(रोल्पा) — रोल्पाका सबै स्थानमा शान्तिपूर्ण रूपमा मतदान भएको छ । जिल्लाका ८१ स्थानका १ सय ७३ मतदान केन्द्रमा मतदान भएको हो। मुख्य निर्वाचन अधिकृतको कार्यालयका अनुसार ६० प्रतिशत मतदान भएको प्रारम्भिक अनुमान छ।
बिहान ७ बजेबाट सबै स्थानमा मतदान सुरु भएपनि परिवर्तन गाउँपालिका र लुंग्री गाउँपालिकाका ४ वटा मतदान केन्द्रमा विवादका कारण बिहान केहीबेर मतदान स्थगित भएको थियो । प्रमुख जिल्ला अधिकारी नवराज सापकोटाले स्थगित मतदान केन्द्रमा तत्काल सर्वदलीय सहमति गरेर पुन: मतदान सुरु गरेपछि निरन्तर मतदान भएर समयमै सम्पन्न भएको बताए ।
मतदान सम्पन्न भएपछि मतदान केन्द्रबाट निर्वाचन अधिकृतको कार्यालयसम्म मतपेटिका ओसारपसार कार्य सुरु गरिएको छ। रोल्पाका सबै केन्द्रबाट शुक्रबार रातिसम्ममा सबै मतपेटिका ल्याइसक्ने र रातिबाट नै मत गणनासमेत थाल्ने मुख्य निर्वाचन अधिकृत दिलिपराज पन्तले जानकारी दिए । त्यसका लागि सबै निर्वाचन अधिकृत कार्यालयले तयारी थालेका छन्।
निर्वाचनको अघिल्लो दिन थवाङको उवामा माओवादी केन्द्र र कांग्रेस-एमाले-चन्द समूहका कार्यकर्ता बीच झडप भएको थियो ।त्यसक्रममा माओवादी केन्द्रका कार्यकर्ताको आक्रमणबाट आधा दर्जन घाइते भएका थिए। उनीहरू मध्ये गम्भीर ३ जनाको थवाङमा उपचार भइरहेको छ । निर्वाचन सम्पन्न गर्न रोल्पामा नेपाली सेना, प्रहरी, सशस्त्र प्रहरी र म्यादी प्रहरी गरि करिब २ हजार सुरक्षाकर्मी परिचालित गरिएको थियो।
प्रकाशित : वैशाख ३०, २०७९ १९:०४
प्रकाशित : वैशाख ३०, २०७९ १९:०४
प्रतिक्रिया