अमेरिकामा कोरोना संक्रमण बुलेट ट्रेनको गतिमा फैलिइरहेको छ : गभर्नर कोमो

एजेन्सी

न्युयोर्क — नोवल कोरोना भाइरस (कोभिड–१९) को संक्रमण पछिल्लो समय अमेरिकामा तीव्र रूपमा फैलिइरहेको छ ।न्युयोर्क राज्यका गभर्नर एन्ड्रयु कोमोले कोभिड–१९ को संक्रमण ‘बुलेट ट्रेन’ भन्दा तीव्र गतिमा फैलिरहेको भन्दै औषधोपचार सामग्रीको आपूर्तिका लागि आग्रह गरिसकेका छन् । पत्रकारहरूसँग बोल्दै उनले संक्रमणको दर सोचेभन्दा निकै तीव्र र उच्च रहेको जनाए ।

संघीय सरकारले आवश्यक सामग्री पठाउन नसकेको उनको गुनासो छ । उनका अनुसार न्युयोर्कमा हाल कम्तीमा ३० हजारवटा भेन्टिलेटर आवश्यक भए पनि ७ हजारवटा मात्र छन् । संघीय सरकारले जम्मा ४ हजारवटा मात्र भेन्टिलेटर पठाएकोमा उनले आलोचना गरे ।


न्यूयोर्क सिटी अस्पतालमा कार्यरत एक चिकित्सकले सीएनएनसँगको कुराकानीमा स्थिति भयावह भएको बताएका छन् । दुई हप्ताअघि र अहिलेको अवस्थामा आकाश जमिनको फरक भएको पनि बताएका छन् । कोरोना भाइरस संक्रमणको आशंकामा अमेरिकी अस्पतालमा मानिसहरुको भीड लागेको छ । स्रोत साधन नहुँदा आफूहरुलाई काम गर्न निकै कठिन भएको ती चिकित्सक बताउँछन्, ‘हामीसँग मेसिन छैन, हामीसँग बेड पनि छैन । भन्न त हामी न्यूयोर्कमा बसिरहेका छौँ भन्छौं तर अवस्था यस्तो छ । यहाँको अवस्था गरिब देशहरुको जस्तै छ,’ ती चिकित्सकले भने ।


तर अमेरिकी राष्ट्रपति डोनाल्ड ट्रम्पले अर्को महिना अमेरिका व्यापारका लागि खुला हुने आशा व्यक्त गरेका छन् । उनले इस्टरको खुसियालीसँगै कोभिड–१९ को संक्रमण हट्ने दाबी गरेका छन् । राष्ट्रपति कार्यालय ह्वाइटहाउसमा पत्रकारसँग बोल्दै ट्रम्पले ‘अमेरिकाका लागि आगामी महिना निकै सुन्दर हुने’ बताए ।


राष्ट्रपति ट्रम्पले भने, ‘हाम्रा निर्णय वास्तविक तथ्यमा आधारित हुनेछन् । इस्टर पर्वसम्ममा सबै अमेरिकीहरू आ–आफ्ना काममा फर्किनेमा म आशावादी छु । तर कुनै पनि निर्णय अमेरिकीहरूको स्वास्थ्य र सुरक्षामा आधारित भएर गरिनेमा म सबैलाई आश्वस्त पार्न चाहन्छु ।’


त्यसको केही समयमा माथिल्लो सदन सिनेट र ह्वाइटहाउसबीच अमेरिकाको अर्थतन्त्रको बचाउनका लागि २० खर्ब डलरको छुट्याउने सहमति भएको बीबीसीले जनाएको छ । उक्त सम्झौता सिनेटबाट बिहीबार पारित हुने जनाइएको छ ।


अमेरिकामा हालसम्म हालसम्म करिब ६८ हजारभन्दा बढीलाई कोभिड–१९ को संक्रमण दखिइसकेको छ । तीमध्ये २५ हजार न्युयोर्कका छन् । विश्व स्वास्थ्य संगठन (डब्लूएचओ) ले कोभिड–१९ को संक्रमण तीव्र रूपमा फैलिइरहेको जनाउँदै अमेरिका प्रकोपको अर्को केन्द्र हुने चेतावनी दिइसकेको छ । बिहीबार बिहानसम्म अमेरिकामा १ हजार २७ जनाको मृत्यु भइसकेको छ । पछिल्लो २४ घण्टामा मात्रै अमेरिकामा २४७ जनाको मृत्यु भएको छ ।


