कोरोना भाइरस मानिसमा प्रवेश गरेको १० दिनभित्र देखिन्छ लक्षण

अतुल मिश्र

काठमाडौँ — चीनबाट विश्वव्यापी भएको निमोनिया उत्पन्न गराउने नोवल कोरोना भाइरस मानिसको शरीरमा प्रवेश गरेको २ देखि १० दिनभित्र लक्षण देखिन सक्ने प्रारम्भिक अनुमान गरिएको छ ।

ZenTravel

विश्व स्वास्थ्य संगठन (डब्लूएचओ) को मुख्यालयका अनुसार यो भाइरसको ‘इन्क्युवेसन पिरियड’ २ देखि १० दिनसम्म हुन सक्छ । यो भाइरसबारे अझ बढी तथ्यांक र संक्रमित व्यक्तिहरूको विस्तृत इपिडिमियोलजिकल जानकारी उपलब्ध भएपछि मात्रै लक्षण देखिने समयबारे परिष्कृत अनुमान गरिनेछ ।

संक्रमित बिरामीले खोक्दा र हाच्छिउँ गर्दा मुखबाट निस्किने पानीका स–साना थोपा (ड्रप्लेट) का माध्यमबाट अन्य व्यक्तिको शरीरमा यो भाइरस पुग्न सक्ने समयबारे जान्नु नियन्त्रणको प्रयासका लागि महत्त्वपूर्ण रहेको शुक्रराज ट्रोपिकल तथा सरुवा रोग अस्पतालका निर्देशक एवं भाइरोलजिस्ट डा. वासुदेव पाण्डे बताउँछन् । शरीरमा यसको संक्रमण भए पनि लक्षण नदेखिने व्यक्तिबाट वा ‘इन्क्युवेसन अवधि’ (शरीरमा किटाणु पुगेपछि लक्षण देखिने अवधि) मा रहेका व्यक्तिबाट अन्य व्यक्तिमा रोग सर्न सक्ने अवधिबारे विशेषज्ञहरूले अध्ययन गरिरहेका छन् ।

के हो नोवल कोरोना, कसरी बच्‍ने?

नोवल कोरोना भाइरसको प्रकोपको स्रोत र चीनमा यसको फैलावटबारे अझैसम्म ज्ञात हुन सकेको छैन । डब्लूएचओको पछिल्लो जानकारीअनुसार हालसम्म रिपोर्ट गरिएका अधिकांश केसमा करिब २० प्रतिशतले गम्भीर बिरामीको सामना गर्नुपरेको छ । धेरैजसोमा हल्का रोग देखिएको छ भने करिब २० प्रतिशतमा निमोनिया, श्वासप्रश्वासको विफलता र केही अवस्थामा मृत्युसमेत देखिएको छ । यसअघि गत बिहीबार डब्लूएचओले आकस्मिक समितिको बैठकपछि गरेको पत्रकार सम्मेलनमा करिब २५ प्रतिशतले गम्भीर बिरामीको सामना गर्नुपरेको जनाएको थियो ।

हालसम्म यो भाइरसले उच्च रक्तचाप, मधुमेह, मुटु र रक्तनलीसम्बन्धी रोगलगायत शरीरको प्रतिरक्षा प्रणाली कमजोर भएकालाई बढी सताएको छ । डा. पाण्डेका अनुसार डब्लूएचओले एक व्यक्तिबाट अर्को व्यक्तिमा संक्रमण सर्ने प्रक्रियालाई सीमित बनाउने रणनीति लिएको छ । विश्वभरि नै यही रणनीतिअन्तर्गत संक्रमित बिरामीलाई छुट्टै राखेर उपचार गरिएको छ ।

प्रकाशित : माघ १६, २०७६ ०७:१६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

कोरोना भाइरसको प्रकोप : प्रधानमन्त्रीको स्वास्थ्यमा थप सजगता

अतुल मिश्र

काठमाडौँ — प्रधानमन्त्री केपी शर्मा ओलीको स्वास्थ्य सुरक्षा बढाइएको छ । निमोनिया गराउने नोवल कोरोना भाइरसको प्रकोप विश्वव्यापी फैलिन थालेपछि प्रधानमन्त्रीको स्वास्थ्यमा थप सतर्कता अपनाइएको बालुवाटार स्रोतले जनाएको छ । 

यसअघि पनि मौसमी रुघाखोकीका बेला ओलीको स्वास्थ्य सुरक्षामा सतर्कता अपनाउने गरिएको थियो । ‘नयाँ भाइरसको विस्तारलाई हेरेर अहिले हाम्रो प्रधानमन्त्री मात्र नभई भारत, अमेरिका, चीनलगायतका राष्ट्र र सरकार प्रमुखको स्वास्थ्य सुरक्षामा सतर्कता अपनाइएको छ,’ प्रधानमन्त्रीको उपचारमा संलग्न एक चिकित्सकले भने, ‘हाम्रा प्रधानमन्त्रीको शरीरको प्रतिरक्षा प्रणाली कमजोर भएकाले थप स्वास्थ्य सुरक्षा चाहिन्छ ।’ १३ वर्षअघि मिर्गौला प्रत्यारोपण गरिएपछि प्रधानमन्त्री ओलीलाई रुघाखोकीलगायतका विभिन्न खाले मौसमी संक्रमणबाट बचाउन चिकित्सकले सतर्कता अपनाउँदै आएका छन् ।

मिर्गौलामा पुनः समस्या देखिएपछि प्रधानमन्त्री ओली करिब सात महिनादेखि उपचारका क्रममा छन् । उनको नियमित डायलसिस हुँदै आएको छ । प्रधानमन्त्री ओलीलाई मौसमी रुघाखोकी (इन्फ्लुएन्जा) र निमोनियाविरुद्धको खोप निरन्तर लगाइँदै आएको छ । धेरै समय अघिदेखि प्रधानमन्त्रीलाई भेट्न जानेले हातमा स्यानिटाइजर लगाउनुपर्छ । नोवल कोरोना भाइरसको प्रकोप देखिएपछि हाल स्यानिटाइजर लगाउनुपर्ने प्रक्रियामा थप कडाइ गरिएको छ ।
प्रधानमन्त्रीलाई सम्भावित संक्रमणबाट जोगाउन रुघाखोकी र ज्वरो आएका व्यक्तिलाई बालुवाटारस्थित निवास वा निकट सम्पर्कमा बस्न दिइँदैन । ‘रुघाखोकीलगायतका लक्षण भएका सुरक्षाकर्मी त के कोही पनि प्रधानमन्त्री ओली नजिक बस्न पाउँदैनन्,’ प्रधानमन्त्रीका निजी चिकित्सक डा.दिव्यासिंह शाहले भनिन्, ‘त्यस्तो बेला म पनि प्रधानमन्त्रीको नजिक जान्नँ ।’

पछिल्लो समय चीन गएर फर्केको स्वस्थ व्यक्तिसँग भेट्दासमेत प्रधानमन्त्रीले एक मिटरको दूरी कायम गर्दै उचित स्वास्थ्य सुरक्षाको उपाय अपनाउनु आवश्यक हुने एक वरिष्ठ मिर्गौला रोग विशेषज्ञले बताए । उनका अनुसार नोवल कोरोना भाइरसको सम्पर्कमा आएका व्यक्तिहरूमा इन्क्युबेसन पिरियड (शरीरमा कीटाणु प्रवेश गरेपछि लक्षण देखिन लाग्ने समय) ले गर्दासमेत तत्काल लक्षण नदेखिएको हुन सक्छ ।

प्रकाशित : माघ १५, २०७६ ०८:२२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×