काठमाडौँ — नेपाल अटोमोबाइल इम्पोर्टर्स एन्ड म्यानुफ्याक्चर्स एसोसिएसन (नाइमा)ले आयोजना गर्ने नाइमा नेपाल मोबिलिटी एक्स्पोमा ३५ वटा नयाँ सवारीसाधन सार्वजनिक गरिने भएको छ ।

साउन २१ देखि २५ गतेसम्म काठमाडौंको भृकुटीमण्डपमा हुने एक्स्पोमा ५० भन्दा बढी अटोमोबाइल ब्रान्डको सहभागिता रहने आयोजकले जानकारी दिएको छ । 

सोमबार सोल्टी होटलमा आयोजित पत्रकार सम्मेलनमा नाइमाका कार्यकारी निर्देशक राजकुमार दुलालले सम्पूर्ण तयारी पूरा भइसकेको बताए । कार्यक्रममा अटो एक्स्पो समिति प्रमुख शिरीषकुमार मुरारकाले यसपटकको एक्स्पो राजधानीको केन्द्रमा रहेको भृकुटीमण्डपस्थित प्रदर्शनी स्थलमा आयोजना हुने बताए । उनले मेलाको भौतिक पूर्वाधार सबैको पहुँचयोग्य र अपाङ्गमैत्री हुने बताए । 

यसपटक प्रदर्शनीमा १५ वटा दुई पाङग्रे, १५ वटा चार पाङग्रे र ५ वटा व्यावसायिक गाडी सार्वजनिक गरिने छ । विद्युतीय सवारीसाधनदेखि नवीनतम मोबिलिटी समाधानहरू प्रदर्शनीमा प्रस्तुत गरिने अटो एक्स्पो समितिका सदस्य गौरव सारडाले बताए । 

प्रदर्शनीलाई लक्षित गरी नाइमाले विशेष अनलाइन भिडियो प्रतियोगिता पनि सार्वजनिक गरेको छ । प्रतियोगितामा २१ साउनसम्म सामाजिक सञ्जालमा अपलोड गरिएका उत्कृष्ट भिडियोलाई १ लाख पुरस्कार प्रदान गरिनेछ भने श्रावण २१ देखि २५ भित्र अपलोड भएका १० वटा उत्कृष्ट भिडियोलाई जनही १० हजार पुरस्कार दिइनेछ ।