पोखरा — मुख्य निर्वाचन अधिकृतको कार्यालय पोखराले मेयरमा स्वतन्त्र उम्मेदवारी दिएका खड्गराज (गनेस) पौडेललाई बिहान साढे १० बजे सूची दिएर कुनै एक चुनाव चिह्न छान्न लगायो ।
अन्य स्वतन्त्र उम्मेदवारले चुनाव चिह्न छानिसकेपछि ‘अटेरी समूह’ का पौडेलले ‘लौरो’ छाने । समूहअन्तर्गत वडामा स्वतन्त्र उम्मेदवारी दिएकाले पनि चुनाव चिह्न ‘लौरो’ पाए । उम्मेदवारले प्रचारप्रसार सुरु गरे ।
दिउँसो ४ बजे निर्वाचन कार्यालयले पौडेललाई फोन गरेर ‘लौरो’ दिन नसकिने बतायो । स्थानीय तह निर्वाचन निर्देशिका २०७८ को अनुसूची २७ बमोजिम ७ चुनाव चिह्न मात्रै कास्कीका लागि दिएको कार्यालयले सूचना दियो । लौरो आठौं नम्बरमा थियो । बिहान दिएको चुनाव चिह्न दिउँसो खोसिएपछि ‘अटेरी समूह’ ले निर्वाचन कार्यालय घेराउ गरे । समूहको दबाबपछि निर्वाचन कार्यालयले पुन: लौरो नै कायम गर्यो ।
मेयरका उम्मेदवार पौडेलले अभियानबाट त्रसित दलको प्रभावमा ‘लौरो’ चिह्न दिन नखोजिएको आरोप लगाए । ‘काठमाडौंमा बालेनले लौरो पाए, अन्यत्र पनि स्वतन्त्र उम्मेदवारले लौरो लिएका छन्,’ उनले भने, ‘स्वतन्त्र उम्मेदवारका एक खालको लहर आउने देखेपछि राजनीतिक दलकै दबाबमा एकैखाले चनाव चिह्न दिन खोजिएको थिएन । अहिले निर्वाचन कार्यालयले आफ्नो गल्ती सुधार गर्यो ।’ उनले चुनाव चिह्न पाइसकेपछि प्रचारप्रसार समेत सुरु गरिसकेको बताए ।
मुख्य निर्वाचन अधिकृत श्रीकृष्ण भट्टराईका अनुसार निर्वाचन आयोगको दिउँसो दुई बजे स्वतन्त्र उम्मेदवार जति संख्यामा छन् त्यही लहरसम्मको मात्रै चुनाव चिह्न दिन परिपत्र गरेको थियो । पोखरामा सातजना स्वतन्त्र उम्मेदवार रहेकोले सातौं लहरभित्र लौरो परेन ।
उक्त परिपत्र बमोजिम अटेरी समूहलाई ‘लौरो’ दिन नसकिने बताइएको थियो । ‘आयोगले मतपत्र ठूलो नहोस् र खर्च नहोस् भनेर त्यसो भनेको रहेछ,’ उनले भने, ‘पछि हामीले छलफल गरेपछि एक लहर बढी छाप्दा केही नहुने भएको दिनु भन्ने निर्देशन आएपछि फेरि लौरो नै दियौं ।’
