काठमाडौँ — सन् १९७० मा आजकै दिन (मार्च ६) मा सांगीतिक समूह द बिटल्सको ‘लेट इट बी’ बेलायतमा सार्वजनिक भएको थियो । यो बिटल्स ब्यान्डको अन्तिम गीत हो । द बिटल्स विश्वकै सबैभन्दा प्रभावकारी सांगीतिक ब्यान्डका रूपमा चिनिन्छ । 

इंग्लिस रक ब्यान्ड द बिटल्स बेलायतको लिभरपुलमा सन् १९६० मा स्थापना भएको हो । १९६२ देखि १९६९ सम्म ब्यान्डमा जोन लेनन, पल म्याक्कार्टनी, जर्ज ह्यारिसन र रिंगो स्टार सस्दय रहेका थिए । सन् १९६७ मा ब्यान्ड म्यानेजर ब्रायन एप्स्टिनको मृत्यु भएसँगै ब्यान्ड समस्यामा परेको हो । त्यसको एक वर्षपछि १९७० को अप्रिलमा पल म्याक्कार्टनीले सोलो एल्बम निकालेपछि ब्यान्ड औपचारिक रूपमा टुक्रिएको हो । 

ब्यान्डका निकै चर्चित सदस्य जोन लेननको सन् १९८० मा हत्या भएको थियो । ह्यारिसनको सन् २००१ मा क्यान्सरका कारण निधन भएको थियो । क्याक्कार्टनी र स्टार भने अझै पनि सांगीतिक दुनियाँमा सक्रिय छन् । विश्वभर बिटल्सका कम्तीमा ६० करोड एल्बम बिक्री भएका छन् ।