सल्यान — किट सकिएपछि सल्यानमा र्यापीड डाइग्नोस्टिक टेस्ट (आरडीटी) स्थगित भएको छ । परीक्षणका लागि कर्णाली प्रदेशको स्वास्थ्य सेवा निर्देशनालयले ६ सय थान किट पठाएको थियो ।
अब ८० किट मात्र बाँकी छ । २ थान किट खेर गएको र मौज्दात किट अत्यावश्यक परीक्षणका लागि चाहिने भन्दै परीक्षण स्थगित गरिएको हो । सल्यानमा भारत र अन्य मुलुकबाट करिब ९ सय व्यक्ति फर्किएको तथ्यांक छ । स्थानीयबासी चोरी बाटोबाट पनि फर्किएकाले यो संख्या अझैं बढ्ने जिल्ला प्रशासनले जनाएको छ । स्वास्थ्य सेवा कार्यालयले ४ गतेदेखि भारत र अन्य मुलुकबाट फर्किएकाको द्रुत परीक्षण सुरु गरेको थियो । कार्यालयका अनुसार दार्मा, त्रिवेणी, कपुरकोट, छत्रेश्वरी, कुमाख र सिद्धकुमाख गाउँपालिकामा परीक्षण सकिएको हो ।
शारदा, बाग्चौर, बन्गाडकुपिण्डे नगरपालिका र कालीमाटी गाउँपालिकामा किट नपुगेपछि द्रुत परीक्षण स्थगित गरिएको जिल्ला स्वास्थ्य प्रमुख डा. अर्जुन वुढामगरले बताए । उनका अनुसार जिल्लाभरि अहिलेसम्म ५ सय १८ जनाको र्यापिड टेष्ट गरिएको छ । शारदा र बाग्चौर नगरपालिकामा अभियान सुरु गर्न खोजे पनि बाहिरबाट फर्किएका आधालाई पनि चेकजाँच गर्न नसकिने भएपछि स्थगित गरिएको उनको भनाइ छ । ‘किट सकिन थालेपछि निर्देशनालयमा ३ दिनअघि नै पत्राचार गरिएको थियो,’ उनले भने, ‘तत्काल पठाउन नसकिने जानकारी आएपछि गाउँमा खटिएका स्वास्थ्यकर्मीलाई फर्कन निर्देशन दिइएको छ ।’
कार्यालयले जिल्लामा कारोना भाइरसको संक्रमण भित्रन नदिन र नियन्त्रण गर्न चैत्र १ गतेदेखि मुलुक बाहिरबाट फर्किएका व्यक्तिको स्वास्थ्य परीक्षण थालेको थियो । जसका लागि चिकित्सकसहितको २ टोली विभिन्न पालिकामा परिचालन गरिएको थियो ।
बिहीबारदेखि सुरु भएको कार्यक्रमअनुसार दार्मा, कपुरकोट र त्रिबेणीमा २ सय ६३ जनाको परीक्षण गरिएको थियो भने कुमाख, सिद्धकुमाख र छत्रेश्वरीका २ सय ३२ जनाले र्यापिड टेष्ट गराएका थिए । त्यसअघि जिल्लाका विभिन्न क्वारेन्टाइनमा बसेका २३ जनाको आरडीटी परीक्षण गरिएको थियो । ‘अहिलेसम्म स्वास्थ्य परीक्षण गरेका कसैमा पनि कोरोना भाइरसको संक्रमण देखिएको छैन,’ डा. बुढामगरले भने, ‘निर्देशनालयबाट किट आएपछि अन्य पालिकामा शिविर राखेर परीक्षण सुचारु हुनेछ ।’
