पब्जीका ‘पेनकिलर’

पब्जी र युट्युबको भर्चुअल दुनियाँमा भने उनीसँग ‘हो र’ ग्याङका तीन टोली र सयौं दर्शकसमेत मध्यरातको लाइभ अवधिभर मस्त बात मारिरहेका हुन्छन् । जात, धर्म, राजनीतिसँग नजोडिएका र बेटिङजस्ता प्रतिबन्धित विषयमा बाहेक सञ्जनहरू चिकेन डिनर लक्ष्य नभेट्टाउन्जेल विशेषतः दैनिक जीवनका सामान्य भलाकुसारी र गेमभित्रका गतिविधिमा टिप्पणी गर्दै आफू र अरूलाई हँसाउन तल्लीन हुन्छन् । बातका विषय र बोलीचालीका शब्दहरू कहिलेकाहीं कतिलाई अपाच्य नलाग्ला भन्न सकिन्न ।

‘एक दिन लाइभ आएन भने के भयो, कहाँ हरायौ भनेर सोसल मिडियाका इनबक्स म्यासेजै म्यासेजले भरिन्छन्,’ सञ्जन भन्छन्, ‘हामी लाइभ नआएसम्म कतिलाई निद्रै लाग्दैन रे ! मलाई त भ्युअरहरूले पेनकिलर, स्लिपिङ ट्याबलेट के–के नाम दिएका छन् । हाम्रो लाइभ हेरेपछि आनन्द आउँछ रे, दिनभरिको थकाइ भुल्छन् रे, यसले मेडिसिनको काम गर्छ रे ।’ सञ्जन र उनको टोलीले गर्ने पब्जी मोबाइल युट्युब लाइभ हरेक दिन औसतमा ४ देखि ६ हजार दर्शकले हेर्ने गरेका छन् । कुनै बेला १२ हजारसम्म भ्युअर्स पुग्ने गरेको उनले बताए । उनको युट्युब च्यानललाई झन्डै ४ लाखले सब्स्क्राइब गरेका छन् । पछिल्लो समय टिकटकबाट पनि लाइभस्ट्रिम गर्ने गरेको बताए । टिकटकमा जथाभावी फेक एकाउन्ट बनेकामा झ्याउ मानिरहेका उनी एकाउन्ट भेरिफिकेसनका लागि प्रक्रिया पुर्‍याउन कसरत गर्दै छन् ।

सञ्जन नेपालका चर्चित अनलाइन भिडियो गेम स्ट्रिमरमध्ये एक हुन् । तर यत्तिका लामो पृष्ठभूमिसहित यो औपचारिक नामले चिनाउँदा कतिपयलाई दुविधा हुन सक्छ किनभने उनी सञ्जनभन्दा पनि ‘सीआर सेभेन हो र’ का रूपमा गेमिङ सर्कल र युवापुस्तामा बढी लोकप्रिय छन् । उनीसँग लाइभ पब्जी खेल्ने सेक्री, मामा, लिम्बे, साँढे र विस्नेसहितको टोलीलाई ‘हो र ग्याङ’ भन्ने गरिन्छ । ग्याङका सदस्यलाई सीआर सेभेनले मासिक तलबै दिएर पब्जी लाइभ स्ट्रिमिङमा खटाएका छन् । बेलाबखत उनी विभिन्न विधाका सेलेब्रिटीहरूलाई पनि आफ्नो प्लेटफर्ममा बोलाएर पब्जी खेलाउँछन् । काठमाडौं महानगरका मेयर बालेन शाह, फुटबल खेलाडी अञ्जन विष्ट, गायक स्वप्निल शर्मालगायतले हो र ग्याङसँग पब्जी खेलेका छन् ।

सीआर सेभेनको लोकप्रियता कतिसम्म छ भने प्रशंसकहरूको टोली कहिलेकाहीं उनलाई भेट्न उनको घरमै आइपुग्छन् । घरबाहिर ढुकेर बस्नेहरूलाई उनले केही पटक ‘सम्झाइवरी’ पठाउनुपरेको छ । पब्जीमा रुचि राख्ने नेपालको सानो जमातमाझ हरेक दिन ४/५ हजार युट्युब भ्युअर्स अटुट रूपमा आउनुलाई पनि उनको लोकप्रियतासँग दाँज्न मिल्छ । पब्जी लाइभ स्ट्रिमिङको सफलताकै कारण उनले हालसम्म २०/२५ लाख रुपैयाँ त चन्दा नै वितरणसमेत गरिसकेको बताए । ‘के आफू मात्रै कमाउनु’ भन्ने लागेर उनी समाज सेवामा उदार बन्ने गरेका छन् । ‘अस्ति भर्खर एउटा अनाथ आश्रमलाई सहयोग गर्न ३ लाख रुपैयाँ संकलन गर्न खोजेका थियौं,’ उनी भन्छन्, ‘लाइभ आएको ४०/४५ मिनेटमै पैसा उठ्यो । सय/सय रुपैयाँ गरेर लाखौं जम्मा हुन्छ । हामीले पब्जीको माध्यमबाट सहयोग गरेको देख्दा यो गेम र लाइभ स्ट्रिमिङलाई लिएर मान्छेहरू पोजिटिभ भइरहेका छन् ।’

