गण्डकी — पोखराको व्यस्त पृथ्वीचोकको सडकमा हुइँकिरहेका गाडी । हस्याङफस्याङ गर्दै गन्तव्यतर्फ लागिरहेका पैदलयात्री । अनि साँझपखको पोखरेली हावाको चिसो झोंका । त्यही झोंकामा स्वर मिसाइरहेकी थिइन्, गायिका जुनु रिजाल । रेडियो कान्तिपुरले आयोजना गरेको ‘रेडियो अन ह्विल्स’ कार्यक्रममा जुनु आफ्नो प्रस्तुति राख्दै थिइन् । दर्शकले उनीसँगै स्वर मात्रै मिसाइरहेका थिएनन्, चिच्याउँदै र उफ्रँदै साथ पनि दिइरहेका थिए ।

जुनुले तीनवटा गीत गाइन् । पोखराबारे लेखिएको ट्रेडमार्क गीत ‘फेवा तालमा साइँली’ गाउँदा दर्शकमा छुट्टै उल्लास थियो । त्यसपछि ‘यो हो नि तरिका’, ‘कान्छीको भट्टी’ गाइन् । 

मुख्य सडकमा आयोजित कार्यक्रम भएकाले दर्शकको आउने जाने क्रम पनि उस्तै थियो । गन्तव्यतर्फ छुट्न आतुर यात्रु पनि समय निकालेरै सुनिरहेका थिए । मोटरसाइकल तथा स्कुटरको पछाडि बसेकाहरू पनि हातको इसाराले नाचेका देखिन्थे । पोखराको ऊर्जावान् भीड अघि प्रस्तुति राख्दा जुनु पनि जोसिलो देखिइन् । जुनुपछि स्टेजमा चढे, रवि ओड । नेपाल आइडल सिजन २ का विजेता ओडले पनि ३ वटै गीत सुनाए । ‘राम प्यारी’, ‘चि र मुसी चैर’, ‘छ माया छपक्कै’ गीतमा रविले पृथ्वीचोकको भीडलाई नचाए ।