चर्चिलको मृत्यु- विश्व - कान्तिपुर समाचार
कान्तिपुर वेबसाईट
AdvertisementAdvertisement
आजकै दिन

चर्चिलको मृत्यु

कान्तिपुर संवाददाता

काठमाडौँ — सन् १९६५ मा आजकै दिन (जनवरी २४) मा बेलायती प्रधानमन्त्री विन्स्टन चर्चिलको मृत्यु भएको थियो । उनी दुई पटक बेलायतको प्रधानमन्त्री भएका थिए । चर्चिल एक प्रेरणादायी राजनेता, लेखक तथा वक्ताका रूपमा विश्वप्रसिद्ध चर्चिल दुई कार्यकाल बेलायतको प्रधानमन्त्री बनेका थिए । 

चर्चिल मानिसहरूलाई प्रभावित पार्न सक्ने अद्भुत क्षमता, रणनीतिक चातुर्यता र अद्वितीय व्यक्तित्वका कारण विश्वभर चर्चित थिए । चर्चिल पहिलो पटक दोस्रो विश्वयुद्धका बेला १९४० देखि १९४५ सम्म र दोस्रो पटक १९५१ देखि १९५५ सम्म बेलायतको प्रधानमन्त्री थिए ।

उनी सन् १९०० देखि १९६४ सम्म ५५ वर्ष बेलायतको सांसद थिए । १९०४ देखि १९२४ सम्म लिबरल पार्टीका सदस्य रहेका चर्चिलले १९४० देखि १९५५ सम्म कन्जरभेटिभ पार्टीको नेतृत्व सम्हालेका थिए । सांसदका रूपमा उनको कार्यकालमा बेलायतमा भिक्टोरिया, एडवार्ड सातौं, जर्ज पाँचौं, एडवार्ड तेस्रो, जर्ज छैटौं र एलिजाबेथ द्वितीयसहित ६ जना राष्ट्रप्रमुख थिए ।

बेलायतको अक्सफोर्ड सायरमा १८७४ को नोभेम्बर ३० मा जन्मिएका चर्चिल १८९५ मा बेलायती सैनिक सेवामा प्रवेश गरेका थिए । ब्रिटिस इन्डिया, एंग्लो सुडान तथा दोस्रो बोएर युद्धको अनुभव लिएका चर्चिल युद्धसम्बन्धी रिपोर्टका कारणसमेत चर्चित बनेका थिए ।

‘ओ माई गड’ को संक्षिप्त रूपमा ‘ओएमजी’ पहिलो पटक विन्स्टन चर्चिललाई लेखिएको पत्रमा प्रयोग भएको थियो । १९१७ को सेप्टेम्बर ९ मा लर्ड फिसरले चर्चिललाई लेखेको पत्रमा ओएमजी लेखिएको थियो ।

चर्चिलको १९६५ को जनवरी २४ मा स्ट्रोकका कारण बेलायतको राजधानी लन्डनको हाइड पार्कस्थित आफ्नो निवासमा मृत्यु भएको थियो । आफ्नो जीवनकालमा चर्चिललाई ८ पटक स्ट्रोक भएको थियो । पछिल्लो पटक जनवरी १५ मा स्ट्रोक भएको थियो । त्यसको ९ दिनपछि उनको मृत्युको भएको हो ।

प्रकाशित : माघ १०, २०७९ ०७:११
प्रतिक्रिया
पठाउनुहोस्

पल्सर स्पोर्ट्स अवार्ड फागुनमा

कान्तिपुर संवाददाता

काठमाडौँ — नेपाल खेलकुद पत्रकार मञ्चले एएसजेएफ पल्सर स्पोर्ट्स अवार्डको १९ औं संस्करण फागुन २३ मा आयोजना गर्ने घोषणा गरेको छ ।

मञ्चले हरेक वर्ष गर्दै आएको पल्सर स्पोर्ट्स अवार्ड यस वर्ष ढिलोगरी आयोजना गर्न लागेको हो । नेपाली खेलाडीले अघिल्लो वर्ष गरेको प्रदर्शनका आधारमा यो अवार्ड प्रदान गरिँदै आएको छ । २०६० सालदेखि स्पोर्ट्स अवार्डले निरन्तरता पाएको हो । २०५२ सालमा स्थापना भएको मञ्चले सुरुका वर्ष पनि अवार्ड आयोजना गरेको थियो ।