सञ्जनले युट्युबबाट मासिक ४ देखि ५ लाख रुपैयाँ, सिंगापुरको स्काइलाइट गेमिङको सदस्यका रूपमा मासिक तलब, वाच पार्टी सो, ब्रान्ड र प्रतियोगिताहरूको प्रचारलगायत विभिन्न स्रोत तथा माध्यमबाट आम्दानी गर्ने गरेका छन् । नेपालका केही ठूला संस्थाहरूले उनलाई आफ्नो ब्रान्ड एम्बासडर चुनेका छन् । यो सबै सफलताको पछाडि आफ्नो मिहिनेत, लगनशीलता र टिमवर्कलाई जस दिन्छन् सञ्जन । ‘आजभोलि मान्छेहरू पब्जी खेलेर वा मजस्तो कन्टेन्ट क्रिएटर बनेर दुई/चार दिनमै फेमस हुन खोज्छन्,’ सीआर सेभेन भन्छन्, ‘रातारात फेमस भइँदैन । कोही ढिलो, कोही चाँडो अघि बढ्ने हो, मान्छेले कहिल्यै हतारिनु वा हिम्मत हार्नु हुँदैन ।’

पब्जी लाइभ स्ट्रिमिङ गरेको पहिलो महिना युट्युबबाट २ लाख रुपैयाँ पारिश्रमिक प्राप्त गर्दा आफूलाई सपनाझैं लागेको सञ्जन सम्झन्छन् । ‘ममीले पनि पत्याउनुभएन,’ उनी भन्छन्, ‘सबैतिरबाट पैसा आउँदा सुरुमा त के भइरहेको छ जस्तो लाग्थ्यो । अहिले पनि उपहारहरूलेघर भरिएको छ । कुनै लुगा किन्न खोज्यो भने पसलेले पैसै लिन मान्दैनन् । बाटोमा केटाकेटीदेखि आमा/बुबाको उमेरका मान्छेले पनि चिनेर बोलाउँछन् । पब्जीले मेरो जिन्दगी नै फेरिदिएको छ ।’

झन्डै पाँच वर्षअघि कक्षा १२ को अध्ययन सकेर कोरिया भाषा परीक्षा (ईपीएस) मा एक नम्बरले अनुत्तीर्ण भएपछि सञ्जन अन्य थुप्रै आमनेपाली युवाझैं मलेसिया वा कुवेततिर जाने सोचमा थिए । एकताका दुर्व्यसनीमा समेत फसेको बताउँछन् उनी । सन् २०१८ मा साथीभाइले उनलाई पब्जी खेल्न नउक्साएका भए सम्भवतः आज उनी कुनै खाडी देशमा पसिना बगाइरहेका हुन्थे । हुन त अहिले पनि उनी खाडी देश नै जाने तरखरमा छन्, तर पहिले र अहिलेको उद्देश्य फरक छ । पहिला उनी रोजगारीका लागि जान खोजिरहेका थिए भने अहिले उनलाई आफ्ना प्रिय फुटबल खेलाडी क्रिस्टयानो रोनाल्डोसँग भेट्ने अभिलाषाले साउदी डोर्‍याउन लागेको छ । ‘म जन्मैदेखि सीआर सेभेन, क्रिस्टियानो रोनाल्डोको फ्यान हुँ,’ उनी भन्छन्, ‘यो महिनाको अन्त्यसम्ममा साउदी अरब गएर रोनाल्डोलाई भेट्ने योजना छ । हेरौं भेटिन्छ कि !’

सञ्जन अबका केही वर्ष पब्जी लाइभ स्ट्रिमिङमै आफूलाई प्रस्फुटित गर्न चाहन्छन् । थप रचनात्मक बन्नुबाहेक यो विधामा आफूलाई तत्काल अन्य चुनौती र प्रतिस्पर्धा नरहेको उनले बताए । ‘मान्छेहरू मैले पब्जी खेलेको हेर्न आउने होइनन्,’ उनी भन्छन्, ‘मभन्दा राम्रो खेल्ने र प्रतियोगितामा जानेहरू टन्नै छन् । मेरो लाइभमा आउनुको कारण म बोलेको, मेरो साथीहरूसँगको गफ सुन्न आउने हुन् । हामी हँसाउँछौं ।

हरेक दिन हँसाइरहन सजिलो छैन । यही नै हाम्रो लागि चुनौती हो । अरू त दुई/चार वर्षलाई भने ढुक्कै छ ।’