काठमाडौँ — नेपालभित्र रहेका विभिन्न कलेजको शिक्षाको गुणस्तर, त्यहाँको शैक्षिक वातावरण, पढाइसँगैविभिन्न अतिरिक्त क्रियाकलापलगायतका विषयमा विद्यार्थी तथा अभिभावकलाई निरन्तर जानकारी दिँदै आइरहेको ‘भीम्याग’ को टोली पछिल्लो समय भीजे संजोग कोइरालाको नेतृत्वमा काठमाडौंको कमलपोखरीस्थित इस्लिङ्टन कलेज पुगेको छ ।

यूके युनिभर्सिटीसँगको सहकार्यमा आईटी र बिजनेस कोर्स पढाइ हुने यस कलेज सन् २००६ मा स्थापना भएको हो ।

यस कलेजका संस्थापक तथा अध्यक्ष सुलभ बुढाथोकीले सुरुवातमा कम्प्युटर इन्स्टिच्युट हुँदै इस्लिङ्टन कलेजमा विस्तारित भएको प्रसंग उप्काउँदै भन्छन्, ‘सुरुवातमा कम्प्युटर ट्रेनिङ इन्स्टिच्युसनका रूपमा काम गर्दागर्दै सन् २०११ मा आएर यूके पब्लिक युनिभर्सिटीसँग आबद्ध भई यूकेको पाठ्यसामग्री अध्यापन गराउने पहिलो एकेडेमिक इन्स्टिच्युसन बन्यौं । आज आएर हामी नेपालकै सबैभन्दा ठूलो निजी कलेज हुन पुगेका छौं ।’

नेपालको शिक्षा र विदेशी शिक्षाबीचको दूरीलाई हटाउने गरी आधुनिकस्तरको शिक्षण पद्धति अपनाउँदै आएको दाबी गर्ने यस कलेजको उद्देश्य विद्यार्थीलाई ‘पासआउट’ मात्र गराउने नभई स्नातक तहपछि स्वयंलाई काम गर्न सक्षम बनाउने रहेको बुढाथोकी थप्छन्, ‘कलेजका स्टाफले ग्राउन्ड लेभलमा नै गएर विद्यार्थीसँग निकै मिहिनेतका साथ काम गर्छौं ताकि नतिजा राम्रो निस्कियोस् । जसले गर्दा अध्ययनकै क्रममा विद्यार्थी सन्तुष्ट त छन् नै, पूर्वविद्यार्थीहरूले पनि कलेज सम्झँदा सधैं वाह भन्ने अनुभूति गर्न सकून् ।’