धादिङ — स्थानीय तह निर्वाचनका लागि आइतबार र सोमबार उम्मेदवारी दर्ता तोकिएको छ । तर उम्मेदवारी दिने दिनसम्म पनि दलहरुलाई उम्मेदवार छान्नै सकस परेको छ । दुई नगरपालिका र ११ वटा गाउँपालिका गरी १३ वटा स्थानीय तह रहेको धादिङका कुनै पनि दलले आधिकारिक रुपमा उम्मेदवार तय गरेका छैनन् । नेकपा एमालेले जिल्लाको तीन वटा स्थानीय तहमा मात्रै उम्मेदवारको टुंगो लगाएको छ ।

गल्छी, सिद्धलेक र गंगाजमुना गाउँपालिकामा उम्मेदवार टुंगाएको छ । गल्छी गाउँपालिका अध्यक्षमा केदार खतिवडा र उपाध्यक्षमा राधा तिमिल्सिनालाई उम्मेदवार बनाउने निर्णय गरिएको छ । खतिवडा २०५४ सालमा एमालेबाट निर्वाचित कल्लेरी गाउँविकास समिति अध्यक्ष एवम् गल्छी गाउँ कमिटीका अध्यक्ष हुन् भने तिमिल्सीना यसअघि गल्छी गाउँपालिकाका निर्वाचित उपाध्यक्ष हुन् ।