रुकुम पूर्व — धर्मकुमारी विकले भेडाको ऊन कात्दैछिन् । ऊन र त्यसबाट बन्ने अरु काममा उनको व्यस्तता छ । उनका हात ऊन कात्न र त्यसबाट अरु सामग्री बनाउनमै व्यस्त छन् । भक्त विकका हात चोयामा व्यस्त छन् । निगालोका चोया कारेर डोका बुन्ने, काठे बुन्ने काममा भक्तका हात चलिरहेका छन् ।

रक्ष विक पनि केही दिनदेखि नियमित हात चलाइरहेका छन् । निगालोबाट चोया बनाउने, चोयाका विभिन्न घरायसी सामग्री निर्माणमा रक्ष पनि व्यस्त छन् । धर्मकुमारी, भक्त र रक्ष लकडाउनको पालन गर्दै घरमा बसेर यो हातको काम गरिरहेका भने होइनन् । क्वारेन्टाइनमा बसेर यसरी काम गर्ने यी तीन जना मात्रै पनि होइनन् । भूमे गाउँपालिका–१, को सिद्धचौर माविमा बनाइएको क्वारेन्टाइनमा बसेकाहरुले क्वारेन्टाइन समयलाई यसरी उपयोग गरिरहेका छन् । 

कोरोना भाइरस (कोभिड–१९) रोकथाम तथा नियन्त्रणका लागि लकडाउन भएपछि विभिन्न ठाउँमा रोकिएकाहरु गाउँ फर्केका छन् । गाउँ फर्केकाहरु क्वारेन्टाइनमा छन् । त्यसमध्ये यो विद्यालयका ३० जनाले नै क्वारेन्टाइन समयलाई उपयोग गरिरहेका छन् । क्वारेन्टाइनमा १६ पुरुष र १४ जना महिला छन् । २० जना दाङबाट, ६ जना पोखरा र ४ जना बाग्लुङबाट आएका हुन् । पुरुषले निगालोबाट बन्ने घरायसी सामग्री बनाइरहेका छन् भने महिलाले ऊन कात्नेदेखि ऊनबाट बन्ने सामग्री बनाइरहेको क्वारेन्टाइनमा रहेकी ज्ञानु पुन मगरले जानकारी दिइन् । निगालोको चोयाबाट डोको, काठे लगायतका सामग्री बनाइरहेका छन् भने ऊनका स्वीटर, टोपी, मोजा, घुम, बाकु (बुकु), झोला लगायतका सामग्री तयार भइरहेको पुनले बताइन् । त्यसको साथै क्वारेन्टाइन नजिक बारी रहेका केहीले भने गहुँ तथा जौं टिप्ने काम समेत गरिरहेका छन् । परिवारका अरु सदस्यलाई गहुँ, जौं काटेर ल्याउने लगाउने र आफूले बाला टिप्ने काममा सघाइरहेका छन् ।