सधैं चर्चामा केटी पेरी

एबीसी टेलिभिजनले प्रसारण गरिरहेको सन् २०२३ को कार्यक्रममा जजका रूपमा फेरि एकपल्ट केटी पेरी र लुका ब्रायन त छन् नै, लियोनल रिचीले पनि पुनरागमन गरेका छन् । यसमा सहभागी भएर केही विशेष गर्नेको त खुबै चर्चा हुने गर्छ भने जजहरू मात्रै कसरी अपवाद हुन सक्छन् र ?

अझ उनीहरूले केही फरक गर्‍यो कि समाचार बनिहाल्छ । तीन जजमध्ये पनि सबैभन्दा बढी चर्चा भने पेरीकै हुने गर्छ । उनी काम नै यस्तै गर्छिन्, सबैको आँखामा पर्ने । कार्यक्रम सुरु भएलगत्तै उनी भन्थिन्, ‘कम्तीमा म उस्तै छु, केही फेरिएको छैन ।’ भनेपछि कार्यक्रमका क्रममा पेरीले ती सबै सबै हर्कत गर्नेछिन्, जुन यसअघि पनि उनले गरेकी थिइन् । सायद त्यो भन्दा बढी नै । सन् २०१० मा उनी पहिलोपल्ट अमेरिकन आइडलसँग जोडिएकी थिइन् ।

त्यति बेला उनी अतिथि जज मात्र थिइन्, सन् २०१८ यता भने पूर्णकालीन जज बनिन् । यी ३८ वर्षीया अमेरिकी गायिका, गीतकार तथा टेलिभिजन पर्सनालिटीको तत्कालका लागि कुनै योजना छैन, यस लोकप्रिय कार्यक्रमबाट छुटिने । ‘अमेरिकन आइडल वास्तवमै निकै गज्जबको कार्यक्रम रहेको छ, यसमा सबथोक छ । सबैभन्दा ठूलो यस कार्यक्रमको पटकथा नै हुन्न, त्यसैले आफूखुसी काम गर्न पाइन्छ । भोटिङ सुरु नभएसम्म सबथोक हामीले भने जस्तै हुने गर्छ ।’

जजका रूपमा उनले निभाएका पछिल्ला केही संस्करणलाई आधार मान्ने हो भने उनी आफूलाई निकै नाटकीय रूपमा प्रस्तुत गर्ने गर्छिन् र उनको हाउभाउ पनि उत्तिकै उतारचढावपूर्ण हुने गर्छ । सायद त्यसैले पनि उनी बढी लोकप्रिय छन् कि ? यसपल्टको सिजनको एउटा पछिल्लो संस्करणलाई नै लिऔं न । अडिसनमा आएकी एक महिलालाई पेरी गाली गर्न पनि पछि पर्दिनन् । ती महिला भर्खर २५ वर्षकी थिइन् र यसबीच तीन सन्तानकी आमा पनि भइसकेकी थिइन् ।

पेरीलाई यसमै समस्या लाग्यो । उनको तर्क थियो, ती महिला आफ्ना तीन सन्तानलाई स्याहार्न नै व्यस्त हुनेछिन्, उनले गाउनेमा ध्यान दिनेचाहिँ कहिले हो त ? उनको यो प्रतिक्रिया धेरैलाई मन भने परेन । त्यसैले ट्वीटरमा तिनलाई उडाउनसम्म उडाउने काम भयो । प्रायःको तर्क थियो, सायद पेरीले आफ्नो सीमारेखा पो नाघिन् कि ? जस्तै आलोचना भए पनि पेरीलाई यसको खासै मतलब भएन, उनी मुखमा जे आउँछ, त्यही बोल्छिन् ।

पेरीको एक अर्को रूप पनि छ र त्यो हो, निकै भावनात्मक । अडिसनकै क्रममा २१ वर्षीय त्यस्ता प्रत्याशी पनि आए, जो टेक्सासको एक स्कुलमा भएको अन्धाधुन्ध गोली प्रहारमा जोगिएका थिए । नाम थियो, ट्रे लुइस । उनको कुरा सुन्नेबित्तिकै पेरीले आफूलाई रोक्न सकिनन् र स्टेजमै रोइन् पनि । उनको भनाइ थियो, ‘हाम्रो अमेरिका यस्तो कुरामा साह्रै नमज्जासँग चुकेको छ । आखिर अमेरिकामै किन यस्तो हुन्छ ?’

