काठमाडौँ — भारत–क्यानडाबीचको कूटनीतिक सम्बन्धमा अहिले ऐतिहासिक तिक्तता देखिइरहेका बेला संगीतले भने यी दुई देशलाई आपसमा जोडिदिएको छ । यसको सूत्रधार बनेका छन्, बलिउड कलाकार एवं पञ्जाबका ‘सुपरस्टार’ दिलजित दोसान्झ ।

बिलबोर्ड म्यागेजिनको क्यानडा संस्करणले यस पटक दिलजितको बृहत् कभरेज गर्दै छ । योसँगै उनी बिलबोर्ड म्यागेजिन र त्यसको पनि विशेष संस्करणमा छापिने पहिलो भारतीय कलाकारसमेत बन्दै छन् ।

दिलजितका गीत क्यानडामा कति लोकप्रिय छन् भने उनको एल्बम त्यहाँको म्युजिक चार्टमा अग्रपंक्तिमा आउने गरेको छ । क्यानडाका विभिन्न सहरमा आयोजित उनका कन्सर्ट हेर्न देशभरिबाट दर्शक ओइरिन्छन् । गत अप्रिलमा उनले आफ्नो नियमित ‘दिल–लुमिनाती’ कन्सर्ट भ्यानकुभरमा गर्दा ऐतिहासिक रूपमा ५४ हजार दर्शकको उपस्थित रह्यो । भारतबाहिर पञ्जाबी म्युजिक कन्सर्ट हेर्न यसअघि यति ठूलो संख्यामा सहभागिता थिएन । 

क्यानडामा मात्र होइन, विश्वका विभिन्न सहरमा हुने दिलजितका कन्सर्टको टिकट अनलाइनमा बिक्री खुला हुनासाथ केही मिनेटमै ‘सोल्ड आउट’ हुने गरेका छन् । कतिपय सञ्चारमाध्यमले उनलाई पछिल्लो समय भारतले निर्यात गर्ने सबैभन्दा ठूला पप–आर्टिस्टका रूपमा व्याख्या गर्न थालेका छन् । आफ्नो पञ्जाबी मूल यथावत् राखेर उनले अन्तर्राष्ट्रिय मञ्जमा दरिलो स्थान सिर्जना गरेको भारतीय पत्रकार मानषी शर्माको विश्लेषण छ । अन्तर्राष्ट्रिय कलाकारसँगको सहकार्यले उनलाई भारतमा त चर्चा दिलाएको छ नै, विदेशमा पनि भारतीय ‘डायस्पोरामा’ सीमित नरहेर अन्तर्राष्ट्रिय प्रशंसकमाझ पनि व्यापक ख्याति दिलाइरहेको छ । 

‘यसअघि पण्डित रवि शंकर, उस्ताद जाकिर हुसेन, संगीतकार एआर रहमान, गायिका श्रेया घोसालजस्ता भारतीय संगीत कलाकारहरू अन्तर्राष्ट्रियस्तरमा चर्चित नबनेका होइनन्, पञ्जाबी संगीतमा दलेर मेहन्दीका तुनक तुनक र बल्ले बल्ले गीत विश्वव्यापी पार्टीसँगका हिस्सा बन्दै आएका छन्,’ शर्माले इफोरएम पोर्टलमा लेखेकी छन्, ‘तर दिलजित किन फरक छन् भने उनी अन्तर्राष्ट्रिय मञ्चमा अमेरिकी र्‍यापर सबिटी, अस्ट्रेलियन गायिका सिया र बेलायती गायक एड सिरनजस्ता प्रख्यात अन्तर्राष्ट्रिय कलाकारसँग आफ्नो पञ्जाबी मौलिकता यथावत् राखेर सहकार्य गर्न सफल भएका छन् ।’

