आजकै दिन

माइकल र सोनीबीच सम्झौता

कान्तिपुर संवाददाता

काठमाडौँ — सन् १९९१ मा आजकै दिन (मार्च २०) मा अमेरिकी गायक माइकल ज्याक्सनले सोनी कम्पनीसँग ६५ मिलियन अमेरिकी डलर बराबरको सम्झौता गरेका थिए । 

सांगीतिक करिअर निकै शिखरमा पुगेका बेला १९८५ मा ज्याक्सनले प्रतिलिपि अधिकारसम्बन्धी मुद्दा हारेपछि एटीभी म्युजिकलाई ४७.५ मिलियन अमेरिकी डलर तिर्नुपरेको थियो । बिटल्स ब्यान्डका जोन लेनन र पल म्याककार्टनीले लेखेका गीतहरूको प्रयोगका विषयमा उनले जरिवाना तिरेका थिए । निकै विलासितापूर्ण जीवन निर्वाह गर्ने ज्याक्सनले सोनीसँग सम्झौता गरेको दुई वर्षपछि १३ वर्षीय बालकका बाबुआमाले बालयौन दुराचारमा मुद्दा दायर गरेपछि त्यसलाई मिलाउन २२ मिलियन अमेरिकी डलर तिरेका थिए ।

त्यस्तै कतिपय व्यक्ति तथा मनोरन्जन कम्पनीले तिर्नुपर्ने पैसा नतिरेको वा सम्झौताअनुसार कार्यक्रम नगरेको भन्दै ज्याक्सनविरुद्ध मुद्दा दायर गरेका थिए । जसका कारण जीवनको पछिल्लो समय ज्याक्सन आर्थिक अभावबाट गुज्रिन बाध्य भएका थिए । २००१ मा उनले बैंक अफ अमेरिकाबाट दुई सय मिलियन ऋण लिएका थिए ।

द गार्जियनका अनुसार २००९ को जुन २५ मा मृत्यु हुँदाका बेला ज्याक्सनले विभिन्न व्यक्ति तथा कम्पनीलाई करिब पाँच सय मिलियन अमेरिकी डलर तिर्नुपर्ने थियो । १९५८ को अगस्ट २९ मा अमेरिकाको इन्डियानामा जन्मिएका ज्याक्सनको लस एन्जल्समा मृत्यु भएको थियो । उनले ‘अफ द वाल’, ‘थ्रिलर’, ‘ब्याड’, ‘डेन्जरस’, ‘इन्भिन्सिबल’ लगायतका निकै लोकप्रिय एल्बम बजारमा ल्याएका थिए । ज्याक्सनका १० करोड प्रतिभन्दा बढी एल्मब बिक्री भएको बताइन्छ ।

प्रकाशित : चैत्र ६, २०७९ ०८:०२
प्रतिक्रिया
पठाउनुहोस्

‘भष्मे डन’ छायांकन यसै साता

कान्तिपुर संवाददाता

काठमाडौँ — निर्देशक दीपेन्द्र के खनालको निर्देशनमा बन्न लागेको फिल्म ‘पशुपति प्रसाद–२ ः भष्मे डन’ को सुटिङ शुक्रबारदेखि हुने भएको छ । 

‘पशुपति प्रसाद’ फिल्ममा विपिन कार्कीले निर्वाह गरेको मुख्य चरित्र भष्मे डनमा केन्द्रित रहेर निर्माण हुन लागेको फिल्ममा कार्कीसँगै स्वस्तिमा खड्का, सौगात मल्ल, वर्षा सिवाकोटी, रवीन्द्र सिंह बानियाँ, प्रकाश घिमिरे, मिश्री थापा, सजन थापा मगरलगायतका कलाकारले अभियन गर्ने जनाइएको छ ।

सात वर्षमा भष्मे डनको जीवनमा आएका विभिन्न उतारचढावलाई मुख्य विषयवस्तुका रूपमा फिल्मले प्रस्तुत गर्ने जनाइएको छ । फिल्मको कथा खगेन्द्र लामिछानेले तयार पारेका हुन् भने उनी आफैं निर्माता हुन् । नाम मात्रको नभई अर्थपूर्ण र तर्कपूर्ण सिक्वेल बन्ने लेखक लामिछानेको दाबी छ । निरज कँडेलको डीओपी, कृष्ण थापाको छायांकन, दीर्घ खड्काको सम्पादन, कृष्ण भारद्वाज तथा सुभाष भुसालको संगीत रहने फिल्म टुकी आर्टस्को ब्यानरमा निर्माण हुनेछ ।

फिल्मको शुक्रबार काठमाडौंको पशुपतिनाथ मन्दिर परिसरमा शुभमुहूर्त गरिएको हो । शुभमुहूर्त कार्यक्रममा निर्देशक खनालका साथै विभिन्न कलाकारको उपस्थिति थियो । फिल्मको छायांकन पशुपति क्षेत्र विकास कोष परिसरमा हुने र ३० दिनमा पूरा गर्ने लक्ष्य राखिएको छ । फिल्म बडादसैंको फूलपातीका दिनदेखि प्रदर्शनमा आउने निर्माण पक्षले जनाएको छ ।

प्रकाशित : चैत्र ६, २०७९ ०८:०२
पूरा पढ्नुहोस्
प्रतिक्रिया
पठाउनुहोस्
×