पाल्पाको रम्भामा अझै सुरु भएन मतगणना- स्थानीय तह निर्वाचन २०७९ - कान्तिपुर समाचार

पाल्पाको रम्भामा अझै सुरु भएन मतगणना

माधव अर्याल

पाल्पा — पाल्पाको रम्भा गाउँपालिकामा वैशाख ३१ गते अपराह्नदेखि स्थगित मतगणना शुक्रबार मध्याह्नसम्म सुरु हुन सकेको छैन । बिहान ७ बजेबाट मतगणना सुरु गर्ने भनिए पनि अझै सुरु भएको छैन ।

सर्वदलीय बैठक बसेर गणना भएको रम्भा-५, ताँहुको मतपत्र, सीसीटीभी फुटेज, मतपत्रका अर्धकट्टी छानबिनलगायत काममा भएको ढिलाइले गर्दा मतगणनाकार्य अझै सुरु हुन नसकेको हो ।

रम्भामा खटिएका निर्वाचन अधिकृत कृष्णप्रसाद भण्डारीले बिहीबार बेलुकीदेखि नै मोबाइल फोन उठाएका छैनन् । राजनीतिक दलहरूले दिएको जानकारीअनुसार छानबिनको क्रम अझै जारी छ । ‘अनुसन्धानको काम भइरहेकाले मतगणना अझै सुरु हुन सकेको छैन,’ एमालेका रम्भा गाउँपालिका सचिव विजय रानाभाटले भने, ‘पहिला छानबिनको काम सकिएपछि बल्ल निर्णय हुन्छ ।’

निर्वाचन आयोगले कर्मचारी व्यवस्थापन गरेर मतगणना सुरु गर्न निर्वाचन कार्यालय र जिल्ला प्रशासन कार्यालयलाई निर्देशन दिएको थियो । कांग्रेसका जिल्ला सहसचिव तथा रम्भा गाउँपालिका उपाध्यक्ष पदका उम्मेदवार विष्णुकुमार थापाले गहिरोगरी अनुसन्धान गरेर खसेको मत १ हजार ९ सय २२ को हिसाब किताब मिले मात्र मतगणना अघि बढ्ने बताए ।

उनले सबै प्रक्रिया रुजु गरेर मात्र मतगणना अघि बढाउने भन्ने सहमति भभ्एको बताए । मतगणना गर्दा ७४ मत बढी देखिएपछि स्थगित भएको हो ।

सत्तारुढ गठबन्धन कांग्रेस, माओवादी केन्द्र, एकीकृत समाजवादीका साथै मंगोल अर्गनाइजेसन नेपालले संयुक्त विज्ञप्ति जारी गरी रम्भा-५, ताँहुको सार्वजनिक नतिजाप्रति असहमति जनाएका थिए । एमालेले भने मतगणना सुचारु गर्न माग गरेको थियो । उनीहरुले हिसाबकिताब सही नदेखिएको भनी पुनः मतदानको माग गरेका छन् ।

मतगणनास्थलनजिक गठबन्धनका कार्यकर्ता र प्रहरीबीच झडपसमेत भएको थियो । सरोकारवाला पक्षसँग विभिन्न चरणमा छलफल भए पनि निष्कर्ष भने निस्किएको थिएन । आयोगले नै सुरक्षा व्यवस्था मजबुत बनाएर भए पनि मतगणना गर्न जेठ ४ गते नै निर्देशन दिएको थियो ।

प्रकाशित : जेष्ठ ६, २०७९ १२:१६
प्रतिक्रिया
पठाउनुहोस्

सप्तरीको राजगढ-५ का नवनिर्वाचित वडा सदस्यको मृत्यु

अवधेशकुमार झा

राजविराज — सप्तरीको राजगढ गाउँपालिकाका नवनिर्वाचित वडा सदस्यको मृत्यु भएको छ । बिहीबार दिउँसो विजय जुलुसमा सहभागी भएका राजगढ-५ का नवनिर्वाचित वडा सदस्य राजेन्द्र सुतिहारको शुक्रबार बिहान मृत्यु भएको हो ।

निर्वाचित भएर बिहीबार विजय जुलुस गरी राति खाना खाएर सुतेका ६९ वर्षीय सुतिहारको शुक्रबार बिहान मृत्यु भएको परिवारिक स्रोतले जनाएको छ ।

बुधबार साँझ सार्वजनिक मत परिणामअनुसार जनता समाजवादी पार्टीका तर्फबाट उम्मेदवार भएका सुतिहार ४ सय ७४ मत प्राप्त गरी वडा सदस्यमा विजयी भएका थिए ।

निर्वाचित भएपछि बिहीबार दिनभरि उनी विजय जुलुसमा सहभागी भएका थिए ।

प्रकाशित : जेष्ठ ६, २०७९ १२:०८
पूरा पढ्नुहोस्
प्रतिक्रिया
पठाउनुहोस्
×