लन्डन — कोरोना भाइरस (कोभिड १९) संक्रमण नियन्त्रणका लागि बेलायत सरकारले अर्को सूचना जारी नभएसम्म विद्यालय बन्द गर्ने घोषणा गरेको छ । सरकारले शुक्रबारदेखि विद्यालय बन्द गर्ने घोषणा गरेको हो । 

प्रधानमन्त्री बोरिस जोन्सनले बुधबार आफ्नो कार्यालय टेन डाउनिङ स्ट्रिटमा आयोजित पत्रकार सम्मेलनमा मे र जुनमा तय भएका जीसीएसई र ए लेभलका परीक्षा पनि रद्द हुने जनाए । संवेदनशील जागिर भएका प्रहरी, मेडिकल स्टाफ र डेलिभरी ड्राइभरका केटाकेटीका लागि भने स्कुल बन्द नहुने बताइएको छ ।  

स्कटल्याण्ड, वेल्स र नर्दन आयरल्याण्डले पनि स्कुल बन्द गर्ने घोषणा गरेका छन् । बेलायतले इटाली, डेनमार्क र आयरल्याण्ड जस्ता अति प्रभावित युरोपेली मुलुकका कदम अनुशरण गरेको हो । 

कोरोना भाइरससंग जुध्न २० हजार सैनिक तयारी अवस्थामा समेत रहेका रक्षा मन्त्रालयले जनाएको छ । ति सेना सडक, अस्पताल र अन्य प्रमुख स्थानमा परिचालन हुने रक्षामन्त्री बेन वालेसको भनाइ उधृत गर्दै सञ्चारमाध्यमले जनाएका छन् । 

सेनाले नेशनल हेल्थ सर्भिस (एनएचएस) लाई सहयोग गर्ने र सेनाका ट्यांक चालकहरुलाई अक्सिजन आपूर्तिमा समेत परिचालन गरिने बताइएको छ ।

उक्त भाइरसबाट बेलायतमा बुधबारसम्म एक सय ४ जनाको मृत्यु भएको छ भने २६२६ जना संक्रमित भएका बेलायती अखबारहरुले जनाएका छन् । बेलायतमा ५६ हजार दुई सय २१ जनाले कोरोना भाइरसको परीक्षण गराएका छन् जसमध्ये ५३ हजार ५ सय ९५ को नेगेटिभ पाइएको छ । सरकारले बेलायतमा झण्डै दोब्बर एकै दिनमा २५ हजार जनासम्मको परीक्षण गर्ने योजना बनाएको छ ।