प्रकाशित : माघ २७, २०७६ २०:००
प्रतिक्रिया
पठाउनुहोस्

समाजवादमा अगाडि बढ्यौं तर सबैका चाहना समेट्न सकिएन : दाहाल

कान्तिपुर संवाददाता

काठमाडौँ — सत्तारुढ नेकपाका अध्यक्ष अध्यक्ष पुष्पकमल दाहालले मुलुक समाजवादको युगतर्फ अगाडि बढेको भएपनि सबैका भावना र चाहना समेट‍्न नसकिएको बताएका छन् ।

सोमबार काठमाडौंमा आयोजित एक कार्यक्रममा दाहालले नयाँ व्यवस्था ल्याउन सबै जातजाति, भाषाभाषी र संस्कृतिका समुदायको योगदान बराबर भएपनि अझै सबैका भावना र चाहना समेट्‍न नसकिएको बताएका हुन् ।

देश संघीय लोकतान्त्रिक गणतन्त्रको युगमा भएपनि संविधानमा अझै समानता,समावेशीताका माग पुरा हुन नसकेको दाहालले बताए ।संघीय लोकतान्त्रिक गणतन्त्रको युगमा हामी छौं । यो संघीय लोकतान्त्रिक गणतन्त्रमा धर्म निरपेक्षता, समावेशीता, समानुपातिकताको जुन स्तरमा हामी आइपुगेका छौं । यद्यपी सबैको भावनाहरू सबैका चाहनाहरू त्यसमा समेटिइसके, पूर्ण भइसक्यो भन्ने दाबी हाम्रो छैन,' उनले भने,'हाम्रो संविधानले पनि यसको परिमार्जनको, विकासको आवश्यकता स्वीकार गरेको छ । तर पनि फेरी सामन्तवादी युगबाट समाजवादको युगतिर जाने प्रकृयामा हामी छौं ।

देशमा राजनीतिक परिवर्तन ल्याउन सबै जातजाति, भाषाभाषी, सांस्कृतिक समुदायको योगदान समान हुनु खुसी र गौरवको कुरा भएको दाहालले बताए । विश्वमा अहिलेसम्म सगरमाथाको देश, बुद्ध जन्मेको देश भनेर चिनिने गरेकोमा अब विकास र समृद्धि, समाजवाद र सामाजिक न्यायको यात्रामा पनि नेपाललाई उँचो ठाउँमा पुर्‍याउन सम्भव रहेको उनले बताए ।

प्रकाशित : माघ २७, २०७६ १९:३१
पूरा पढ्नुहोस्
प्रतिक्रिया
पठाउनुहोस्
×