दिलजित र उनले सन् २०२३ बाट सुरु गरेको सांगीतिक कार्यक्रम ‘दिल–लुमिनाती’ बारे बिलबोर्डले विस्तृत विवरण र पर्दा पछाडिका तस्बिरहरू प्रकाशित गर्ने भएको छ । चार फरक कभर पृष्ठसहित आउन लागेको म्यागेजिन सेट प्रि–अर्डरका लागि खुला गरिएको र इमेल तथा सिपिङमार्फत भौतिक प्रतिसमेत खरिद गर्न सकिने बिलबोर्डले जनाएको छ । क्यानडा, मेक्सिको, संयुक्त राज्य अमेरिका सहितका देश रहेको उत्तरी अमेरिकी महादेश र विश्वभर प्रभाव छोड्न सफल भएको भन्दै बिलबोर्डले दिलजितसम्बन्धी विशेष संस्करण निकाल्न लागेको हो । पञ्जाबस्थित जलान्धर जिल्लाको सानो गाउँमा जन्मिएका यी कलाकार कसरी विश्वकै अग्रणी पञ्जाबी ‘सुपरस्टार’ बन्न सके भन्नेबारे उनीसँगको लामो अन्तर्वार्ता र विश्लेषणात्मक लेख बिलबोर्डले प्रकाशन गर्दै छ ।

पछिल्लो समय दिलजित भारत र विश्वव्यापी रूपमा लोकप्रियताको उत्कर्षमा छन् । उनको दिल–लुमिनाती कन्सर्ट यति चर्चित छ, क्यानडा, अस्ट्रेलिया, न्युजिल्यान्डलगायत देशमा यसको टिकट खुल्नासाथ ‘सोल्ड आउट’ भए । भारतमा अक्टोबर (आउँदो शनिबार), नोभेम्बर र डिसेम्बरमा हुन लागेको उनको यही दिल–लुमिनाती कन्सर्टको टिकट बिक्री सेप्टेम्बर १० मा खुला हुँदा १ मिनेटभित्रै अनलाइनमार्फत सबै बिक्री भएका थिए । सबैभन्दा सस्तो ६ हजारदेखि २० हजार रुपैयाँ तोकिए पनि कालो बजारीमार्फत सस्तो टिकटको पनि २० हजारदेखि २५ हजार भारतीय रुपैयाँमा बिक्री भएको खबर बाहिरिएका छन् ।

आगामी जनवरीमा हुने बेलायती रक ब्यान्ड कोल्डप्ले र दिलजितको कन्सर्टको अनलाइनमा हुने अग्रिम टिकट बुकिङ प्रकरणले यसपालि भारतमा ठूलै हंगामा मच्चायो । अनलाइन टिकट बिक्रीलाई नियमनको दायरामा ल्याउनुपर्ने मागसहित दिल्ली उच्च अदालतमा सार्वजनिक चासोको मुद्दा दर्ता भएको छ । अनलाइनमा टिकट काट्न नपाएका प्रशंसकहरूका लागि कोल्डप्ले र दिलजित दुवैले भारतमा कन्सर्टको दिन थपेर त्यसमा सहभागी हुने मौका दिएका छन् । 

संगीतसँगै फिल्ममा पनि उत्तिकै सक्रिय दिलजित सामाजिक–राजनीतिक विषयहरूमा खुलेर बोल्ने र आफ्नो धारणा, पक्ष/विपक्ष स्पष्ट राख्ने गरेका छन् । चार वर्षअघि भारतमा भएको किसान आन्दोलनका बेला उनले किसानको पक्षमा हरकिसिमले समर्थन गरेका थिए । आन्दोलनरत किसानलाई भेट्न सडकमै पुगे भने उनीहरूलाई चिसोबाट बचाउन न्यानो लुगा र कम्बल दिएका थिए । सामाजिक सञ्जालमार्फत उनले मोदी सरकारलाई किसानमा माग पूरा गर्न भनेका थिए । इन्स्टाग्राम, फेसबुक, एक्स, युट्युबमा उल्लेख्य फलोअर एवं सब्स्क्राइबर भएका उनलाई राजनीतिक विषयमा विचारहरू राख्दा कंगना रनौतजस्ता मोदीभक्तिले अराष्ट्रवादीसमेत भन्ने गरेका छन् ।