कोरोना भाइरस : वुहानबाट विभिन्न देशले आफ्ना नागरिकको उद्धार गर्न सुरु गरे- विश्व - कान्तिपुर समाचार
कान्तिपुर वेबसाईट
AdvertisementAdvertisement

कोरोना भाइरस : वुहानबाट विभिन्न देशले आफ्ना नागरिकको उद्धार गर्न सुरु गरे

एजेन्सी

काठमाडौँ — विश्वका विभिन्न देशले नोवल कोरोना भाइरसको संक्रमणको केन्द्र मानिएको चिनियाँ सहर वुहानबाट आफ्ना नागरिकलाई उद्धार गर्न थालेका छन् । पछिल्लो जानकारीअनुसार अस्ट्रेलियाले आफ्ना ६०० जना नागरिकलाई वुहानबाट उद्धार गरी क्रिस्मस आइल्यान्डमा दुई हप्तासम्म क्‍वारेन्‍टाइनमा राख्ने भएको छ ।

यस्तै जापान, अमेरिका तथा ईयूका देशले पनि आफ्ना नागरिकहरुलाई उद्धार गर्न सुरु गरिसकेको छ ।


अस्ट्रेलियाका प्रधानमन्त्री स्कट मोरिसनले आफ्ना नागरिकहरुलाई वुहानबाट उद्धार गरी क्रिस्मस आइल्यान्डमा दुई हप्ता राख्ने जानकारी दिएका हुन् । त्यहाँ एक हजारजनालाई राख्न सकिने पूर्वाधार रहेको बताइएको छ । यस्तै न्यूजिल्याण्डले पनि अस्ट्रेलियासँग सहकार्य गरेर आफ्ना ५३ जना नागरिकलाई त्यहाँबाट उद्धार गर्नका लागि प्रयास अगाडि बढाएको छ ।


कोरोना भाइरस प्रकोप : मृतकको संख्या १३२ पुग्यो, ६ हजार संक्रमित


भारतले पनि हुबेई प्रान्तबाट आफ्ना २५० नागरिकको उद्धार गर्ने प्रक्रिया अगाडि बताएको छ । भारतीय विदेश मन्त्रालयका प्रवक्ता रविस कुमारले मंगलबार आयोजित पत्रकार सम्मेलनमा सो जानकारी दिएका हुन् । यस्तै मलेसियाका प्रधानमन्त्री मोहम्मद महाथिरले पनि आफ्ना नागरिकहरुको उद्धार गर्नका लागि चीन सरकारसँग छलफल अगाडि बढाइएको बुधबार जनाकारी दिएका छन् ।


जापानले यसअघि नै २०० जना आफ्ना नागरिकलाई उद्धार गरी टोकियो लगिसकेको छ । यस्तै थप ६५० जनालाई उद्धार गर्नका लागि विमान पठाउने तयारी गरिरहेको छ । उद्धार गरिएका सबैलाई अस्पताल लगेर परिक्षण गरिने र क्‍वारेन्‍टाइनमा राखिने बताइएको छ ।


कोरोना संक्रमणको केन्द्र वुहानमा रहेका नेपाली भन्छन्- ‘हाम्रो उद्धार गर्नुपर्‍यो’


अमेरिकाले पनि त्यहाँको कन्‍सुलेटमा कार्यरत आफ्ना कर्मचारी तथा केही नागरिक गरी २०० जनाको उद्धार गरेको छ । उनीहरुलाई दुई हप्ता विमानस्थलको ह्यांगरमा नै बनाइएको अस्थायी क्‍वारेन्‍टाइनमा राखिने सीएनएनले बताएको छ । यस्तै बेलायतले पनि आफ्ना २०० नागरिकलाई त्यहाँबाट उद्धार गर्नका लागि प्रक्रिया अगाडि बढाएको छ । वुहानबाट फर्कन चाहिरहेका बेलायतीहरुलाई सरकारले वेवास्ता गरेको आरोप पनि लागेको छ ।


