'फ्लोर क्रस' गर्नेहरूले राजनीतिक अपराध गरे : यामलाल कँडेल  - कुराकानी - कान्तिपुर समाचार

'फ्लोर क्रस' गर्नेहरूले राजनीतिक अपराध गरे : यामलाल कँडेल  

'माधव नेपालसित जोडिएका साथीहरूको राजनीति के रहेछ भन्ने पटाक्षेप भयो'
जयसिंह महरा

काठमाडौँ — केन्द्रमा एमाले र माओवादीबीच भएको सत्ता भागबण्डामा कर्णाली प्रदेशमा माओवादीका महेन्द्रबहादुर शाही मुख्यमन्त्री बने । सबैभन्दा ठूलो दल बनेपछि कर्णालीको पहिलो मुख्यमन्त्री बन्ने चाहना राखेका एमाले प्रदेशसभा संसदीय दलका नेता यामलाल कँडेल सत्ताधारी दलका नेता हुनपुगे । 

यामलाल कँडेल । फाइल तस्बिर ।

नेकपा रहेकै बेला पनि मुख्यमन्त्रीबाट शाहीलाई हटाएर आफू त्यो पदका पुग्ने धोको कँडेलको थियो । त्यसले केन्द्रीय राजनीति नै तरंगित बनायो । २०७७ कात्तिकमा नेकपा अध्यक्ष तथा प्रधानमन्त्री केपी शर्मा ओली र पुष्पकमल दाहाल कर्णालीलाई लिएर चर्को विवादमा उत्रिए । दोस्रोपटक कँडेलको मुख्यमन्त्री बन्ने धोको पूरा भएन ।

२०७७ फागुन २३ गते सर्वोच्च अदालतले एमाले र माओवादी केन्द्र ब्युँताइदियो । त्यसको प्रभाव कर्णाली सरकारमा नपर्ने सम्भावना नै थिएन । पहिल्यै दुईपल्ट मुख्यमन्त्री बन्न खोजेका कँडेलले यो मौकाको सदुपयोग गर्नका लागि शाहीविरुद्ध प्रदेशसभामा अविश्वासको प्रस्ताव दर्ता गराए । उनी प्रस्तावित मुख्यमन्त्री थिए ।

मुख्यमन्त्री बन्ने धोको राखेका कँडेलको तेस्रो प्रयास पनि सफल हुन सकेन । एक सांसदलाई कारबाही गरेर १२ प्रदेशसभाको नेता महेन्द्रबहादुर शाहीले प्रदेशसभाको विश्वास प्राप्त गरे भने १९ प्रदेशसभा रहेका कँडेलले आफ्नै दल सम्हाल्न सकेनन् । एमालेमा जारी ओली र माधवकुमार नेपालको झगडाले कँडेलको मुख्यमन्त्री बन्ने सपना पूरा हुन दिएन ।

शाहीको सरकारमा रहिसकेका नेपाल पक्षका एमाले प्रदेशसभा सदस्यले कँडेलले लगाएको ह्वीप उल्‍लंघन गरे । प्रकाश ज्वाला, कुर्मराज शाही, नन्दसिंह बुढा र अमरबहादुर थापाले मुख्यमन्त्री शाहीलाई विश्वासको मत दिए । यसरी नेकपा (माओवादी केन्द्र) का १२, नेपाली कांग्रेसका ६ र एमालेका ४ सहित २२ जना सांसदको मतले शाहीको पदमात्रै जोगिएन कँडेलको मुख्यमन्त्री बन्ने बाटो बन्द भयो ।

कर्णाली प्रदेशको यो राजनीतिक अवस्थाबारे कर्णाली प्रदेशसभामा एमाले संसदीय दलका नेता यामलाल कँडेलसँग कान्तिपुरका लागि जयसिंह महराले गरेको कुराकानीको सम्पादित अंशः

कर्णालीको पछिल्लो राजनीतिक परिस्थितिबारे तपाईंको धारणा के हो ?

नतिजा थाहा पाइहाल्नुभयो । उहाँहरू (फ्लोर क्रस गर्ने एमाले सांसद)ले षडयन्त्रपूर्वक ढंगले सहमतिका साथ दलको बैठकमा बसेको देखियो । उहाँहरू पार्टीको दलको भएको हुनाले सहभागी बनाएर १ बजेसम्म सर्वसम्मत ढंगले निर्णय गरिएको थियो ।

प्रकाश ज्वाला राजनीतिक इतिहास बोकेको साथी भइसकेकाले उनले गर्ने थिएनन् । अरुले गर्ने कुरा हुन्थ्यो । उहाँहरूको राजनीतिक अपराधका रूपमा लिन्छु । दल छोड्न सक्छ, राजनीतिक निर्णय गर्न सक्छ, त्यो गरेको भए कुनै आपत्ति थिएन । यो त उहाँहरूले राजनीतिक अपराध गरेर कुनै राजनीतिक भविष्य नदेखेर तत्कालिक फाइदाका लागि त्यस्तो गरेको हो भन्ने लाग्छ ।

फ्लोर क्रस गर्ने सांसदलाई के गर्नुहुन्छ ?

