सुनसरी — धरानस्थित बीपी कोइराला स्वास्थ्य विज्ञान प्रतिष्ठानअन्तर्गत कोभिड अस्पतालका इन्टेनसिभ केयर युनिट (आईसीयू) र हाइडिपेन्डेन्सी युनिट (एचडीयू) का बेड लगभग भरिएका छन् ।

आइसोलेसन भने खालीजस्तै रहेको अस्पतालले जनाएको छ । यहाँ कोभिड अस्पतालतर्फ आईसीयूमा १०, एचडीयूमा २५ र जनरलतर्फ ६५ बेड छन् । यही गतिमा कोरोनाका जटिल संक्रमितको संख्या बढेमा प्रतिष्ठानस्थित कोभिड अस्पतालले धान्न नसक्ने बताउँछन्, कोभिड अस्पतालसमेत हेर्दै आएका फोक्सो तथा श्वासप्रश्वास रोग विशेषज्ञ डा. दिव्यराज मिश्र ।

‘कोभिड अस्पतालका जनरल बेड खाली जस्तै छन् तर आईसीयू र एचडीयू बेड भने लगभग भरिएका छन्,’ उनले भने, ‘जटिल भएपछि आएकाहरूलाई सोझै आईसीयू र एचडीयूमा भर्ना गरिने भएकाले यसपालि अघिल्लो लहरको भन्दा चाँडै बेड भरिएका हुन् । बेलैमा कोरोनाको दोस्रो लहरलाई रोक्न नसके अवस्था भयावह हुन सक्छ ।’

प्रदेश १ र वाग्मती प्रदेशका केही जिल्लाबाट समेत जटिल संक्रमितलाई बीपी प्रतिष्ठानमा रेफर गरिँदै आएको छ । तर आईसीयू र एचडीयू बेड भएका यहाँका कतिपय सरकारी र निजी अस्पतालले समेत बीपीमा रेफर गरिदिँदा चाप बढेको प्रतिष्ठानका एक चिकित्सकले बताए । ‘दिनदिनै भयावह स्थिति सिर्जना हुँदै छ । प्रदेश र संघीय सरकारले विभिन्न जिल्लामा भएका सरकारी र निजी अस्पतालसँग समन्वय गरेर मात्र प्रतिष्ठानमा रेफर गर्ने नीति तत्काल नबनाए थेग्न सक्ने अवस्था रहँदैन,’ ती चिकित्सकले भने ।

तत्कालका लागि कम्तिमा थप १० आईसीयू र २५ भन्दा बढी एचडीयू बेड विस्तार गर्नुपर्ने देखिएको उनको भनाइ छ । उनका अनुसार प्रतिष्ठानमा बिरामीका लागि अक्सिजनको अभाव छैन । हजार जनालाई एकसाथ आपूर्ति गर्न पुग्ने प्रतिष्ठानको आफ्नै अक्सिजन प्लान्ट छ । तर तत्काल आईसीयू र एचडीयू बेड थप्न सरकारले अनुदान दिनुपर्ने बताउँदै उनले भने, ‘नत्र यस्तै अवस्था हो भने भारतका अस्पतालमा देखिएका घटना यहाँ पनि देख्न धेरै दिन पर्खिनु पर्दैन ।’