मेलम्चीको सिन्धुकोटमा तनाव, झडप रोक्न प्रहरीद्वारा हवाइ फायर
सिन्धुपाल्चोक — मेलम्ची नगरपालिका–५, सिन्धुकोटमा समयभित्रै मतदान स्थलमा प्रवेश गरेपनि आफूले मत हाल्न नपाएको भन्दै मतदाता र विभिन्न दलका कार्यकर्ताको आक्रोश झडप बदलिएपछि मतदान बीचैमा रोकिएको छ । मेलम्ची नगरको स्थानीय सिन्धुपुराना गाउँ माध्यमिक विधालयको मतदान केन्द्रमा भइरहेको विवाद साम्य हुन सकेको छैन ।
जिल्ला प्रहरी नायब उपरिक्षक दक्षबहादुर बस्नेतकाअनुसार सिन्धुकोट मतदानस्थलमा २५ देखि ३० जना मतदान गर्न बाँकी हुँदाहुँदै मतदान स्थगित गर्न केहीले आवाज उठाएपछि विवाद सुरु भएको थियो । प्रहरीले झडपलाई नियन्त्रण गर्न एक राउण्ड हवाइ फायरसमेत भएको उनले बताए ।
‘थप घटना विवरण बारे बुझ्दै छौं । झडपलाई शान्त गर्न प्रयासमा मतदान स्थगित भएको छ । झडपलाई रोक्दा एक राउण्ड हवाइ फायर भएको छ,’ डीएसपी बस्नेतले भने । पाँच नबज्दै सुरु भएको झडप मत हाल्ने समय सकिँदा पनि नरोकिएपछि यसबारे छलफल गर्न मतदाताले दलबीच आग्रह गरेका छन् । स्थानीय उम्मेद्वारले भने मतदाताले मतदान गर्ने क्रम चलिरहँदा पनि नेकपा एमालेका नेता तथा कार्यकर्ताले मतदान स्थगित गर्ने माग राखेको र त्यसमा सुरक्षाकर्मीले साथ दिएको आरोप लगाएका छन् ।
‘यहाँ सुरक्षाकर्मीबाट अन्धाधुन्धु गोली चलाउने धम्की आयो, दुई राउण्ड हवाइ फायर गरिएकोमा एक राउण्ड मात्रै भनेर माथि सूचना दिइयो,’ स्थानीय एक उम्मेद्वारले भने । केही मतदाताको परिचय पत्र वितरण नगरी मतदान केन्द्रभित्रै राखेको र त्यसको समाधानको लागि सर्वदलीय बैठक बोलाउन खोज्दा मतदान केन्द्रका मतदान अधिकृतले नमानेपछि झडपले झनै उग्र रुप लिएको थियो ।
तस्बिर सौजन्य : सन्तोष सिग्देल