१६ स्थानमा झडप, ८ स्थानमा हवाईफायर- स्थानीय तह निर्वाचन २०७९ - कान्तिपुर समाचार
कान्तिपुर वेबसाईट
AdvertisementAdvertisement
अपडेट

१६ स्थानमा झडप, ८ स्थानमा हवाईफायर

कान्तिपुर संवाददाता

काठमाडौँ — स्थानीय तहको मतदान देशभर शान्तिपूर्ण रुपमा सम्पन्न भएपनि केही स्थानमा भने झडपका घटनाहरु भएका छन् । केही स्थानमा भने प्रहरीले हवाई फायर नै गर्नुपर्ने अवस्था निम्तिएको छ ।

कान्तिपुरका जिल्ला संवाददाताहरुले पठाएको विवरण अनुसार देशका विभिन्न १६ स्थानमा झडपका घटना भएका छन् । स्थिति नियन्त्रणमा लिन हुम्लाको चंखेली गाउँपालिका केन्द्र, ओखलढुंगाको चम्पादेवी गाउँपालिका ९ मिश्रभन्ज्याङको मतदान केन्द्र र रामेछापको दोरम्बा,शैलुङ र खाँडादेवी गाउँपालिका, गोरखाको घ्याल्चोक, सर्लाहीको धनकौलका मतदान केन्द्रमा हवाई फायर, त्यस्तै कौडन्यामा पनि विवाद भएपछि हवाई फायर भएको छ । त्यस्तै बाजुराको बुढनन्दा नपामा हवाइ फायर भएको छ ।

दैलेखको ठाटीकाँध, काभ्रेको चौरी देउराली ६, बाराको पचरौती २ मा पनि मतदानस्थलमा झडपहरु भएका छन् ।बाँकेको कोहलपुरमा माओवादी र एमाले कार्यकर्ताबीच खुकुरी हानाहान दुबै पक्षका एक एक जना घाइते भएका छन् ।

प्रहरी प्रवक्ता विष्णुकुमार केसीले झडप भएका अधिकांश स्थानको स्थिति नियन्त्रणमा आइसकेको र मतदान सुचारु भएको जानकारी दिए । उनले अहिलेसम्म झडप भएका स्थान मध्ये सर्लाहीको धनकौलमा मात्र मतदान रोकिएको जानकारी दिए ।



प्रकाशित : वैशाख ३०, २०७९ ११:३२
प्रतिक्रिया
पठाउनुहोस्

सर्लाहीको धनकौल र कौडेनामा विवादपछि स्थिति नियन्त्रणमा लिन हवाई फायर

बलरा नगरपालिका–१ हथियौलमा पनि दुई पक्षबीचको विवाद
ओमप्रकाश ठाकुर

(सर्लाही) — सर्लाहीको धनकौल गाउँपालिकास्थित  धनकौल–२ पशु सेवा केन्द्र मतदान स्थलमा केन्द्रमा त्रिपक्षीय झडप हुन थालेपछि  स्थिति नियन्त्रणमा लिन प्रहरीले हवाई फायर गरेको छ । मतदान स्थलमा सुरक्षाकर्मीले एक दर्जनभन्दा बढी हवाई फायर गरेको बताइएको छ । 

चलिरहेको मतदानस्थलमा त्रिपक्षीय ढुंगामुढा र झडप हुनथालेपछि स्थिति नियन्त्रणमा लिन हवाई फायर गर्नु परेको प्रमुख जिल्ला अधिकारी थानेश्वर गौतमले बताए । धनकौलमा नेपाली कांग्रेस, नेकपा एमाले र माओवादी केन्द्रका कार्यकर्ताबीच विवाद तथा झडप हुनथालेपछि बल प्रयोग गरिएको प्रजिअ गौतमले बताए । त्यहाँ विवादका कारण अहिले मतदान रोकिएको छ ।

यस्तै, बलरा नगरपालिका–१ हथियौलमा पनि दुई पक्षबीचको विवादका कारण मतदान रोकिएको छ ।

यस्तै, कौडेना गाउँपालिका–६ स्थित जनता आधारभूत विद्यालयमा राखिएको मतदान स्थलमा पनि नेपाली कांग्रेस, लोसपा र जसपाका कार्यकार्ताबीच विवाद भएको छ । विवादका कारण झण्डै १ घण्टा रोकिएको मतदान पुनः सुचारु भएकोमा तीन पक्षबीच पुनः विवाद र झडप भएपछि यहाँ पनि स्थिति नियन्त्रणमा लिन हवाई फायर गरिएको छ ।

कौडेनामा पुनः मतदान रोकिएको छ । कौडेनाको यो मतदान स्थलमा सेना परिचालन भएको स्थानीयले जनाएका छन् ।

विवाद देखिएर रोकिएको मतदानस्थलमा सर्वपक्षीय बैठक राखेर समस्या समाधानको प्रयास भइरहेको मुख्य निर्वाचन अधिकृत ध्रुवकुमार पियाले जानकारी दिए । ‘विवादका कारण रोकिएको मतदान सुचारुका लागि सर्वपक्षीय छलफल भइरहेको छ,’ उनले भने, ‘सर्वपक्षीय निर्णय पश्चात मतदान पुनः सुचारु हुनेछ ।’

जिल्लाका अन्य स्थानमा भने मतदान सुचारु रहेको प्रहरीले जनाएको छ । सर्लाहीमा ३ सय १८ मतदान स्थल अन्तर्गत ५ सय ९९ मतदान केन्द्र रहेका छन् । यहाँ ११ नगरपालिका र ९ गाउँपालिकाका लागि २० प्रमुख तथा उपप्रमुख तथा २ सय वडाध्यक्ष ८ सय सदस्य गरी १ हजार ४० जनप्रतिनिधि चुनिने छन् । जिल्लामा ४ लाख ७४ हजार ४ सय ३९ मतदाता रहेका छन् ।


प्रकाशित : वैशाख ३०, २०७९ ११:२५
पूरा पढ्नुहोस्
प्रतिक्रिया
पठाउनुहोस्
x
×