काठमाडौँ — दोलखाको बैत्येश्वरमा गाउँपालिकाको १ र २ वडामा शुक्रबार झडपको कारण केही समयमा मतदान स्थगित भएको थियो । सरकारी अधिकारीहरुले थप सुरक्षाकर्मी परिचालन गरेर मतदान सुरु गरेपनि सम्बन्धित मतदान केन्द्रहरुमा सँधै विवाद हुने गरेको छ । 

 बैत्येश्वर-१ मा साविकको गैरीमुदी गाउँपालिकाको १ देखि ५ सम्म पर्छ । त्यसैगरी बडा नम्बरमा २ मा साविक गैरीमुदी गाउँपालिकाको बाँकी वडा र मिर्गे गाउँपालिका वडा १ रहेको छ । मिर्गे गाउँ विकास समितिको बाँकी वडा ३ नम्बर वडा रहेको छ । 

भिमेश्वर र जिरी नगरपालिकाको बीचमा रहेको बैत्येश्वर गाउँपालिका रहेको क्षेत्रमा २०५१ सालको मध्यावधी चुनावपछि सँधै निर्वाचनको समयमा विवाद हुँदै आएको छ । 

‘२०५१ सालको मध्यावधिदेखि प्रत्येक निर्वाचनमा पुरानो गैरिमुदीमा विवादमा पर्ने गरेको छ’ दोलखाका पत्रकार तथा प्रेस काउन्सिलका सदस्य चिरन्जिवी मास्केले भने, ‘एमाले र कांग्रेस दुवै बराबरको शक्तिको रुपमा रहेका छन् । एउटाले शक्ति देखाउन खोज्दा अर्कोबाट प्रतिरोध हुँदा सँधै विवादमा उत्पन्न हुने गरेको छ ।’ 

पहिले गैरीमुदीमा दुई मतदान केन्द्र  थिए । जसमध्ये पुतलीकाठस्थित मतदान केन्द्र कांग्रेसले कब्जामा लिने गरेको थियो । त्यसको बाटो एमालेले आफ्नो बढी शक्ति रहेको मैनापोखरीमा कब्जा गर्नेगरेको थियो ।  

मास्केका अनुसार २०६४ को माओवादी र २०७० सालमा एमालेले शक्ति बढी हुँदा अन्य पक्षले प्रतिवाद गर्न नसक्दा झडप भएन तर चुनाव विवादरहित हुन सकेन । 

अहिलेसम्मको विवादकोपछि गैरीमुदीका गाउँविकास समितिका अध्यक्ष रहेका कांग्रेसका नेता टलकबहादुर लामाको हत्याको विषय जोडिने मास्के बताउँछन् ।  

यसपटक पनि गैरीमुदीमा बिहीबार बेलुकीदेखि  विवाद सुरु भएको थियो । शुक्रबार सदरमुकाम थप सुरक्षाकर्मी थपिएपछि ढिलो गरि मतदान सुरु भएको थियो । 

अहिले त्यस क्षेत्रमा कांग्रेसका प्रदेश निर्वाचन क्षेत्र समिति सभापति शुक्र तामाङको दबदबा रहेको छ । २०७० सालमा तामाङले एमालेलाई साथ दिएका थिए ।