संगठनले हालसम्म ४ लाखभन्दा बढी मानिसलाई कोभिड–१९ भइसके पनि यसको संक्रमणको गति रोक्न सकिने जनाएको छ । जेनेभामा पत्रकारहरूसँग बोल्दै डब्लूएचओ प्रमुख डा. टेड्रोस एड्हानोम गेहब्रेयससले हालसम्म संसारभर ४ लाख मानिसमा कोभिड–१९ को संक्रमण पुष्टि भइसके पनि यसको गति रोक्न मानिस आफैं सजग हुनुपर्ने बताए ।


सन् २०१९ को डिसेम्बर ३१ मा पहिलो पटक देखिएको कोभिड–१९ को संक्रमण ६७ दिनमा १ लाख मानिसमा देखिएको थियो । त्यसको ११ दिनमै थप १ लाख व्यक्तिमा यसको संक्रमण देखियो । तर अर्को १ लाखमा भने चार दिनमै ३ लाख पुग्यो ।


‘आइसोलेसनको विकल्प छैन’

गेहब्रेयससले मानिसलाई हिँडडुलमा मात्र रोक लगाएर यसको प्रकोपबाट बच्न नसकिने प्रस्ट पारेका छन् । उनले प्रत्येक संक्रमण परीक्षण गरेर तथा संक्रमितको सम्पर्कमा पुगेका सबैलाई आइसोलेसनमा राख्नु कोभिड–१९ विरुद्धको लडाइँका लागि निकै महत्त्वपूर्ण हुने बताए ।


गेहब्रेयससले फ्रान्सका राष्ट्रपति एमानुएल म्याक्रों र उनका चिनियाँ समकर्क्षी सी चिनफिङले आह्वान गरेको जी–२० समूहको आकस्मिक शिखर सम्मेलनमा डब्लूएचओलाई पनि बोलाइएको बताए । उनका अनुसार कोभिड–१९ थप फैलन नदिन तथा नियन्त्रणका उपायबारे पनि बैठकमा छलफल हुनेछ ।


यसैबीच, संयुक्त राष्ट्रसंघले कोभिड–१९ को फैलँदो प्रकोपसँग जुध्न विश्वका जुनसुकै स्थानमा जारी द्वन्द्वका पक्षलाई युद्धविराम गर्न आह्वान गरेको छ । राष्ट्रसंघ महासचिव एन्टोनियो गुटेरेसले ७५ वर्ष लामो राष्ट्रसंघको इतिहासकै कोभिड–१९ अभूतपूर्व स्वास्थ्य संकटका रूपमा देखिएको जनाए ।


गुटेरेसले विश्वका गरिब तथा द्वन्द्वको स्थितिमा रहेको देशका मानिस सबैभन्दा नराम्ररी प्रभावित हुने भन्दै चिन्ता व्यक्त गरे । उनले विकसित देशका नेताहरूलाई तत्काल र संयोजित प्रतिक्रिया देखाउन एकताबद्ध हुन आह्वान गरे ।


आर्थिक मन्दीको त्रास

विश्वका अग्रणी अर्थतन्त्र तथा वित्तीय संस्थाहरूले कोभिड–१९ का कारण संसार हुन सक्ने लामो आर्थिक मन्दीबाट जोगाउन सहयोगका लागि आफूहरू तयार रहेको बताएका छन् । अमेरिकाको केन्द्रीय बैंक फेडरल रिजर्भले ऐतिहासिक कदम चाल्दै कर्पोरेट ऋण किनिदिने तथा घरेलु सापटी प्रवाहलाई भरथेग गर्ने जनाएको छ ।


जर्मनीले आफ्नो अर्थतन्त्रमा परेको असर कम गर्न ८ सय अर्ब डलर खर्च गर्ने घोषणा गरेको छ । विश्व बैंकले विकासोन्मुख देशहरूलाई कोभिड–१९ को प्रकोपको मार थेग्न १ सय ५० अर्ब डलर सहायता दिने जनाएको छ । प्रकाशित : चैत्र १३, २०७६ ०८:१५

