जनकपुर — निर्वाचन आयोगले धनुषा निर्वाचन क्षेत्र नं. १ मा नेपाली कम्युनिस्ट पार्टी (नेकपा)का उम्मेदवार मातृकाप्रसाद यादवलाई विजयी भएको भन्दै प्रमाणपत्र वितरण गरेको छ ।

सोमबार अबेर साँझ आयोगको निर्देशन बमोजिम यादवलाई विजयी भएको भन्दै प्रमाणपत्र दिइएको हो । सर्वोच्च अदालतले धनुषा निर्वाचन क्षेत्र नं १ को मत परिणाम घोषणा नगर्न आदेश दिँदै अर्को पेसी फागुन २९ गतेका लागि तोके पनि निर्वाचन आयोगको निर्देशन अनुसार विजेता घोषणा गरिएको छ ।

धनुषाको निर्वाचन क्षेत्र नं. १ मा प्रत्यक्षतर्फको मतगणना आइतबार राति नै सकिए पनि अहिले मत परिणाम घोषणा गरेर यादवलाई विजयीको प्रमाणपत्र दिइएको छ ।

राष्ट्रिय स्वतन्त्र पार्टी(रास्वपा)का उम्मेदवार किशोरी साहको उम्मेदवारी निर्वाचनको दुई दिनअघि खारेज भएपछि विवाद चुलिएको छ । उम्मेदवारी खारेज भएका रास्वपाको उम्मेदवार साहलाई घण्टी चुनाव चिह्नमा परेको मतसमेत गनेर गोप्य लगत राखिएको छ ।