मुम्बई — अनुमतिबिना तस्बिर खिचेको र सञ्चारमाध्यममा सार्वजनिक गरेको भन्दै बलिउड अभिनेत्री आलिया भट्ट रिसाएकी छन् । आलिया घरमा बसिरहेका तस्बिर खिचेर भारतीय सञ्चारमाध्यम इटाइम्सले पोस्ट गरेको थियो । त्यसलगत्तै रिसाएकी आलियाले इन्स्टाग्राम अकाउन्टमा स्टोरी पोस्ट गर्दै कडा प्रतिरोध गरेकी हुन् । 

‘के मलाई जिस्काइरहेको हो ? बिहानको सयम ठिकठाक चलिरहेको थियो । म आफ्नै घरको बैठक कोठामा बसिरहेकी थिएँ । त्यति नै बेला मलाई कसैले हेरिरहेको छ जस्तो लाग्यो । यसो माथि हेर्दा मैले अगाडिपट्टिको घरको छतमा दुई जना क्यामेरा लिएर बसेको देखेँ । कुन संसारमा यस्तो हर्कत सही हुन्छ र अनुमति दिइन्छ ? यो पूर्णरूपमा गोपनीयताको उल्लंघन हो । हरेक कुरा सीमा हुन्छ, जुन कसैले पार गर्न हुँदैन । तर त्यो सीमा पार भएको छ,’ आलियाले मंगलबार राति राखेको इन्स्टाग्रामको स्टोरीमा उल्लेख छ । 

हालै आमा बनेयता उनी घरमै बसिरहेकी छन् । आलियाले गत नोभेम्बरमा छोरी राहालाई जन्म दिएकी थिइन् । स्टोरी पोस्ट गरेसँगै उनले सहयोगका लागि मुम्बई प्रहरीलाई समेत ट्याग गरेकी छन् । आलियाले विरोध जनाएपछि अन्य बलिउडकर्मीले पनि उनको समर्थन गरेका छन् । अभिनेत्री अनुष्का शर्मा, करण जोहर, अर्जुन कपुर, जाह्नवी कपुर, स्वारा भाष्कर आलियाको पक्षमा देखिएका हुन् । 

‘निश्चय नै निकै लाजमर्दो,’ अर्जुन कपुरले लेखेका छन् । कपुरले एक महिला आफ्नो घरमा समेत सुरक्षित नभएको भन्दै उनले आपत्ति जनाएका छन् । त्यसैगरी, अनुष्काले पनि अर्काको घरमा चिहाउने र तस्बिर खिचेर सार्वजनिक गर्ने काम निकै आपत्तिजनक भएको लेखेकी छन् । ‘यिनीहरूले यो पहिलोपटक गरेका होइनन् । दुई वर्ष पहिले पनि यस्तै भएपछि हामी संगठित हुनुपरेको थियो । यो सब गरेर के सम्मान पाइन्छ ?’ उनले लेखेकी छन् ।