ADVERTISEMENT
प्रतिक्रिया
पठाउनुहोस्

सुरक्षा गस्ती बढाइयो

भारतबाट छिरेकालाई विशेष निगरानी गर्न निर्देशन
मातृका दाहाल

काठमाडौँ — लकडाउन उल्लंघन बढ्न थालेपछि सहरी क्षेत्र र भारतीय सीमा नाकामा सुरक्षा गस्ती बढाइएको छ । एक साताका लागि गरिएको लकडाउन बढ्न सक्ने अनुमान गरी सुरक्षा व्यवस्था र स्वास्थ्य सावधानी अपनाएर स्थिति नियन्त्रणमा राख्न गृह मन्त्रालयले देशभरका प्रमुख जिल्ला अधिकारीलाई निर्देश गरेको छ ।

पछिल्लो पटक हवाईमार्ग हुँदै विदेशबाट आएका दुई जनामा कोभिड–१९ को संक्रमण देखिएपछि मानव आउजाउमा थप कडाइ गर्न स्थानीय प्रशासनलाई निर्देशन दिइएको छ ।

विपत् व्यवस्थापन प्राधिकरणका प्रमुख कार्यकारी अधिकृत अनिल पोखरेलले कोभिड–१९ नेपालमा फैलिने उच्च जोखिम रहेकाले त्यसविरुद्ध तयारी भइसकेको बताए । ‘हामी महामारी फैलिन नदिन सफल भएका छौं,’ उनले भने, ‘हवाई तथा स्थल नाका बन्द त्यसकै लागि हो । विदेशबाट नेपाल छिरेकाको सूक्ष्म निगरानी पनि भइरहेको छ ।’

सरकारले कोभिड–१९ हवाई र स्थल नाकाबाट भित्रिएका नेपालीमा देखिए भयावह हुने भन्दै उच्च सावधानी अपनाएर निर्णय लिन सुरक्षा निकाय र स्वास्थ्यकर्मीलाई निर्देशन दिएको छ । नेपाली सेनाका प्रवक्ता विज्ञानदेव पाण्डेले लकडाउन कार्यान्वयन गराउन आफूहरू लागिपरेको बताए । ‘सेना अन्य सुरक्षा निकायको ब्याकसपोर्टका रूपमा फिल्डमा छ । आवश्यकताअनुसार पैदल र सवारी गस्तीबाट लकडाउनबारे नागरिकलाई सम्झाइरहेका छौं,’ उनले भने । लकडाउनको पहिलो दिन मंगलबार राजविराज, बागलुङ र महोत्तरीको बर्दिबासमा सेना परिचालन गरिएको र बुधबार सबै जिल्लामा स्थिति नियन्त्रणमा रहेको उनले जानकारी दिए ।

लकडाउन उल्लंघन नेपाल–भारत सीमा र सहरी क्षेत्रमा बढी भएकाले त्यसलाई नियन्त्रण गर्न गृह मन्त्रालयले सुरक्षा निकायलाई निर्देशन दिएको छ । गृहमन्त्री अध्यक्ष रहेको विपत् व्यवस्थापन प्राधिकरणको सचिवालयले भारतबाट स्थलमार्ग हुँदै नेपाल प्रवेश गर्नेको निगरानीमा विशेष ध्यान दिन निर्देशन दिइसकेको छ । प्राधिकरणले जिल्ला विपत् व्यवस्थापन समितिलाई भारतबाट गाउँ तथा सहर पसेका मानिसमाथि निगरानी राख्न स्थानीय तहसँग समन्वय गरेर खटिन ७७ वटै जिल्ला प्रशासनलाई निर्देशन दिएको छ ।

‘कथंकदाचित भारतबाट आएका मानिसमा कोरोना संक्रमणको लक्षण देखिए त्यसले भयावह स्थिति ल्याउन सक्छ,’ गृहका एक अधिकारीले भने, ‘हरेक व्यक्तिसँग सम्पर्क गर्न अब सम्भव छैन, वडा–वडामा सुरक्षाकर्मी, स्थानीय, स्वयंसेवक र कर्मचारी तैनाथ भई को–कहाँबाट आएको हो, त्यसको निगरानी बढाउन स्पष्ट निर्देशन दिएका छौं ।’ विदेशबाट आएका मानिसलाई सेल्फ क्वारेन्टाइनमा बस्न र घरपरिवारका सदस्यसँग पनि टाढै रहन गृहले देशभरका प्रमुख जिल्ला अधिकारीमार्फत सर्वसाधारणलाई आग्रह गरेको छ । लकडाउनको दुई दिनमा सहर र तराई/मधेसका क्षेत्रमा बढी उल्लंघनका घटना भएको देखिन्छ ।

