काठमाडौँ — सन् १९४६ मा आजकै दिन (जनवरी १०) मा बेलायतको राजधानी लन्डनस्थित वेस्टमिनिस्टर सेन्ट्रल हलमा संयुक्त राष्ट्रसंघको पहिलो महासभा सुरु भएको थियो । उक्त महासभामा ५१ देशका प्रतिनिधिहरू सहभागी थिए ।

त्यसको एक सातापछि राष्ट्रसंघीय सुरक्षा परिषद्को पहिलो बैठकले यसका नियम तथा प्रक्रियाहरू स्थापित गरेको थियो । महासभाले जनवरी २४ मा पहिलो प्रस्ताव पारित गर्दै परमाणु ऊर्जाको शान्तिपूर्ण उपयोग हुनुपर्ने आह्वान गर्दै आम विनाशकारी परमाणु हतियारको उन्मूलनको पक्षमा निर्णय गरेको थियो । १ सय ९३ सदस्य रहेको राष्ट्रसंघले हाल विश्वमा शान्ति र सुरक्षा, मानवअधिकारको संरक्षण र सम्वर्द्धन, मानवीय सहयोग तथा दिगो विकास र जलवायुलगायत क्षेत्रमा महत्त्वपूर्ण भूमिका निर्वाह गर्दै आएको छ । राष्ट्रसंघीय बडापत्रअनुसार सबै सदस्य राष्ट्रहरू सार्वभौमिक सत्तासम्पन्न र समान रहेका र कुनै पनि सदस्य राष्ट्रले अरू राष्ट्रको प्रदेश तथा राजनीतिक स्वतन्त्रताविरुद्ध शक्तिको प्रयोग वा धम्की नगर्ने उल्लेख छ ।