खोटाङ — दिक्तेल रूपाकोट मझुवागढी नगरपालिकाको मझुवाभीरमा रक क्लाइम्बिङको मज्जा लिन पाइने भएको छ । ऐतिहासिक, धार्मिक तथा पर्यटकीय स्थल मझुवागढी क्षेत्रको मझुवाभीरमा रक क्लाइम्बिङको सफल परीक्षणपछि यसमा रमाउन चाहनेका लागि अवसरको ढोका खुलेको हो ।

खेलकुद तथा पर्यटन प्रवर्द्धन गर्ने उद्देश्यले रक ब्लाइम्बिङ सञ्चालनको सुरुवात गरिएको नगरपालिकाका प्रमुख तीर्थराज भट्टराईले बताए । रक क्लाइम्बिङ सञ्चालनपछि नगरको पर्यटन प्रवर्द्धनमा समेत सहयोग पुग्ने भट्टराईको भनाइ छ । ३२ मिटर अग्लो मझुवाभीरमा नेपाल नेसनल माउन्टेन्ट गाइडले रुट निर्माण गरिदिएको हो ।

रक क्लाइम्बिङ सञ्चालनका लागि पर्वतारोहण प्रशिक्षक संघले ६ दिनको तालिमसमेत दिएको छ । सात जना स्थानीय युवा र सशस्त्र प्रहरी बल हलेसी गुल्मका पाँच जना गरी १२ जनाले तालिम लिएका छन् ।