कमलादीस्थित प्रज्ञाभवनमा हुने अवार्डमा २०७८ सालभर नेपाली खेलकुदमा योगदान पुर्‍याउने खेलाडी, प्रशिक्षक र खेलकर्मीलाई सम्मान गरिने मञ्चले जनाएको छ ।

उक्त अवार्डका लागि मुख्य प्रायोजकको रूपमा रहेको हंशराज हुलासचन्द एन्ड कम्पनी प्रालिसँग मञ्चले सम्झौता नवीकरण गरेको छ । पल्सरसँग यो १४ औं वर्ष अवार्डका लागि सहकार्य भएको मञ्चले जनाएको छ ।

मञ्चका अध्यक्ष दुर्गानाथ सुवेदी र मुख्य प्रायोजक हंशराज हुलासचन्दका प्रबन्ध निर्देशक अभिमन्यू गोल्छाले प्रायोजना सम्झौतापत्रमा हस्ताक्षर गरेका छन् । निर्देशक गोल्छाले नेपाललाई विश्वमाझ देशको पहिचान राख्ने खेलकुद उत्तम माध्यम भएकाले यसै क्षेत्रमा नै योगदान गरेका खेलकर्मीको सम्मानमा जोडिँदै आएको बताए । उनले युवाका लागि खेलकुद र पल्सर एकअर्काको परिपूरक जस्तै भएको स्मरण गराए ।

यसपालि पल्सर स्पोर्ट्स अवार्डमा कुल ९ विधामा अवार्ड प्रदान गरिने मञ्चका महासचिव प्रज्वल ओलीले जानकारी दिए । वर्षका उत्कृष्ट पुरुष खेलाडी, महिला खेलाडी, युवा खेलाडी र उत्कृष्ट प्रशिक्षकसहित पिपल्स च्वाइस अवार्ड, पारा एथलिट सम्मान, स्पेसल अवार्ड, लाइफटाइम एचिभमेन्ट अवार्ड र एसियन स्पोर्ट्स जर्नालिस्ट अवार्ड छन् ।

पुरुष, महिला, युवा, प्रशिक्षक र पिपल्स च्वाइस गरी पाँच विजेताले पल्सर मोटरसाइकल पाउनेछन् । यस वर्षदेखि युवा विजेतालाई पनि मोटरसाइकल प्रदान गरिने मञ्चले जनाएको छ । अरू विधाका विजेताले जनही ५० हजार रुपैयाँ पाउनेछन् ।

स्पोर्ट्स अवार्डका लागि मञ्चले सम्पूर्ण तयारी सुरु गरिसकेको र अर्को साता पिपल्स च्वाइसको मनोनयन पनि सार्वजनिक गरिने अध्यक्ष सुवेदीले बताए । उनले अर्थतन्त्र नै शिथिल रहेको अवस्थामा पनि हंशराज हुलासचन्दबाट सहकार्य निरन्तरता हुनु समग्र खेलकर्मीकै लागि सुखद पक्ष रहेको बताए । पूर्वअध्यक्ष एवम् एआईपीएस एसियाका कोषाध्यक्ष निरञ्जन राजवंशीले अवार्ड समग्र नेपाली खेलकर्मीलाई नै एकै ठाउँमा उभ्याउने माध्यम बनिरहेको स्मरण गराए ।

अघिल्लो वर्ष कोरोना महामारीका कारण यो अवार्ड दशक अवार्डको रूपमा आयोजना भएको थियो । त्यसमा दशकमा उत्कृष्ट प्रदर्शन गरेका खेलाडी, प्रशिक्षकलाई सम्मानित गरेको थियो । क्रिकेटका पारस खड्का, फुटबलकी सावित्रा भण्डारी र प्रशिक्षकमा क्रिकेटका जगत टमाटाले दशक अवार्ड जितेका थिए । पिपल्स च्वाइसमा टेबलटेनिसकी एलिना महर्जन बाजी मारेकी थिइन् ।

प्रकाशित : माघ १०, २०७९ ०७:१०
पूरा पढ्नुहोस्
प्रतिक्रिया
पठाउनुहोस्
×