भारतीय कम्पनीले बढाए कोरोना खोपको मूल्य- विश्व - कान्तिपुर समाचार
कान्तिपुर वेबसाईट
AdvertisementAdvertisement

भारतीय कम्पनीले बढाए कोरोना खोपको मूल्य

नेपालले हालसम्म सेरमबाट मात्र खोप किनेको छ । कम्पनीले सार्वजनिक गरेको पछिल्लो रेटअनुसार यदि निजी अस्पतालहरुले नै पाएको मूल्यमा पाए पनि अब कोभिसिल्ड कम्तीमा पचास प्रतिशतले महँगो पर्नेछ ।
सुरेशराज न्यौपाने

नयाँदिल्ली — भारतका दुई खोप उत्पादक कम्पनीले कोरोना भाइरसविरुद्धको खोपको नयाँ मूल्य तोकेका छन् । भारतमा सेरम इन्स्टिच्युटले कोभिसिल्ड र भारत बायोटेकले कोभ्याक्सिन खोप उत्पादन गर्दै आएका छन् ।

बायोटेकले शनिबार कोभ्याक्सिनको राज्य सरकारहरु, निजी अस्पताल र निर्यात गर्ने गरी तीनथरी मूल्य सार्वजनिक गरेको छ । जसअनुसार राज्य सरकारहरुले प्रतिडोज ६ सय भारु, निजी अस्पतालले प्रतिडोज १ हजार २०० भारु तिर्नुपर्ने छ । त्यसैगरी निर्यात मूल्य भने १५ देखि २० डलर तय गरिएको छ । सेरमले बेलायतको अक्सफोर्ड विश्वविद्याल र एस्ट्राजेनेकाले संयुक्त रुपमा विकास गरेको खोपलाई कोभिसिल्डको नाममा उत्पादन गरेको हो । कोभ्याक्सिन भने हैदराबादस्थित बायोटेक आफैले विकास गरेको हो ।

सेरमले अघिल्लो बुधबार नै खोपको मूल्य सार्वजनिक गरिसकेको छ । कम्पनीले कोभिसिल्डको मूल्य प्रतिडोज राज्य सरकारका लागि ४ सय भारु र निजी अस्पतालका लागि ६ सय भारु तोकेको छ । सेरमले यसअघि भारत सरकारलाई भने प्रतिडोज १ सय ५० भारुमा खोप दिएको थियो । र, नेपाललाई प्रतिडोज चार डलरमा दिएको थियो । कम्पनीले निर्यात मूल्य भनेर विश्व बजारका लागि छुट्टै मूल्य भने तय गरेको छैन ।

नेपालले हालसम्म सेरमबाट मात्र खोप किनेको छ । कम्पनीले सार्वजनिक गरेको पछिल्लो रेटअनुसार यदि निजी अस्पतालहरुले नै पाएको मूल्यमा पाए पनि अब कोभिसिल्ड कम्तीमा पचास प्रतिशतले महँगो पर्नेछ । नेपालले खोप अभियान सुरु गर्न सेरमसँग २० लाख डोजका लागि उक्त दरमा सम्झौता गरेको थियो । तर, पछि थप पचास लाख डोजका लागि पनि प्रक्रिया अगाडि बढाएको थियो । तर, नेपालले २० लाख डोज कोभिसिल्ड खोपका लागि ८० प्रतिशत रकम अग्रिम भुक्तानी पठाए पनि दोस्रो खेपको दस लाख खोप अझै आपूर्ति भएको छैन ।

कम्पनीले खोपको अत्यधिक माग भएकाले आपूर्ति गर्न नसकिएको जवाफ दिँदै आएको छ । सममयमै आपूर्ति गरिदिन नेपालले कम्पनीलाई सिधै र सरकारी तहमा पनि पटकपटक आग्रह गरिसकेको छ । चैतको अन्तिम साता परराष्ट्रमन्त्री प्रदीप ज्ञवालीले भारतीय समकक्षी एस जयशंकरलाई फोन गरेर पुन: खोप पठाउन आग्रह गरेका थिए । परराष्ट्रका अधिकारीहरुका अनुसार उक्त फोनर्वातामा भारतीय पक्षबाट वैशाखको दोस्रोसम्म बाँकी खोप पठाउन प्रयास गर्ने आश्वासन दिएको थियो ।