यस्तै ईयूका नागरिकहरुको उद्धारका लागि पनि दुईवटा विमानको व्यवस्था गरिएको छ । जसबाट २५० फ्रान्सेली नागरिक स्वदेश फिर्ता हुन लागेको बताइएको छ । दक्षिण कोरियाले पनि चारवटा विमानबाट आफ्ना ७०० जना नागरिकलाई यसै साता वुहानबाट उद्धार गर्न लागेको बताएको छ ।


चीनले वुहान सहरलाई जेनेवरी २३ तारिखदेखि पूर्ण रुपमा 'लकडाउन' गरेको छ भने । हुबेइ प्रान्तका अन्य सहरहरु पनि लकडाउन गरिएका छन् ।


चिनियाँ राष्ट्रपति सी चिनफिङले नोवल कोरोना भइरसलाई 'राक्षस'को संज्ञा दिँदै चीनले यसलाई जसरी पनि परास्त गर्ने बताएका छन् । चिनियाँ राष्ट्रिय स्वास्थ विभागले फैलिएको संक्रमण उत्कर्षमा पुग्न अझै १० दिन लाग्ने बताएको छ ।


चीनमा भाइरसको संक्रमणका कारण मर्नेको संख्या १३२ पुगेको विभागले बुधाबार जनाएको छ । भाइरस गैरकानुनी रुपमा वन्यजन्तुको कारोबार हुने वुहानको माछा बजारबाट सुरु भएको अनुमान गरिएको छ । स्वासप्रस्वासमा गम्भिर असर पुर्‍याउने यस संक्रमणको हालसम्म कुनै औषधि वा भ्याक्सिन विकास भइसकेको छैन ।


चीनमा संक्रमणले उग्र रुप लिएसँगै अमेरिकी कफीको चेन 'स्टारबक्स'ले त्यहाँ रहेका आफ्ना २ हजार क्याफेलाई बन्द गर्ने निर्णय गरेको छ ।

प्रकाशित : माघ १५, २०७६ १२:४५
प्रतिक्रिया
पठाउनुहोस्

'म्याट्रिक्स ४' मा प्रियंका चोपडा

एजेन्सी

बलिउड अभिनेत्री प्रियंका चोपडाले पछिल्लो समय आफूलाई हलिउडमा पनि स्थापित गराएकी छिन् । अमेरिकन टेलिभिजन सो 'क्वान्टिको'बाट चर्चा कमाएकी उनले हलिउड फिल्म 'बेवाच'मा ड्‌वेन जोनसनसँग स्क्रिन सेयर गरेकी थिइन् । त्यसपछि प्रियंकाले 'अ किड लाइक जेक' र 'इजन्ट इट रोमान्टिक'लगायतका हलिउड फिल्ममा अभिनय गरिन् ।

गायक निक जोनससँग बिहे गरेपछि हलिउडमा प्रियंकाको छुट्टै चर्चा छ। अब प्रियंका हलिउडको लोकप्रिय मानिने 'म्याट्रिक्स'को फ्रेन्चाइजमा देखिने भएकी छिन्। 'म्याट्रिक्स'को चौथो श्रृङ्खलामा उनी अनुबन्धित भएकी हुन् ।

'म्याट्रिक्स' श्रृंखलाका अन्य फिल्मजस्तै यसमा पनि एक्सन स्टार केनु रिब्स मूख्य भूमिकामा हुनेछन् । लाना वाच्वस्कीले निर्देशन गर्ने फिल्म आगामी मे २१ मा प्रदर्शनमा आउने भएको छ ।

पछिल्लो समय बलिउड फिल्म 'स्काई ईज पिंक'मा देखिएकी प्रियंकाका हातमा यो वर्ष नेट्फ्लिक्सका दुई प्रोजेक्ट 'द ह्वाइट टाइगर' र 'वी क्यान बि हिरोज' छन् ।

अमेजनको रियालिटी सिरिजमा उनी पति निकसँग देखिँदैछिन् । मेन्डी केलिङले निर्देशन गर्ने बायोपिक फिल्ममा पनि उनको अभिनय रहने बताइएको छ ।

प्रकाशित : माघ १५, २०७६ १२:३०
पूरा पढ्नुहोस्
प्रतिक्रिया
पठाउनुहोस्
×