कोरोना प्रकोप : मृतकको संख्या चीनमा भन्दा स्पेनमा बढी

एजेन्सी

म्याड्रिड — कोरोना भाइरस (कोभिड–१९) संक्रमणबाट बुधबार दिउँसोसम्म स्पेनमा ३ हजार ४ सय ३४ जनाको मृत्यु भएको छ । कोरोना भाइरसको संक्रमणबाट इटालीपछि सबैभन्दा धेरै स्पेनमा भएको छ ।

मंगलबार मात्रै स्पेनमा मृत्यु हुनेको संख्या २७ प्रतिशतले बढेको छ । मंगलबार स्पेनमा थप ४ सय ४३ जनाको मृत्यु भएको छ भने थप ५ हजार ५ सय ५२ जनामा संक्रमण देखिएको छ । स्पेनमा ४७ हजार ६ सय १० जना संक्रमित छन् भने तीमध्ये ५ हजार ३ सय ६७ जना निको भएका छन् ।


त्यस्तै कोभिड–१९ को संक्रमणबाट इटालीमा मृत्यु हुनेको संख्या करिब ७ हजार पुगेको छ । मंगलबार मात्रै इटालीमा कोभिड–१९ को संक्रमणबाट ७ सय ४३ जनाको मृत्यु भएको छ ।


यसअघि इटालीमा गत शनिबार एकैदिन अहिलेसम्मकै सबैभन्दा बढी ७ सय ९३ जनाको मृत्यु भएको थियो। सोमबार भने इटालीमा ६ सय २ जनाको मृत्यु भएको थियो।


बुधबार दिउँसोसम्म इटालीमा कोभिड–१९ को संक्रमणबाट मृत्यु हुनेको संख्या ६ हजार ८ सय २० पुगेको छ। त्यस्तै इटालीमा ६९ हजार १ सय ७६ जना संक्रमित भएका छन् । इटालीमा करिब ८ हजार संक्रमित निको भएका छन्।


त्यस्तै संक्रमणको हिसाबले चीन र इटालीपछि तेस्रो नम्बरमा रहेको अमेरिकामा बुधबार दिउँसोसम्म ७ सय ८४ जनाको मृत्यु भएको छ। अमेरिकामा संक्रमितको संख्या ५४ हजार ९ सय ६८ पुगेको छ।


चीनमा भने पछिल्लो समय कोभिड–१९ को प्रकोप कम हुँदै गइरहेको छ। मंगलबार चीनमा थप ४ जनाको मात्रै मृत्यु भएको त्यहाँको राष्ट्रिय स्वास्थ्य आयोगले जनाएको छ। त्यस्तै मंगलबार थप ४७ जनामा भाइरसको संक्रमण देखिएको छ।


बुधबार दिउँसोसम्म चीनमा मृत्यु हुनेको संख्या ३ हजार २ सय ८१ पुगेको छ। ८१ हजार २ सय १८ मध्ये ७३ हजार ६ सय ५० जना निको भएको पनि आयोगले जानकारी दिएको छ।


गत डिसेम्बरमा चीनको वुहानबाट सुरु भएको कोभिड-१९ का कारण अहिलेसम्म १९ हजार ६ सय ७ जनाको मृत्यु भइसकेको छ। त्यस्तै ४ लाख ३५ हजारभन्दा बढी संक्रमित हुँदा एक लाख ११ हजारभन्दा बढी निको भएका छन्। प्रकाशित : चैत्र १२, २०७६ १७:५९

प्रतिक्रिया
पठाउनुहोस्
ADVERTISEMENT

नेपालमा लकडाउन : उर्लाबारीमा भाटा अभियान !

कान्तिपुर संवाददाता

काठमाडौँ — कोरोना संक्रमणको जोखिमलाई मध्यनजर गर्दै सरकारले एक साताका लागि लकडाउन जारी गरेको छ । कतिपय जिल्लाहरुमा लकडाउन अवज्ञा गरी सर्वसाधरण सडक, चोकमा निस्केपछि सेनासमेत परिचालन गरिएको छ । 

मोरङको उर्लाबारीमा भने लकडाउन उल्ल‌ंघन गर्नेलाई प्रहरीले भाटा हानेको छ। उर्लावारी नगरपालिकाको अगुवाईमा नगर प्रहरी र इलाका प्रहरी कार्यालयले 'भाटा अभियान' सुरु गरेको हो। सरकारी निर्णय अवज्ञा गर्दै सर्वसाधरणाहरु बाहिर निस्कन थालेपछि नगरपालिका मेयर खड्‍ग फागो सडकमै उत्रिए ।

'हाम्रो देशमा विश्‍वस्तरीय स्वास्थ्य सेवा पनि छैन। सरकारले लकडाउन घोषणा गरेर सर्वसाधरणाहरुलाई घरमै बस्‍न आग्रह गरेको छ,' मेयर फागोले भने,' सरकारी निर्णयको अवज्ञा गर्दै भेटघाट गर्ने, सडक जाम गरेर केही नै नभएजसरी बाहिर निस्कन थालेपछि नगर प्रहरीसहित भाटा बोकेर म सडकमै आएको हुँ।'

उनले एक दुई जनाका कारण धेरैको स्वास्थ्य जोखिममा पर्ने भएकाले यो अभियान सुरु गरिएको बताए । उनले भने, 'लातको भूत बातले मान्दैन भनेपछि के गर्नु? एक दुई जनालाई स्थानीय तहले भाटा हानेजसो गरेपछि त सचेत हुन्छन् नि ! 'अत्यावश्यक काममा भने सर्वसाधरणहरु बाहिर निस्किरहेको उनले बताए।

यस्तै उर्लाबारीनगरपालिकाले कोरोना संक्रमणको जोखिमलाई मध्यनजर गर्दै स्वास्थ्य सामग्रीहरु वितरण गरिरहेको उनले जानकारी दिए । लकडाउनका कारण दैनिक ज्याला मजदुरी गरेर काम गर्ने श्रमिकहरुलाई नगरपालिकाले निःशुल्क खाद्यान्‍‍न उपलब्ध गराउने भएको छ। दैनिक काम नगरी गाँसबास नै उठ्न सक्‍ने नगरभित्रका श्रमिकहरुलाई खाद्यन्‍न वितरण गर्ने तयारी भइरहेको उनले जानकारी दिए।

श्रम नगरी जीविकोपार्जन नहुनेको संख्‍या नगरपालिकामा १६ देखि १७ सयको हाराहारीमा हुन सक्‍‍ने उनले बताए।

प्रकाशित : चैत्र १२, २०७६ १७:३४
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
×