रूपन्देही — लुम्बिनी प्रदेशस्थित निरन्तर बैठक र आन्तरिक छलफल गरिरहेका सत्तापक्षीय गठबन्धन दलहरूबीच शनिबार बिहानसम्म पनि सहमति जुट्न सकेको छैन । पाँच दलीय गठबन्धनबीच पाँच दिनदेखि निरन्तर छलफल जारी छ ।

प्रदेशका १ सय ९ स्थानीय तहमध्ये चार उपमहानगरपालिकामा केन्द्रबाटै सहमति भएको छ । त्यसमा पनि तुलसीपुर उपमहानगरपालिकामा स्थानीयस्तरमा समस्या देखिएको छ । प्रमुख कांग्रेसले लिएर उपप्रमुख नेकपा एसलाई दिने सहमति भएको थियो । तर, अन्य दलले १५ वटा वडा दाबी गरेपछि त्यसकै आधारमा सहमति गर्न नसक्ने भन्दै कांग्रेस नगरसमितिले निर्णय नै गरेर जिल्ला समितिमा जानकारी गराएको छ ।

लुम्बिनी प्रदेशका १ सय ९ स्थानीय तहमध्ये कांग्रेसले ७५ वटामा दाबी गर्दै आएको थियो । त्यस्तै यसअघि आफूले जितेका १९ र दोस्रो स्थानमा रहेका पालिकासहित ३५ देखि ४० वटा वडामा माओवादी केन्द्रको दाबी रहँदै आएको थियो ।

नेकपा एकीकृत समाजवादीले भने एमालेले जितेका ४३ मध्ये आधामा दाबी गर्दै आएको छ । जनता समाजवादीले पहाडी जिल्लामा कम्तीमा ६ उपप्रमुख र दाङका १० स्थानीय तहमध्ये एक र बाँकेको नेपालगञ्ज उपमहानरपालिकामा प्रमुखसहित २२ पालिकाको प्रमुख र २५ पालिकामा उपप्रमुख पाउनु पर्ने दाबी गरेको छ । जनमोर्चाले आफूले जितेका दुई पालिकामा प्रमुख र दोस्रो स्थानमा रहेका ४ मा उपप्रमुख मागेको छ ।

यस्तैमा नेपाली कांग्रेसले सबै दलको अस्वाभाविक दाबीले सहमतिमा पुग्न नसकिएको नेपाली कांग्रेसको भनाइ छ । कांग्रेस प्रदेश उपसभापति भुवनप्रसाद श्रेष्ठका अनुसार अहिलेसम्म गुल्मी र प्यूठानमा मात्रै तालमेल मिलेको छ।

गुल्मीमा ८ पालिका प्रमुख कांग्रेसले लिएर ४ पालिका प्रमुख माओवादीलाई छोडेको छ । तर, वडास्तरमा सहमति हुन नसक्दा गठबन्धन अन्योलमै छ । रूपन्देही, बर्दिया, रोल्पा, पश्चिम नवलपरासी र कपिलवस्तुमा विवाद कायमै छ । अर्घाखाँचीमा पनि पालिका प्रमुख/उपप्रमुखमै टुंगो लागेको छैन । रूपन्देहीको सम्मरीमाईमा कांग्रेस र जसपाको दाबीले अड्किएको छ । ओमसतियामा माओवादी र जसपाको दाबी छ ।

‘अर्को दलले जितेको स्थानमा पनि गठबन्धनका नाममा दाबी गर्न थालेपछि बढी समस्या देखिएको छ,’ श्रेष्ठले भने, ‘त्यसमा जसपा र नेकपा एस बढी आकांक्षी बन्दा गठबन्धन नै भद्रगोल हुने स्थिति बन्दैछ ।’

यद्यपि कार्यदलले तयार गरेको प्रतिवेदन प्रदेश स्तरीय संयन्त्रमा पेस गरेको र त्यसमा सम्बन्धित जिल्लाबाट आएका सुझावका आधारमा संयन्त्रले शनिबार साँझसम्म निर्णय लिने श्रेष्ठले बताए ।

प्रदेश स्तरका बैठकबाट पाँच दलीय संयन्त्रले टुंगो लगाउन नसकेपछि सहमति जुटाउन गठबन्धनबाटै ५ सदस्यीय कार्यदल गठन भएको थियो । त्यसमा कांग्रेस उपसभापति भुवन श्रेष्ठ, माओवादी केन्द्रका तुलाराम घर्ती, एकीकृत समाजवादीका मेटमणि चौधरी, जसपाका यज्ञ पोखरेल र जनमोर्चाका तेजनाथ आचार्य थिए । 

उनीहरुको कार्यदलले पनि बिहीबार नै प्रतिवेदन बुझाएको थियो । त्यही प्रतिवेदनलाई आधार बनाएर शुक्रबार दिनभर छलफल भए पनि निश्कर्ष विहीन भएको माओवादीका तुलाराम घर्तीले बताए ।