जापानी क्रुजमा कोरोना भाइरसको संक्रमण
टोकियो — टोकियो नजिकै रहेको योकोहामा खाडीमा रहेको क्रुजका १० जना यात्रुमा कोरोना भाइरस देखिएको छ । जापानको स्वास्थ्य मन्त्रालयले डायमण्ड प्रिन्सेस नाम गरेको क्रुजका १० जनामा कोरोना भाइरसको संक्रमणको पुष्टि गरेको हो ।
२ सय ७३ जनाभन्दा बढीको स्याम्पल जम्मा गरिएको छ । उनीहरुको रिपोर्ट आएपछि मात्रै अरू यात्रुमा संक्रमण भयो/भएन भन्नेबारे थाहा हुने जापानको स्वास्थ्य मन्त्रालयले जनाएको छ ।
जनताको राय
यात्रु र चालकदलका सदस्यसहित क्रुजमा ३ हजार ७ सय व्यक्ति रहेको बताइएको छ । क्रुजमा रहेका सबै व्यक्तिको स्वास्थ्य परीक्षणको रिपोर्ट नआउञ्जेल उनीहरुलाई क्याबिनभित्रै बस्न भनिएको छ । जापानी न्युज एजेन्सी क्योदोका अनुसार जापान सरकारले जहाजमा रहेका ५६ देशका यात्रुलाई कम्तीमा पनि दुई हप्ता क्रुजमै राख्नेछ । क्रुजमा थप खानेकुरा र अन्य सामग्री पठाउन लागिएको जापानी अधिकारीले जानकारी दिएका छन् ।
जापानी अधिकारीहरुका अनुसार गत महिना कोरोना भाइरस पोजिटिभ देखिएका हङकङका एक यात्रु क्रुजमा भएका कारण संक्रमण फैलिएको आशंका गरिएको छ । मध्य जनवरीमा हङकङबाट टोकियो आइपुगेका ती व्यक्ति जनवरी २० योकोहामाबाट क्रुजमा चढेको र जनवरी २५ हङकङ उत्रिएको बताइएको छ । जापानी सञ्चार माध्यम एनएचकेका अनुसार १० जनाबाहेक कसैमा पनि ज्वरो र अन्य लक्षणहरु देखिएको छैन । कोरोना भाइरस पोजिटिभ देखिएकालाई कानागावामा रहेको अस्पताल लगिएको छ ।
जापानमा कोरोना भाइरस संक्रमितको संख्या २३ पुगेको त्यहाँको स्वास्थ्य मन्त्रालयले जनाएको छ । चीनकाे हुबेईबाट सुरु भएको काेराेना भाइरसका कारण बुधबार बिहानसम्म ४९२ जनाको मृत्यु भएको छ । त्यसमध्ये चीनमा ४९० जना, हङकङ र फिलिपिन्समा एक-एक जनाको मृत्यु भएको हाे । त्यस्तै चीनसहित विश्वका २५ भन्दा मुलुकका २४ हजारभन्दा बढी व्यक्तिमा यसको संक्रमण देखिएको छ । प्रकाशित : माघ २२, २०७६ ०८:२२
प्रतिक्रिया
छ वर्षअघि अन्त्य भइसकेको यातायात क्षेत्रको सिन्डिकेट ब्युँताउने चलखेल सुरू भएको छ । तपाईंको के राय छ ?