नयाँदिल्ली — भारतीय अधिकारीहरूले कोभिड–१९ को तेस्रो लहर रोक्नका लागि तयारी सुरु गरिसकिएको जनाएका छन् । पुनेस्थित भारतकै पुरानो जिनोम सिक्वेन्सिङ केन्द्र नेसनल इन्स्टिच्युट अफ भाइरोलोजी (एनआईभी) का विशेषज्ञलाई पछिल्ला दिनमा भ्याइनभ्याइ छ । 

ओमिक्रोन भेरिएन्टको फैलावट तीव्र बनिरहेका बेला एनआईभीजस्ता प्रयोगशालामा दैनिक करिब सयवटा नमुनाको परीक्षण गर्ने गरिएको छ । पहिलाको तुलनामा हाल ५ गुना बढी नमुना परीक्षणका लागि पठाइने गरिएको एनआईभीकी एक वरिष्ठ वैज्ञानिक डा. वर्षा पोतदारले बताइन् । उनका अनुसार हावा नछिर्ने कोठामा विशेषज्ञहरूले संक्रमणबाट जोगिने पहिरन लगाएर परीक्षण गर्ने गर्छन् ।

‘परीक्षणको नतिजा छिटो दिन हामीहरूलाई यतिखेर निकै दबाब छ । हामीले यो काम छिटो गर्ने प्रयास गर्छौ, तर यो तत्काल हुने प्रक्रिया होइन,’ पोतदारले भनिन् । नमुनालाई सिक्वेन्सिङ गर्ने उपकरणमा राख्नका लागि तयार पार्न नै घण्टौं लाग्ने उनको भनाइ छ । परीक्षका लागि प्रयोग हुने उपकरणले निकाल्ने तथ्यांक सबैभन्दा पहिले कोभिड–१९ को प्रकारसँग तुलना गरिन्छ । र त्यसका आधारमा भेरिएन्टबारे टुंगो लगाउने गरिन्छ । 

यस वर्षको सुरुमा देखिएको डेल्टा भेरिएन्टबारे समयमै पर्याप्त विवरण नदिएको भन्दै भारतको निकै आलोचना भएको थियो । भारतबाट सुरु भएको डेल्टा भेरिएन्ट निकै छिटो समयमा नै विश्वभर फैलिएको थियो । ‘त्यसबाट हामीले निकै सिक्यौं,’ एनआईभीका निर्देशक डा. प्रिया अब्राहमले भनिन् । ‘हाम्रो प्रयास अब यसलाई सकभर फैलन नदिने रहन्छ । किनकि यससलाई जति फैलिने अवसर दिइन्छ, त्यति नै धेरै नयाँ भेरिएन्ट देखापर्ने सम्भावना बढ्छ ।’ तर जनसंख्याका कारण रोकथाम गर्न नसकिने उनको बुझाइ छ । 

‘हामी अमेरिका वा बेलायतजस्तो विकसित छैनौं । उनीहरूको जस्तो पूर्वाधारको पनि कमी छ । तर हामी सबै जना सचेत रहनुपर्छ,’ उनले भनिन् । भारतको आधाभन्दा धेरै वयस्क जनसंख्याले पूर्ण मात्राको खोप लगाइसकेकाले पनि स्वास्थ्यकर्मीहरू केही ढुक्क छन् । तर ठूलो जनसंख्या भएकाले भारतका करोडौं मानिसहरू अझै जोखिममा छन् । ओमिक्रोनका कारण तेस्रो लहर फैलिएको खण्डमा संक्रमितको चाप धान्न नसकिने चिकित्सकहरूले चेतावनी दिएका छन् ।