उहाँहरू अब एमाले रहनुभएन । प्रक्रिया पुर्‍याउन बाँकी छ । उहाँहरू एमाले रहनुभएन, रहन सक्नुहुन्न । विधि प्रक्रिया पुर्‍याएर कारबाही हुन्छ ।

कर्णालीमा एमालेले दिएको सन्देश के हो ?

कर्णालीको सामाजिक आर्थिक जुन बनावट छ यसबाट प्रतिनधित्व भएको साथीहरूको प्रतिछायाँ यसमा देखियो । निष्ठा राजनीतिको कुरा देखिएन । अर्को नेकपा एमालेभित्रको जुन संकट देखा परेको छ, अब क्रमश: नेकपा एमालेको माधव नेपालसित जोडिएका साथीहरूको राजनीति के रहेछ भन्ने पटाक्षेप हो । अर्को, कांग्रेस प्रदेशसभामा भाषण गर्दासम्म प्रतिपक्ष प्रतिपक्ष भनिरहेको थियो । प्रतिपक्ष हुँदा पनि सत्तापक्षलाई भोट हाल्ने इतिहासमा नहुने घटना भयो ।

कांग्रेसले निर्णय गरिसकेको थिएन भन्नुभएको हो ?

यो कुरा उहाँ (जीवनबहादुर शाही) आफैले भन्नुभएको थियो ।

एमालेलाई नै सम्हाल्न तपाईंको पहल पर्याप्त नभएको हो ?

आफ्नो दलभित्र विश्वासका साथ उहाँसँग छलफल गरेको थिए । आन्तरिक मतभिन्नताका बाबजुद मेरो अपेक्षा के थियो भने त्यो तहसम्म कदम उठाउनुहुन्न भन्ने थियो । उहाँहरूले नै बैठकमा बारम्बार बताइरहनुभएको थियो । मेरो अरु दलहरूसँग बातचिज र संवाद भइरहेको अवस्था थियो । आफ्नै दलमा केन्द्रित भएर गतिविधि अगाडि बढाइरहेको अवस्था थियो ।

कर्णाली सरकार त जोगियो तर त्यसले एमालेभित्र नै तरंग पैदा गर्‍यो नि, होइन र ?

त्यसको विश्लेषण तपाईंहरूले नै गर्नुस्, के हुन्छ ?

प्रकाशित : वैशाख ३, २०७८ १८:५०
प्रतिक्रिया
पठाउनुहोस्

टोखाका विद्यालय वैशाख ९ देखि बन्द हुने

कान्तिपुर संवाददाता

काठमाडौँ — टोखा नगरपालिकाका विद्यालय यही वैशाख ९ गतेदेखि बन्द हुने भएका छन् । टोखाले दोस्रो चरणको कोरोना सङ्क्रमणलाई मध्यनजर गर्दै वैशाख ९ देखि सबै विद्यालय बन्द गर्न लागेको हो ।

नगरपालिकाका प्रमुख प्रकाश अधिकारीले टोखाका विद्यालयमा कोरोना सङ्क्रमणदर फैलन नदिन वैशाख ९ देखि विद्यालय बन्द गर्न लागेको जानकारी दिए ।

'वैशाख ५ गतेदेखि ८ गतेसम्म सबै विद्यालयमा दोस्रो चरणको कोरोनासम्बन्धी विद्यार्थीमा जनचेतना फैलाउने, वैशाख १० देखि १५ गतेसम्म सबै विद्यालय बन्द गर्ने र वैशाख १६ गतेदेखि स्वास्थ्य मापदण्ड पालना गरेर वार्षिक परिक्षा सञ्चालन गर्ने निर्णय भएको छ,' उनले भने ।

यस्तै टोखाले नगरपालिकाभित्र कोरोना भाइरस फैलन नदिन माइकिङ गर्ने, होर्डिङ वोर्ड राख्ने, आइसोलेसन कक्ष निर्माण गर्ने कार्यलाई प्राथमिकता दिने बताएको छ।

नगरपालिकाका शिक्षा शाखा प्रमुख बाबुराम गौतमले टोखामा सामुदायिक आठ, निजी ८४ र मन्टेश्वरी ३५ विद्यालय रहेको जानकारी दिए । टोखाले सङ्क्रमणको दरलाई हेरेर अन्य निर्णय गर्दै जाने जनाएको छ ।

प्रकाशित : वैशाख ३, २०७८ १८:४९
पूरा पढ्नुहोस्
प्रतिक्रिया
पठाउनुहोस्
×