काठमाडौँ — सन् १६०३ मा आजकै दिन (मार्च २४) मा इंग्ल्यान्डकी महारानी एलिजाबेथको मृत्यु भएको थियो । १५३३ को सेप्टेम्बर ७ मा जन्मिएकी एलिजाबेथ १५५८ को नोभेम्बर १७ मा इंग्ल्यान्डको महारानी बनेकी थिइन् । एलिजाबेथ हाउस अफ टुडोर परिवारबाट अन्तिम महारानी बनेकी थिइन् ।
उनी हेनरी आठौं र उनकी दोस्री श्रीमती एन्नी बोलिनकी छोरी हुन् । एलिजाबेथ दुई वर्षकी हुँदा उनकी आमाको हत्या गरिएको थियो । त्यसलगत्तै एन्नीसँग हेनरीको विवाह रद्द गर्दै एलिजाबेथलाई अवैधानिक घोषित गरिएको थियो । हेनरीको मृत्युपछि एलिजाबेथका सौताने दाइ एडवार्ड छैटौं राजा बनेका थिए ।
१५५३ मा उनको मृत्यु भएपछि भने हेनरीका दुई छोरी (दोस्रो श्रीमतीतर्फका) को दाबी बेवास्ता गर्दै भतिजी लेडी जेन ग्रेलाई महारानी बनाइएको थियो । तर एडवार्डको इच्छाविपरीत ९ दिनमै मारीलाई महारानी बनाइएको थियो । उनको १५५८ मा मृत्यु भएपछि भने एलिजाबेथ महारानी घोषित भएकी हुन् ।
एलिजाबेथको शासनकालमा इंग्ल्यान्डमा सांस्कृतिक तथा साहित्यिक क्षेत्रमा निकै विकास भएको मानिन्छ । खासगरी शेक्सपियर जस्ता महान् नाटककारले अंग्रेजी नाटकको क्षेत्रमा अतुलनीय योगदान पुर्याएका थिए ।
त्यस्तै, वैदेशिक सम्बन्धका मामिलामा पनि एलिजाबेथ निकै सफल मानिन्छिन् । खासगरी उनको नीतिका कारण सुरुमा इंग्ल्यान्ड र स्पेनबीचको सम्भावित युद्ध टरेको बताइन्छ । एलिजाबेथको मृत्युपछि जेम्स प्रथम इंग्ल्यान्डको राजा बनेका थिए ।