समयमा खोप आपूर्ति नहुँदा नेपालको खोप अभियान नै अवरुद्ध हुन पुगेको छ । सम्झौताअनुसारको खोप नै नआएपछि सेरमबाट थप पचास लाख डोज किन्ने प्रक्रिया पनि अगाडि बढ्न सकेन । मूल्यको कारण देखाएर सेरम आफैले पनि चासो नदेखाएको स्वास्थ्य मन्त्रालयका एक उच्च अधिकारीको भनाइ छ । उनका अनुसार पछिल्लो समय सेरमले अनौपचारिक रुपमा पहिलेको मूल्य पुनरावलोकन गर्नुपर्ने र त्यसमाथि एजेन्टलाई समेत कमिसन दिनुपर्ने सर्त राखेको छ।

भारत सरकारले ‘भ्याक्सिन मैत्री’ नीति अन्तर्गत दस लाख डोज कोभिसिल्ड नेपाललाई अनुदानमा दिएको थियो । पछि थप एक लाख डोज कोभिसिल्ड नेपाली सेनालाई भनेर पनि दिएको थियो । त्यसबाहेक विश्व स्वास्थ्य संगठनको कोभ्याक्स कार्यक्रमबाट नेपालले थप ३ लाख ४८ हजार डोज पाएको थियो । नेपाल सरकारले हालसम्म कोभिसिल्ड र कोभ्याक्सिनका साथै चिनियाँ खोप भेरोसेल र रुसी खोप स्पुतनिक–५ लाई मात्र आपत्कालीन प्रयोगका लागि अनुमति दिएको छ ।

प्रकाशित : वैशाख १२, २०७८ १०:३०
प्रतिक्रिया
पठाउनुहोस्

हिमपातले यार्सा संकलन भएन

कान्तिपुर संवाददाता

बझाङ — लेकाली क्षेत्रमा दैनिकजसो हिमपात हुन थालेपछि यार्सा संकलनका लागि उच्च हिमाली पाटनमा पुगेका संकलकहरू घर फर्किन थालेका छन् । यार्सा संकलन क्षेत्र हिउँले ढाकेपछि यार्सा टिप्न भनेर पाटन उक्लिएकाहरू जाडो छल्न बेसी झर्न थालेका हुन् ।

पाटनमा हिउँ परेपछि यार्सा संकलन क्षेत्रबाट गाउँतर्फ फर्किंदै गरेका सुर्मा गाउँपालिकाका संकलकहरू । तस्बिर सौजन्य : पवित्रा बोहरा

‘सबैतिर हिउँ जमेको छ । यार्सा टिप्ने ठाउँ सबैतिर हिउँले छोपेको छ,’ यार्सा संकलनका लागि पाटन पुगेर फर्किएका बझाङको छबिस पाथीभेरा गाउँपालिकाको बुडखोरीका बालु धामीले भने ‘सबैतिर डेढ/ दुई फिट हिउँ छ, जाडोले बस्न नसकेर फर्केर आयौं ।’ उनले गत शनिबारदेखि सुरु भएको हिमपात नरोकिएकाले आफूसहित बुडखोरीबाट यार्सा संकलनका लागि गएका ५५ जनाको टोली फर्किएको बताए । ‘हिउँ पर्न रोकिएको एक सातापछि मात्रै पाटन जाने सोच बनाएका छौं । अहिले त त्यहाँ को बस्न सक्ने ?’ उनले भने ।

लामो समयसम्म खडेरी परेको बझाङमा वैशाख ४ गतेदेखि निरन्तर वर्षा भैरहेको छ । बेंसी क्षेत्रमा वर्षा भए पनि लेकाली र उच्च हिमाली भेगमा भने भारी हिमपात भएकाले यार्सा संकलन कार्य प्रभावित भएको हो । दिनहुँजसो भैरहेको हिमपातले साइपाल गाउँपालिकामा पर्ने माझा, फरालखेत, कालापानी, राइढुंगी स्याङवनलगायतका यार्सा संकलन क्षेत्र सेताम्मे छन् । यस्तै सुर्मा गाउँपालिकाअन्तर्गतका जलजला, डाँफेचुली, तपोवन, डांँडा, निलखट्टी, ठाडे, जर्सी, गोलढुंगालगायतका क्षेत्रमा पनि बाक्लो हिउँ जमेको स्थानीयले बताएका छन् । यार्सा टिप्नका लागि भने चैत अन्तिमतिरै पाटन पुगेका केही संकलकहरू पनि सामल सकिन लागेकाले फर्किएको बताउँछन् ।

प्रकाशित : वैशाख १२, २०७८ १०:२७
पूरा पढ्नुहोस्
प्रतिक्रिया
पठाउनुहोस्
×