बेइजिङमा अब घरबाहिर निस्कँदा मास्क लगाउन नपर्ने- विश्व - कान्तिपुर समाचार

बेइजिङमा अब घरबाहिर निस्कँदा मास्क लगाउन नपर्ने

एजेन्सी

बेइजिङ — चीनको राजधानी बेइजिङका बासिन्दा अब घरबाहिर निस्कँदा अनिवार्य रुपमा मास्क लगाउन नपर्ने भएको छ । सरकारको नयाँ मापदण्डअनुसार बेइजिङका बासिन्दाले बिहीबारदेखि अर्को व्यक्तिसँग नजिकै जानुपर्दा बाहेक मास्क लगाउनु नपर्ने व्यवस्था गरिएको हो ।

फाइल फोटो : रोयटर्स

बेइजिङ रोग नियन्त्रण तथा रोकथाम केन्द्रले बिहीबारदेखि नयाँ नियम लागू गरेको हो । कोरोना भाइरसको संक्रमण नियन्त्रणमा रहेको भन्दै चीनमा पछिल्ला दिनमा विभिन्न प्रतिबन्धहरु हटाइँदै लगिएको छ । केही दिनअघि मात्रै हुबेईको वुहानमा एउटा स्विमिङ पुलमा भएको पार्टीमा सयौं मानिस सहभागी भएको तस्बिर सार्वजनिक भएको थियो ।

चिनियाँ राष्ट्रिय स्वास्थ्य आयोगका अनुसार पछिल्लो २४ घण्टामा चीनमा थप २२ जनामा मात्रै कोरोना संक्रमण पुष्टि भएको छ । बेइजिङमा भने पछिल्लो २४ घण्टामा संक्रमण देखिएको छैन ।

नयाँ नियमअनुसार बेइजिङमा अरु मानिससँग एकदमै नजिक(क्लोज कन्ट्याक्ट) मा जानुपर्ने भए मात्रै मास्क लगाउनुपर्ने छ । बालबालिकालाई भने अभिभावकको निगरानीमा लिएर हिँड्नुपर्नेछ । सार्वजनिक स्थानमा थुक्न भने कडा प्रतिबन्ध लागू गरिएको छ ।

यसअघि बुधबार चिनियाँ अधिकारीहरुले करिब ४ महिनादेखि कोरोना संक्रमणबाट चीनमा कसैको पनि मृत्यु नभएको बताएका थिए ।

प्रकाशित : भाद्र ५, २०७७ १२:४७
प्रतिक्रिया
पठाउनुहोस्

सन्देशमूलक गीत गाएर अस्पतालमै मनाए नर्सले तीज

सन्जु पौडेल

तिलोत्तमा, रुपन्देही — लुम्बिनी प्रादेशिक अस्पताल, बुटवलका नर्सले अस्पतालमै तीज मनाएका छन् । उनीहरुले कोरोनाबाट बच्ने सन्देशमूलक गीत गाउँदै तीज मनाएका हुन् ।

कोरोना महामारीमा दिनरात जनताको उपचारमा खटिएका नर्सले चाडपर्वमा पनि जनतालाई सचेत गराउने गरी तीज गीत गाएर महामारीविरुद्ध सन्देश छरेको अस्पतालकी नर्सिङ इन्चार्ज ज्योति पौडेलले बताइन् ।

उनले कोरोनाभाइरस संक्रमण बढ्दै गएकोले घरमै बसेर तीज पर्व मनाउन आग्रह गर्दै अस्पतालबाटै ड्युटीमा खटिएका नर्सले गीत गाएर कोरोनाबाट बच्ने सन्देश दिइएको बताइन् । गीतमा संक्रमणबाट जोगिन सरसफाइमा ध्यान दिने, बिनाकाम बाहिर ननिस्कने, घरभित्रै बस्ने, मनोबल उच्च राख्ने, साबुनपानीले हात धुने, पौष्टिक आहार खाने जस्ता सन्देश समेटिएको थियो ।

प्रदेश ५ को सामाजिक विकास मन्त्रालयका प्रवक्ता डा. पुष्पराज पौडेलले नर्सहरूलाई जनचेतनामूलक गीत गाउन निर्देशन दिएका थिए ।सोही आग्रहबमोजिम नर्सले गीत गाएर रेकर्ड गरिएको भिडियो सामाजिक विकास मन्त्रालयले बिहीबारको कोरोना लाइभ अपडेट प्रेस मिटबाट प्रसारणसमेत गरेको थियो ।

प्रकाशित : भाद्र ५, २०७७ ११:४४
पूरा पढ्नुहोस्
प्रतिक्रिया
पठाउनुहोस्
×