प्रहरी प्रधान कार्यालयका अनुसार वाग्मती प्रदेशअन्तर्गतका विभिन्न जिल्लामा मात्रै लकडाउन उल्लंघन गर्ने ५० भन्दा बढीलाई नियन्त्रणमा लिएर सम्झाइबुझाइ छोडिएको छ । उपत्यकासहित देशभर करिब १ हजार ५ सय सवारी साधन नियन्त्रणमा लिइएको छ । उपत्यकाका ३ जिल्लाबाट मात्रै ८ सय ९१ वटा सवारीलाई लकडाउन उल्लंघन गरेको कसुरमा नियन्त्रणमा लिइएको महानगरीय ट्राफिक प्रहरी प्रवक्ता एसपी जीवनकुमार श्रेष्ठले बताए । अत्यावश्यक कामबाहेक सञ्चालन गरिएका सवारीलाई नियन्त्रणमा लिइएको उनले बताए ।

लकडाउनको पहिलो दिन मंगलबार सप्तरी र बागलुङमा मानिसको चहलपहल बढेपछि सेना र सशस्त्र प्रहरीलाई संयुक्त रूपमा परिचालन गरिएको थियो । लकडाउनको दोस्रो दिन बारामा स्थानीय प्रशासनले निषेधाज्ञा जारी गरेको छ । सडकमा खटिएका प्रहरीलाई अटेर गर्न थालेपछि सुरक्षा व्यवस्था थप कडा गर्न निषेधाज्ञा जारी गरिएको हो । सशस्त्र प्रहरी प्रवक्ता प्रवीणकुमार श्रेष्ठले सीमा नाका र देशभरका सहरी क्षेत्रमा तीनवटै सुरक्षा निकायले उच्च सावधानी अपनाएको बताए ।

‘राजधानीबाहिर सहरी र तराई/मधेसका क्षेत्रमा मानिसको आवतजावन अलि बाक्लो देखियो, यस क्षेत्रमा बारम्बार सम्झाइ–बुझाइ गर्दा पनि घरबाहिर निस्कन थालेपछि सुरक्षा गस्ती बढाएका छौं,’ प्रवक्ता श्रेष्ठले कान्तिपुरसँग भने, ‘लकडाउन उल्लंघन हुन नदिन नियमित गस्तीबाहेकका टोलीलाई पैदल र सवारी गस्तीमा खटाएका छौं ।’ लकडाउन उल्लंघन गर्नेलाई सम्झाइबुझाइ घरभित्र बस्न आग्रह गरिएको तर केही ठाउँमा सम्झाउँदा पनि अटेर गरेपछि बल प्रयोग भएको गृह मन्त्रालयका अधिकारीले जानकारी दिए ।

मंगलबारबाट १८ गतेसम्मका लागि लगाइएको लकडाउनमा सुरक्षाकर्मी, स्वास्थ्यकर्मी, दैनिक उपभोग्य दूध, तरकारी, पानी बोकेका सवारी, इन्धन, एम्बुलेन्स तथा प्रशासनबाट पास लिएका सवारीलाई सञ्चालन अनुमति दिइएको छ । दैनिक उपभोग्य वस्तु किन्न घरबाहिर निस्किएकालाई पनि सामान किन्ने ठाउँसम्म निर्वाह अनुमति दिइएको छ । प्रहरी महानिरीक्षक ठाकुरप्रसाद ज्ञवालीले एआईजीहरूलाई दर्ज्यानी चिह्न कार्यक्रममा बोल्दै कोरोनाविरुद्धको सम्भावित जोखिम नियन्त्रणमा खटिँदा उच्च मनोबल, धैर्यता र व्यावसायिकता कायम राखेर नागरिकमा व्यवहार गर्न प्रहरीलाई निर्देशन दिए ।

नेपाल प्रहरीका सहप्रवक्ता एसएसपी उमेशराज जोशीले अत्यावश्यक वस्तु किन्न जानेलाई केही लचकता अपनाइएको र अनावश्यक रूपमा सडकमा ननिस्कन सर्वसाधारणलाई अपिल गरिएको बताए ।

प्रकाशित : चैत्र १३, २०७६ ०७:३४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
×