काठमाडौँ — नेपाल अटोमोबाइल इम्पोर्टर्स एन्ड म्यानुफ्याक्चरर्स एसोसिएसन (नाइमा) ले आयोजना गरेको ‘नाइमा मोबिलिटी एक्स्पो २०२५’ सकिएको छ । पाँच दिनका लागि आयोजित एक्स्पोमा अवलोकनकर्ता बढेपछि नाइमाले एक दिन समय थपेको थियो ।

अपेक्षा गरेभन्दा बढी अवलोकनकर्ता आएको भन्दै उनीहरूको मागलाई थोरै समयमा सम्बोधन गर्न गाह्रो भएपछि प्रदर्शन अवधि थपिएको नाइमाले जनाएको छ । एक्स्पोमा विभिन्न सवारीका ५० ब्रान्ड सहभागी थिए । प्रदर्शनीमा १५ वटा दुईपांग्रे, १५ वटा चारपांग्रे र ५ वटा व्यावसायिक नयाँ गाडी सार्वजनिक गरिएको थियो ।

नाइमाका अनुसार प्रदर्शनीको पहिलो दिन १५ हजार, दोस्रो दिन १३ हजार ५ सय, तेस्रो दिन १९ हजार ५ सय अवलोकनकर्ता सहभागी भए । यस्तै चौथो दिन २१ हजार ५ सय, पाँचौं दिन २२ हजार र छैटौं दिन ७ हजार ८ सय जनाले अवलोकन गरेको नाइमाका मिडिया एन्ड मार्केटिङ कन्सल्टेन्ट प्रतीक अर्यालले जनाए ।

६ दिनसम्म चलेको एक्स्पो करिब एक लाख जनाले अवलोकन गरेको नाइमाकी अध्यक्ष ऋतु सिंह वैद्यले बताइन् । ‘करिब एक लाख जनाले एक्स्पो अवलोकन गरे,’ उनले भनिन् । एक्स्पो अपेक्षा गरेभन्दा बढी सफल भएको उनको दाबी छ । ‘एक्स्पो एकदमै राम्रो भयो, रेसपोन्स पनि राम्रो आयो,’ उनले भनिन् । नाइमाले सवारी मात्र बिक्री नगर्ने र उपभोक्ता आवाजलाई साथमै लिएर अघि बढ्ने उनको भनाइ छ ।

प्रायोजक नेसनल इन्स्योरेन्स र एभरेस्ट बैंकका साथै सबै साझेदारको सामूहिक योगदानले एक्स्पो सफल भएको वैद्यले जनाइन् । ‘पछिल्ला ६ दिन एकदम अद्भुत रहे । नाइमा नेपाल मोबिलिटी एक्स्पो २०२५ को समापन कार्यक्रममा उभिँदा म अत्यन्त उत्साहित छु । तपाईंहरूले यो एक्स्पोलाई साँच्चिकै नेपालको सबैभन्दा ठूलो अटो एक्स्पो बनाउनुभयो,’ उनले भनिन् ।