न्युयोर्ककाे चिडियाखानाको बाघमा कोरोना भाइरस देखियो- विश्व - कान्तिपुर समाचार

न्युयोर्ककाे चिडियाखानाको बाघमा कोरोना भाइरस देखियो

एजेन्सी

वासिङ्टन —  कोरोना भाइरस (कोभिड–१९) को संक्रमणबाट अति प्रभावित अमेरिकी सहर न्युयोर्कस्थित ब्रोन्स चिडियाखानामा रहेको एक चार वर्षको मलायन पोथी बाघमा पनि कोरोना भाइरस ‘पोजिटिभ’ पाइएको छ । 

आयोवास्थित राष्ट्रिय भेटेरिनरी सेवाको प्रयोगशालाले बाघमा कोरोना भाइरसको संक्रमण पुष्टि गरेको चिडियाखानाले जनाएको छ । चिडियाखानामा काम गर्ने व्यक्तिबाट बाघमा संक्रमण फैलिएको हुनसक्ने आशंका गरिएको छ । ‘हामीले अति सावधानीपूर्वक बाघको परीक्षण गरेका छौं र कोभिड–१९ बारे प्राप्त यो ज्ञान नोवल कोरोना भाइरसलाई बुझ्नका लागि विश्वले गरिरहेको प्रयासलाई योगदान गर्ने विश्वास दिलाउन चाहन्छौं,’ चिडियाखानाले आइतबार जारी गरेको विज्ञप्तिमा भनिएको छ ।


भाइरस संक्रमणका कारण बाघको आहार घटेको छ । यद्यपि भेटेरिनरी सेवाअन्तर्गत रहेको बाघ तेजिलो र चनाखो नै रहेको चिडियाखानाले बताएको छ । विभिन्न जनावरले नयाँ संक्रमणलाई विभिन्न तरिकाले प्रतिक्रिया जनाउने हुँदा बाघ र सिंहजस्ता जनावरमा भाइरस कसरी विकसित हुन्छ भन्ने अझै अज्ञात रहेको भन्दै चिडियाखानाले सबै जनावरलाई नजिकबाट नियाल्ने जनाएको छ । चिडियाखानाका अन्य ठूला जनावरमा भने भाइरसको कुनै लक्षण नदेखिएको विज्ञप्तिमा उल्लेख छ ।


न्युयोर्कमा कोरोना भाइरस संक्रमण फैलिएसँगै वन्यजन्तु संरक्षण समाजद्वारा सञ्चालित ब्रोन्ससहति चारवटै चिडियाखाना मार्च १६ बाट बन्द छन् । मानिसबाट जनावरमा कोरोना संक्रमण फैलिएकाले जनावरको संरक्षणका लागि थप कदम चालिने अधिकारीहरुले बताएका छन् ।

प्रकाशित : चैत्र २४, २०७६ ०६:५३
प्रतिक्रिया
पठाउनुहोस्

विदेशबाट आएका ६१ हजारको मात्रै पहिचान

भारतबाट कति मानिस आए भन्ने छैन जानकारी, पहिचान र खोजीलाई तीव्रता दिन स्थानीय तहलाई परिपत्र
राजेश मिश्र

काठमाडौँ — कोरोना भाइरस (कोभिड–१९) को संक्रमण फैलिएयता नेपालमा भारत तथा अन्य मुलुकबाट आएकामध्ये ६१ हजार व्यक्तिको पहिचान गरिएको छ । त्यसमध्ये ५८ हजार ५ सय जना स्थानीय तहको निगरानीमा छन् । उनीहरु कतिपय सेल्फ र कतिपय सार्वजनिक रूपमा व्यवस्थापन गरिएको क्‍वारेन्टाइनमा बसिरहेका छन् ।

वडास्तरमा थालिएको अभिलेखीकरणबाट ती व्यक्तिहरुको पहिचान भएको हो । भारतबाट मात्रै हजारौंको संख्यामा नेपालीहरु आएकाले यो संख्या पूर्ण भने होइन । भारतसँगको खुला सिमाना र त्यता आउजाउ गर्ने मानिसको अभिलेख नराख्ने व्यवस्थाका कारण भारतबाट यसबीचमा कति मानिस आए भन्ने जानकारी सरकारका कुनै पनि निकायसँग छैन । गृह प्रवक्ता सहसचिव केदारनाथ शर्माले भारतबाट भित्रिएका व्यक्तिहरुको यकिन तथ्यांक नरहेको जनाए । प्रहरी, प्रशासन र स्थानीय तहले ती व्यक्तिहरुको पहिचान गर्ने काम गरिरहेको उनको भनाइ छ ।