यहाँनिर एउटा प्रश्न निकै महत्त्वपूर्ण बन्छ, आखिरमा पेरी नै किन ? पेरीलाई नै किन बढी गाली गरिन्छ, तर तिनैलाई माया पनि किन बढी ? अरूलाई चाहिँ किन कम ? धेरैको ध्यान किन उनमै बढी केन्द्रित हुन्छ ? उनी कति धेरै लोकप्रिय छिन् भन्ने एउटा राम्रो उदाहरण त उनलाई ट्वीटरमा फलो गर्नेको संख्याले नै बताउने गर्छ । सन् २०१३ मा उनी जस्टिन बिबरलाई उछिनेर ट्वीटरमा सर्वाधिक पछ्याइएकी पर्सनालिटी भएकी थिइन् ।

सन् २०१५ मा गिनिज वर्ल्ड रेकर्डमै उनको नाम पनि जोडियो, ट्वीटरमा सर्वाधिक फलो गर्ने कीर्तिमानका लागि । सन् २०१७ मा ट्वीटरमा पेरीलाई पछ्याउनेको संख्या हन्ड्रेड मिलियन पुगेको थियो । फेसबुक र इन्स्ट्राग्राम पनि जोड्ने हो भने उनको छेउछाउ त कोही पनि पर्दैनन् । अझ टाइम म्यागाजिनले त केही वर्ष अगाडि मात्रै पेरी पूरा विश्वलाई प्रभावित पार्न सक्ने २५ को सूचीमा पर्छिन् भनेर घोषणा पनि गरेको थियो । एक प्रकारले भन्दा उनी सामाजिक सञ्जालकै लागि बनेकी जस्तो पनि देखिन्छ ।

साँच्चै पेरीको यतिविघ्न लोकप्रियताको रहस्य के त ? यसका स्पष्ट दुई कारण छन् । पहिलो कारण त उनी जबर्जस्त गायिक हुन्, यसमा कुनै शंका छैन । यसो मन लगाएर उनका गीत सुन्नु त, ती वास्तवमै मिठा हुने गर्छन्, अनि अरू महिला गायिकाको तुलनामा ठ्याक्कै फरक पनि । जस्तै, उनका साह्रै लोकप्रिय गीतमा पर्छन्, ‘डार्क हर्स’, ‘ईटी’, हार्लेस इन हवाई’, ‘द वन ड्याट गट अवे’, ‘आई किस्ड द गर्ल’, अनि ‘रोर’ । यो सूची बनाउने हो भने पक्कै लामै हुनेछ ।

किशोर उमेरदेखि नै गाउन र गीत लेख्न थालेकी पेरीको प्रमुख विशेषता भन्नु नै पप रक गीत हो । कीर्तिमानकै कुरा गर्ने हो भने पनि उनका रेकर्ड पूरा विश्वमा १४ करोडभन्दा बढी बिकेको छ । उनी यसरी सर्वाधिक रेकर्ड बिक्री हुनेको शीर्षस्थानमा पनि पर्छिन् । विश्व पप संगीतमा उनको योगदान र प्रभावको खुलेर प्रशंसा गर्न मिल्छ । अमेरिकन आइडलसँग जोडिएपछि उनको लोकप्रियता अझ चुलिएको हो । त्यस अर्थमा अमेरिकन आइडल र पेरी एक–अर्काका लागि भनेकै जस्तै देखिन्छ ।

र, पेरी लोकप्रिय हुनुको दोस्रो कारण । उनलाई ‘क्विन अफ क्याम्प’ पनि भनिन्छ । पेरी क्याम्प शैलीलाई पछ्याउने गर्छिन् । के हो त यो क्याम्प शैली ? यसलाई परिभाषित गर्न पनि सजिलो छैन । सजिलोमा भन्दा यो शैलीमा आफैंमा बेढंगको हुने गर्छ, आम शैलीभन्दा धेरै फरक । यसमा कला त लुकेको हुन्छ, तर त्यसलाई खोज्दै जाँदा पाउन पनि सकिन्न । यसलाई एक प्रकारले गे–कल्चरसँग पनि जोडेर हेर्ने गरिन्छ । तर आफैंमा सबैलाई भ्रममा पार्न पर्याप्त छ ।

अब यही अचम्मको शैलीकी रानी हुन्, पेरी । एउटा तस्बिरमा केटको टाउको माथि पनि मैनबत्ती थियो भने शरीरको वरिपरि पनि मैनबत्ती थियो । अब यसको के अर्थ त ? फेरि एकपल्ट उनी ठ्याक्कै ह्याम्बर्गर ढाँचाको पोसाकमा पनि देखा परिन् । तर पेरीलाई मन पर्ने भनेकै यस्तै । त्यसैले त उनी फरक छिन् । साँच्चै उनी कस्ती हुन् त ? यसबारे बुझ्ने इच्छा भने उनका गीत त सुन्नै पर्‍यो, सकिन्छ भने अमेरिकन आइडल हेर्दा पनि राम्रो । अहिलेको नयाँ सिजनमा उनी धमाका गर्ने योजनामै छिन् ।