तराई–मधेसबाट धेरै टाढाको दक्षिण भारतमा बसिरहेका नेपालीले पनि आफ्नो मुलुक र गृहनगरमा के भइरहेको छ भन्ने हरक्षण जान्न चाहिरह्को हुन्छन् । कोरोना भाइरस संक्रमणले भयावह रुप लिए पछि भारत एवं नेपालमा बसिरहेकालाई दुवै मुलुकको उत्तिकै चिन्ता हुनु स्वभाविककै भएको युवा सूचना प्रविधि इन्जिनियर आस्मिन भुजेल बताउँछन् ।

विराटनगरका स्थानीय उनी दक्षिण भारतको कर्नाटका राज्यको उत्तरी बैंग्लोरस्थित आईबीएम कम्पनीमा सूचना प्रविधि सुरक्षा विश्लेषक हुन् । ‘भारतमा नियन्त्रण भयो भने नेपाल त उसै पनि धेरै सुरक्षित हुन्छ,’भुजेल भन्छन्,‘भारत र नेपालले सीमामा मिलेर काम गरेमा स्थिति चाँडै सहज हुन्छ ।’ 

मेसेन्जरमा कुराकानी गर्दै उनले भारतको तुलनामा नेपालको स्थिति नीकै राम्रो रहेको हुनाले लकडाउनको राम्रो पालन, सामाजिक (शारीरिक) दूरी कायम गर्दा र शंकास्पदको तीव्र स्वास्थ्य जाँच गरेमा पुग्ने बताउँछन् । 

बंगलादेशको राजधानी ढाकामा नेपालझै सर्वत्र लकडाउन रहेको चिकित्साशास्त्रका छात्रा देवयानी भगत बताउँछिन् । उनी त्यहाँ एमबीबीएसमा अध्ययनरत छिन् । आफ्नो र सबैको सुरक्षाकालागि घरभित्रै संयमित भएर बस्नुको विकल्प नरहेको हाल अमेरिकाको न्यूयोर्कमा रहेकी अनीता परियार बताउँछिन् । कोरानोको लक्षण देखिएमा परीक्षण गराउने र सामाजिक दुरी बनाएर एक अर्काको परिवारको सुवास्थ्यको कामना गर्ने समय भएको उनी सुझाव दिन्छिन् ।