अध्यागमन विभागका अनुसार त्रिभुवन अन्तर्राष्ट्रिय विमानस्थल हुँदै मार्च महिना (फागुन १८ देखि चैत १० सम्म) मा १ लाख व्यक्ति नेपाल आएका छन् । त्यसमध्ये विदेशी नागरिकको संख्या ३४ हजार छ । चैत १० को रातिबाट विमानस्थल हुँदै विदेशबाट यात्रु आउने क्रम पूर्णरूपमा बन्द रहेको अध्यागमन विभागका महानर्देशक रमेश केसीले बताए । चैत १ देखि १० सम्म विमानस्थल हुँदै आएका नेपालीको संख्या १९ हजार पाँच सय ३१ छ । यो अवधि (चैत) मा २ हजार २७ जना विदेशी नेपाल आएको तथ्यांक छ ।

विदेशबाट आएका नेपालीहरुलाई अनिवार्य क्‍वारेन्टाइनमा नराखिएकाले उनीहरुको पनि पहिचान र खोजीकार्य जारी रहेको संघीय मामिला तथा समान्य प्रशासन मन्त्रालयका प्रवक्ता सहसचिव वसन्त अधिकारीले जानकारी दिए । ‘स्थानीय तहहरुले आइतबारसम्म मन्त्रालयमा पठाएको संख्या ६१ हजार हो,’ उनले भने, ‘देशैभर वडास्तरमै विदेशबाट आएकाहरुको खोजी गरी क्‍वारेन्टाइनमा राख्ने क्रम जारी छ ।’ विदेशबाट आएका व्यक्तिबाट उनका आफन्तमा तथा भारतबाट लुकीछिपी प्रवेश गरेका एक जनामा कोभिड–१९ को संक्रमण पाइएपछि विदेशबाट आएकाको पहिचान गर्ने कार्यलाई तीव्रता दिइएको छ । मन्त्रालयले आइतबार सबै स्थानीय तहलाई विदेशबाट आएका व्यक्तिहरुको यथाशीघ्र पहिचान गरी दैनिक जानकारी गराउन परिपत्र गरेको छ । भारतको नयाँदिल्लीस्थित निजामुद्दिनमा भएको धार्मिक सभामा सहभागी भएर फर्किएकाको समेत खोजी गरी क्‍वारेन्टाइनमा राख्न पनि भनिएको छ ।

मन्त्रालयले स्थानीय तहसँग समन्वय गर्नलाई प्रदेशगत रूपमा एक/एक जना उपसचिवहरुलाई जिम्मेवारी तोकेको छ । स्थानीय तहहरुले विदेशबाट आएकाको अभिलेखीकरण, उनीहरुको व्यवस्थापन, क्‍वारेन्टाइन, आइसोलेसन, एम्बुलेन्स व्यवस्थापन, स्वास्थ्यकर्मी परिचालन, सचेतनाका कार्यक्रम सञ्चालन गरिरहेका छन् । त्यस्तै, लकडाउनका कारण समस्यामा परेका अति विपन्न परिवारलाई राहत दिन उनीहरुको पहिचान गर्ने र राहत वितरणको कार्य पनि वडास्तरबाट प्रारम्भ भएको जानकारी प्रवक्ता अधिकारीले दिए ।

६० हजार परिवारलाई राहत
मन्त्रालयमा आइतबारसम्म प्राप्त विवरणअनुसार २ सय ४३ स्थानीय तहले राहत वितरण थालेका छन् । ६० हजार घरपरिवारले राहत पाइसकेका छन् । काठमाडौं महानगरले ८ हजार ९ सय परिवारलाई राहत दिएको छ । सबै स्थानीय तहमा विपद् राहत कोष सञ्चालनमा आइसकेको मन्त्रालयलले जनाएको छ ।

सरकारले स्थानीय तहको वडा कार्यालयमार्फत नै दैनिक ज्यालादारी मजदुर र विपन्न वर्गलाई राहत दिने भनेको छ । त्यसका लागि स्थानीय तहले कोष खडा गरी अर्थको व्यवस्था गर्नुपर्नेछ । अर्थ मन्त्रालयले राहत वितरणसम्बन्धी कार्यविधिको मापदण्ड बनाएर सबै निकायमा पठाइसकको छ ।

कृषि र खाद्यान्न उत्पादनमा बाधा नहुने
मन्त्रालयले मौसमअनुसारको तरकारी र विभिन्न बाली लगाउन तथा थन्क्याउन लागि किसानसँग सहजीकरण गर्नसमेत स्थानीय तहलाई भनेको छ ।

त्यस्तै, सुरक्षा र सतर्कताका प्रावधानहरु अपनाई विकास योजना, दैनिक उभयोग र खाद्यवस्तु उत्पादनका उद्योग, चिनी, चिया, पशुपन्छीको दाना र इँटा उद्योग सञ्चालन गर्न पाउने छन् । अधिकारीका अनुसार उच्च स्तरीय समितिको निर्णयअनुसार स्थानीय तहलाई त्यसमा पनि सहजीकरणका लागि आग्रह गरिएको छ ।

प्रकाशित : चैत्र २३, २०७६ २२:१७
पूरा पढ्नुहोस्
प्रतिक्रिया
पठाउनुहोस्
×