सिंगापुरले सबै नागरिकलाई ‘कन्ट्याक्ट ट्रेसिङ डिभाइस’ बाँड्ने
सिंगापुर — कोरोना भाइरस संक्रमणको ट्रेसिङका लागि सिंगापुर सरकारले प्रत्येक नागरिकलाई ‘डिभाइस’ बाँड्ने योजना अघि सारेको छ ।
कोरोना भाइरस संक्रमणको प्रभावकारी कन्ट्याक्ट ट्रेसिङका लागि सिंगापुर सरकारले सबै नागरिकलाई लगाएर हिँड्न मिल्ने ‘डिभाइस’ बाँडिने सिंगापुरको ‘स्मार्ट नेसन इनिसियटिभ’ का इन्चार्ज डाक्टर भिभियन बालाकृष्णनले जानकारी दिएका छन् । उनले शुक्रबार उक्त डिभाइसको परीक्षण भइरहेको र सफल भएर ५७ लाख नागरिकलाई बाँडिने बताएका हुन् ।
सिंगापुरले यसअघि कुनै संक्रमितको सम्पर्कमा आउलेबित्तिकै ‘अलर्ट’ गर्ने ‘ट्रेस टुगेदर’ नामक मोबाइल एपको विकास गरिसकेको छ । ब्लू–टूथमा आधारित यो डिभाइसको प्रयोग भने कम भएको छ । यो एपका लागि मोबाइल अनिवार्य चाहिने तर नयाँ डिभाइसका लागि मोबाइल नचाहिले डाक्टर बालाकृष्णनले बताएका छन् । यो डिभाइस ब्याट्रीबाट चल्ने र लगाएर हिँड्न सहज हुने भएकाले प्रभावकारी हुने दाबी गरे । वास्तविक कन्ट्याक्ट ट्रेसिङ हुन नसक्दा कोरोना संक्रमितको पहिचानमा समस्या भएको बताउँदै बालाकृष्णनले नयाँ डिभाइसको परीक्षण सफल भए निकै ठूलो उपलब्धि हुने बताए ।
सिंगापुरमा हालसम्म ३६ हजार ९ सय जनामा कोरोना संक्रमण पुष्टि भएको छ । सिंगापुरमा हालसम्म २४ जनाको मृत्यु भएको छ भने २३ हजार ९ सय ४ जना निको भएका छन् ।
प्रकाशित : जेष्ठ २३, २०७७ १३:२२