डोटी — चुनावी चहलपहल बढेसँगै गठबन्धन दलहरूबीच स्थानीय तहको चुनावका विषयमा अन्योलता बढ्दै गएको छ । उनीहरूले उम्मेदवारी छनोट प्रक्रियालाई तीव्रता दिएका छैनन् । माओवादी र समाजवादी भने कांग्रेसका पछिल्ला गतिविधि हेरेर रणनीति तयार पारिरहेका छन् ।

कांग्रेसका सुदूरपश्चिम प्रदेश सभापति वीरबहादुर बलायरले चुनावी अभियानमा गठबन्धनको विपक्षमा बोल्दै हिँडेपछि उनको गृहजिल्ला डोटीमा गठबन्धनका दलहरूबीच संवादहीनताको अवस्था छ । तर केन्द्रीय समितिले स्थानीय तहमै छलफल गरेर टुंगाउन परिपत्र गरेपछि भने आइतबार अनौपचारिक रूपमा संवाद अघि बढेको डोटी कांग्रेसका जिल्ला सभापति नरेन्द्रबहादुर सिंहले बताए । ‘कांग्रेसभित्रै उम्मेदवारका आकांक्षी थुप्रै छन्, कतिपय वडामा निर्विरोध उम्मेदवार आइसके,’ सभापति सिंहले भने, ‘केन्द्रको पछिल्लो पत्राचारका कारण गठबन्धनका दलहरूसँग छलफल अघि बढाउने तयारी भइरहेको छ ।’ कांग्रेसका अधिकांश नेता/कार्यकर्ताले चुनावमा एक्लै भिड्न दबाब दिइरहे पनि माओवादी र समाजवादीबाट भने गठबन्धनका लागि तीव्र दबाब आइरहेको छ । यद्यपि कांग्रेसले भने तीन चरणमा उम्मेदवारको नामावली सूचीकृत गराएर पालिकास्तरमा सिफारिस गरिसकेको छ । 

माओवादी र समाजवादीका नेता/कार्यकर्ता भने गठबन्धनअनुसार कांग्रेस नहिँडे वामघटक एक ठाउँमा उभिएर कांग्रेसलाई पाखा लगाउन सकिने तर्क गरिरहेका छन् । कांग्रेसले निहुँ खोजे एमालेसँग मिल्न सकिने चेतावनी आइरहेको कांग्रेसका केआईसिंह गाउँपालिका सभापति अर्जुन बलायरले बताए ।